காஞ்சிவரம் - திரை விமர்சனம்

நடிப்பு: பிரகாஷ் ராஜ், ஸ்ரேயா ரெட்டி
இசை: ஸ்ரீகுமார்
ஒளிப்பதிவு: திரு
இயக்கம்: பிரியதர்ஷன்

நீண்ட இடைவெளிக்குப் பிறகு பிரியதர்ஷன் இயக்கத்தில் வந்திருக்கும் தமிழ்த் திரைப்படம் காஞ்சிவரம். நெசவாளியின் துயரத்தை இதில் பதிவு செய்திருக்கிறார் பிரியதர்ஷன்.

காஞ்சிவரத்தில் (இப்போதைய காஞ்சிபுரம்தான்) பட்டு நெசவாளி பிரகாஷ் ராஜ். அவருடைய மனைவி ஸ்ரேயா ரெட்டி. இவர்களுக்கு பெண் குழந்தை பிறக்கிறது. குழந்தை பிறந்த சந்தோஷத்தில் அதன் திருமணத்தின்போது பட்டுப்புடவை தருவதாக வாக்கு த்தருகிறார் பிரகாஷ்ராஜ். இதைக் கேட்டு ஊரே அதிர்ச்சி அடைகிறது. ஒரு பட்டு நெசவாளி பட்டுப்புடவை வாங்குவது எவ்வளவு சிரமம் என்று மனைவி ஸ்ரேயா ரெட்டியும் கோபித்துக் கொள்கிறார். பெண்ணுக்காக தான் சேர்த்து வைத்திருக்கும் பணத்தை க்காட்டுகிறார் பிரகாஷ் ராஜ்.

இதற்கிடையே, தங்கை கணவர் வந்து, வியாபாரம் செய்ய பணம் கொடுத்தால் அவரை அழைத்துச் செல்வதாகக் கூறுகிறார். பெண்ணுக்காகச் சேர்த்த பணத்தை கொடுத்து தங்கையையும், அவளுடைய கணவரையும் அனுப்பி வைக்கிறார் பிரகாஷ்ராஜ்.

எங்கே தனது பெண்ணுக்கு பட்டுப்புடவை வாங்க முடியாமல் போய் விடுமோ என்று அஞ்சுகிறார். அதனால் ஜமீனுக்கு நெய்து தரும் புடவைகளில் இருந்து பட்டு நூல்களை கொஞ்ச கொஞ்சமாக திருடி வைக்கிறார். ஒருநாள் சிக்கிக் கொள்கிறார். அதன்பிறகு அவருடைய வாழ்க்கை பாதை மாறிப் போவதுதான் கதை.

நெசவாளி பட்டுப் புடவை நெய்தாலும், அவனால் அதை வாங்கமுடியாத அளவுக்கு வறுமை வாட்டுகிறது என்று சொல்கிறது காஞ்சிவரம் திரைப்படம்.

வேங்கடம் என்கிற வேடத்தில் வரும் பிரகாஷ் ராஜ் காஞ்சிவரம் படத்திற்கு ஒரு வரம். அவருடைய நடிப்பில் அவருடைய பழையப் படங்களின் பாதிப்பு எதையும் நம்மால் உணரமுடியவில்லை. மகளுக்காக உருகும்போதெல்லாம் பிரகாஷ் ராஜ் கண்களில் மட்டுமல்ல, நம் கண்களிலும் கண்ணீர் கசிகிறது. ஸ்ரேயா ரெட்டி, மகளாக வரும் ஷம்மு, நண்பர் ஜெயக்குமார் என ஒவ்வொருவரும் நெஞ்சில் நிற்கிறார்கள். திருவின் ஒளிப்பதிவு நம்மை பழைய காஞ்சிவரத்திற்கே அழைத்துச் செல்கிறது. ஸ்ரீகுமாரின் பின்னணி இசையும் பொருத்தமாக இருக்கிறது.

குத்து பாட்டு, கவர்ச்சி ஆட்டம், சண்டை என தமிழ் சினிமா போய்க்கொண்டிருக்கையில், தமிழனின் அவலத்தை மிக அழகாக பதிவு செய்திருக்கிறார் பிரியதர்ஷன்.

யாவரும் நலம் - திரை விமர்சனம் 

நடிப்பு: மாதவன், நீதுசந்திரா, சரண்யா
இயக்கம்: விக்ரம் கே.குமார்
ஒளிப்பதிவு: பி.சி.ஸ்ரீராம்
இசை: டப்பி-பரீக்

தமிழில் நீண்ட இடைவெளிக்குப் பிறகு வந்திருக்கும் திகில் படம் யாவரும் நலம். அடுக்குமாடி குடியிருப்பில் புதுவீடு (13ஆவது  மாடி) வாங்கி தாய் சரண்யா, மனைவி நீதுசந்திராவுடன் குடியேறுகிறார் மாதவன். அண்ணன் குடும்பத்தினரும் அவருடன் வசிக்கின்றனர்.
 
வீட்டில் நடக்கும் விநோத நிகழ்வுகள் அவரை பயமுறுத்துகிறது. டெலிவிஷனில் யாவரும் நலம் தொடரில் வரும் சம்பவங்கள் தனது குடும்பத்திலும் நடப்பது கண்டு திகைக்கிறார் மாதவன்.
 
ஆவிகள் பற்றி ஆராய்ச்சி செய்யும் டாக்டர் மூலம் நடப்பவை பேய்களின் கைங்கரியம் என உணர்கிறார். ஒரு கட்டத்தில் தொடரில் வரும் கதாபாத்திரங்கள் கொடூரமாய் கொல்லப்படுகின்றனர். அதுபோல் தனது குடும்பத்தினரும் சாகடிக்கப்படலாம் என அஞ்சுகிறார். அவர் பயந்த மாதிரியே ஒருவன் வீட்டுக்குள் புகுந்து குடும்பத்தினரை கொல்ல பாய்கிறான். அவர்களை மாதவன் எப்படி காப்பாற்றுகிறார் என்பது கிளைமாக்ஸ்…
 
வெள்ளை சேலை மோகினிகள், கோர உருவங்கள் நாய், நரி, உளளைகள் பாய்ச்சி என்ற வழக்கமான பார்முலா இல்லாத பேய் படம்.

மனத்திற்குள் பயத்தை மெல்ல ஊடுருவச் செய்து, போக போக சீட் நுனிக்கு நகர வைத்து நடுங்க வைப்பதில் வெற்றி பெற்றுள்ளார் இயக்குனர் விக்ரம் கே.குமார். தமிழ் சினிமா இதுவரை பார்க்காத புது திகில் கதையை சொல்லியுள்ளார்.
 
லிப்ட்டில் ஆபிஸ் புறப்பட தயாராகும் மாதவன் அது வேலை செய்யாததை பார்த்து படிகட்டில் இறங்க மறுநொடியே லிபட் இயங்குவது, டி.வி. தொடரில் வருவதுபோல் அண்ணனுக்கு சம்பள உயர்வு கிடைப்பது, மனைவி கர்ப்பமாவது, பிறகு கீழே விழுந்து கருகலைவது…என காட்சிகளில் திகில்மயம்.
 
யாவரும் நலம் தொடரில் வரும் சம்பங்கள் குடும்பத்தில் நடப்பது எப்படி என்பதை அறிய அத்தொடர் படப்பிடிப்புக்கு சென்று பார்க்கும்போது அங்கு கேம்ஷோ நடப்பதை கண்டு அதிர்வதும், தன் வீட்டு டி.வி.யில் மட்டும் அத்தலைப்பில் வேறுமாதிரி நடிகர்களும் கதையும் நகர்வது அறிந்து உறைவதும் குலைநடுங்க வைக்கிறது.
 
டி.வி. தொடரில் கொலை ஆயுதத்துடன் தன் உருவத்தை பார்த்து குடும்பத்தை கொல்லப்போகும் கொலையாளி நான் தான் என மாதவன் தன் நண்பனிடம் சொல்லி அறைக்குள் அடைத்து பூட்ட வைப்பது, பிறகு நிஜ கொலைகாரன் தன்னால் வீட்டுக்கு அனுப்பி வைக்கப்பட்ட டாக்டர் என்பதை அறிந்து பிடிக்க அறைக்குள்ளேயே அலறி துடிப்பது திகிலின் உச்சம்…
 
பல வருடங்களுக்கு முன் டாக்டரால் கொல்லப்பட்டவர்கள் டி.வி. தொடர் கதாபாத்திரங்களாக வந்து கொலையாளியை பழிதீர்ப்பதாக கதையை முடித்ததில் இயக்குநரின் புத்திசாலித்தனம் பளிச்சிடுகிறது.

அமுல் பேபி மாதவன் முகத்தில் தெரியும் பயத்தைப் பார்த்தால் நமக்கும் பயம் வருகிறது. அந்த அளவிற்கு கதாபாத்திரத்துடன் ஒன்றி நடித்திருக்கிறார் மாதவன். சரண்யா, நீது சந்திரா பார்வையற்ற முதியவராக வரும் சட்டர்ஜி, மனநோயாளி, போலீஸ் அதிகாரி என அனைத்து கேரக்டர்களும் வலுவாக செதுக்கப்பட்டுள்ளன. 

திகில் படக் காட்சிகளுக்கு பி.சி.ஸ்ரீராமின் ஒளிப்பதிவு நிறையவே ஒத்தாசை செய்திருக்கிறது. டப்பி-பரீக்கின் பின்னணி இசையும் மிரட்டுகிறது.

சுமார் இரண்டரை மணிநேரம் பயத்தில் உறைய வேண்டுமானால் யாவரும் நலம் பார்க்கலாம். உடன் ஒரு துணையிருந்தால் நலம்!

சிவா மனசுல சக்தி - திரை விமர்சனம்

நடிப்பு: ஜீவா, அனுயா, ஊர்வசி, சந்தானம், சத்யன்
தயாரிப்பு: விகடன் டாக்கீஸ்
இயக்கம்: ராஜேஷ்.எம்
இசை: யுவன்ஷங்கர்ராஜா

கூரியர் நிறுவனத்தில் வேலை பார்க்கும் ஜீவா, ரேடியோ ஜாக்கி அனுயா. இருவரும் ஏதேச்சையாகச் சந்தித்து நண்பர்களாகிவிட, ராணுவத்தில் வேலை பார்ப்பதாக ஜீவாவும், விமானப்பணிப்பெண்ணாக வேலை பார்ப்பதாக அனுயாவும் புளுகு மூட்டையை அவிழ்த்துவிடுகின்றனர்.

உண்மை தெரிய வந்ததும் ஒருவரை ஒருவர் வார்த்தைகளால் காலை வாரிகக் கொள்கிறார்கள். இந்த ஈகோ யுத்தம் காதலாகி கசிந்துருகுகிறது.

காதல் நிறைவேறும் வேளையில் ஜீவா சொன்ன மற்றொரு பொய் காதலைக் கிழித்துப் போடுகிறது. கடைசியில் ஜீவாவும் அனுயாவும் இணைந்தார்களா இல்லையா என்பது க்ளைமாக்ஸ்.

நகைச்சுவைதான் களம் என்பதால் அதுதான் லட்சியம் என்பதுபோல் கதை நகர்கிறது. பந்தாவுக்காக பொய் சொல்லி, சொல்லி புளித்துப் போய் தன்னுடையக் காதலைச் சொல்ல அனுயா, பிறந்தநாள் கேக்குடன் ஜீவாவைப் பார்க்கப் போக அவரோ ரொம்ப கூலாக, ‘பர்த்டேவா? இன்னைக்கா, நான் சொன்ன பொய்யை நம்பிட்டியா?’ என்று ஜீவா நக்கல் செய்யும்போது காதலும் காணாமல் போகிறது.

மறுபடியும் அனுயாவைத் துரத்துகிறார் ஜீவா. அனுயாவின் அலுவலகத்திற்குச் சென்று குடித்துவிட்டு கலாட்டா செய்கிறார்.
ஜீவாவின் சேட்டையால் வெறுத்துப் போகும் அனுயா, அப்பா பார்க்கும் பையனைக் கட்டிக்கொள்ள சம்மதிக்கிறார். மாப்பிள்ளையாக நம்முன்னே திடீரென ஆர்யா வந்து நிற்கிறார்.

‘இப்பத்தான் பார்த்தேன். அதுக்குள்ள அவளை கல்யாணம் பண்ணிக்கனும்னு தோணுது. நீங்க ரெண்டுபேரும் க்கோஸ் பிரண்ட்ஸ். உனக்கு அப்படி எதுவும் தோணலையா?’ என்று ஜீவாவைக் கலாய்க்கும் ஆர்யா அத்துடன் திரையை காலி பண்ணிவிடுகிறார்.

கடைசியில் ஜீவா அனுயா இடையே காதல் கைகூடுகிறது. ஆனாலும் அவர்களை சேர்த்து வைக்காமல், அவர்களுடைய ஈகோ யுத்தம் தொடருவது போல முடித்திருக்கிறார்கள்.

[Show as slideshow]

தனம்

தனம் திரைப்படம் குறித்து வந்த செய்திகளை நம்பி திரையரங்கத்திற்குள் நுழைந்தீர்களானால் நி்ச்சயம் ஏமாற்றம் மட்டுமே மிஞ்சும்.

தனம் ஏதோ கனமான கதையை தாங்கி வருகிறது என்று பார்த்தால் இலவம் பஞ்சு கணக்காக இருக்கிறது நிஜத்தில்.

பாலியல் தொழிலாளியான சங்கீதாவை (தனம்) சுகம் காணவரும் பிரேம் விரும்புகிறார். திருமணம் செய்யவும் முடிவு செய்கிறார். சங்கீதா முதலில் மறுத்தாலும் பின்னர் ஒப்புக் கொள்கிறார். ஆனால் பிரேம் வீட்டில் எதிர்ப்பு வலுக்கிறது.

அக்குடும்ப ஆஸ்தான ஜோதிடர் கோட்டா சீனிவாச ராவ், ‘தாசி மருமகளாக வந்தால் அதிர்ஷ்டம் கூரையைப் பிய்த்துக்கொண்டு கொட்டும்’ என்று கூறுவதை ஏற்றுக்கொண்டு திருமணம் செய்து வைக்கிறார்கள்.

கோட்டா சீனிவாசராவுக்கு சங்கீதா மீது பல கண். அவரை அடையும் முயற்சியில் தோல்வியடையும் அவர், ‘சங்கீதாவுக்குப் பிறக்கும் குழந்தையால் குடும்பத்துக்கு ஆபத்து’ என்று அவிழ்த்துவிடுகிறார்.

ஆருடத்தை அமோகமாக ஆதரிக்கும் பிரேம் குடும்பம், அந்தக் குழந்தையை எப்படியாவது ஒழிக்க முற்படுகிறது. கடைசியில் கள்ளிப்பால் (இன்னுமா?) கொடுத்து குழந்தையை காலி செய்கிறார்கள்.

வெகுண்டெழும் சங்கீதா செய்யும் அதகளம்தான் திரைப்படத்தின் கடைசிக் கதைக்களம்.

ஆச்சாரமான குடும்பத்தில், பாலியல் தொழிலாளி மருமகளாகும் கதை என்ற விதத்தில் ஆரம்பத்தில் அசத்தினாலும் இயக்குநர் தடம் மாறி தடுமாறுகிறார்.

ஐந்நூறு ரூபாய் இருக்கா என்று பார்ப்பவர்களை எல்லாம் கேட்டு சுண்டி இழுக்கும் சங்கீதா தனம் என்கிற கதாபாத்திரத்தின் கனம் தாங்காமல் சில நேரம் தவிக்கிறார்.

பிரேம் அப்பாவியாக இருந்தாலும், சங்கீதாவை அடைவதில் மட்டும் ரொம்பவே அடப்பாவியாக அலைகிறார்.

பிரேமின் மாமா கருணாஸ், அண்ணன் சசி என அவரது குடும்பமே சங்கீதாவின் மீது காமப் பார்வை வீசுவது காணச் சகிக்கவில்லை.

சங்கீதாவை அடைய முடியாததுக்கு கோட்டா சீனிவாச ராவ் சொல்லும் காரணம் சரியான கொட்டாவி.

கிரீஷ் கர்னாட், கோட்டா சீனிவாசராவ், ஆசிஷ் வித்யார்த்தி, சங்கீதா, இளவரசு, எம்.எஸ். பாஸ்கர் என்று பெரிய கைகளை தனத்திற்காக இழுத்துப் போட்டதெல்லாம் சரிதான். அவர்களுடைய நடிப்புக்கு சரியான தீனி போடாதது சரியில்லை.

எல்லோரையும் போல இசைஞானி இளையராஜாவும் ஏமாற்றியதுதான் கஷ்டமாக இருக்கிறது.

தனம் கனமில்லை,

-கி.சே.

Artist: Sangeetha, Kota Srinivasa Rao, Ashish Vidyarthi, Girish Karnad, Prakash Raj, Vivek, Prem, Ramesh Khanna, Ilavarasu, M. S Baskar, Manobala, Chitra Lakshmanan, Ashok Rajan, Mayilsamy
Direction: G Siva
Production: Nandivaram Sampathkumar
Music: Ilayaraja