பெ.திருமா முருகன், அவிநாசி.

தமிழக அரசின் கோரிக்கையை ஏற்று பிரணாப் முகர்ஜி இலங்கை செல்வாரா?

கடப்பாரை போட்டு நெம்பினாலும் புறப்பட மாட்டார் போல் தெரிகிறது. தமிழகத்தின் நெருக்குதல்களுக்கெல்லாம் மத்திய அரசு வளைத்து கொடுக்காது எனத் தெரிகிறது. சர்வதேச உறவுகளைப் பராமரிக்கும் அக்கறையின் அளவு மத்திய அரசுக்கு அதிகம். மாநில அரசுகளுக்கு இதைப்பற்றி அதிக அக்கறை இல்லை.

எம்.கருப்புசாமி, குளித்தலை.

தமிழக அரசின் புதிய மின்வெட்டுத் திட்டம் எப்படி?

உயர் அழுத்த மின்சாரத்தைப் பயன்படுத்தும் தொழிற்சாலைகளையும் சாதாரண மின்சாரத்தைப் பயன்படுத்தும் தொழிற்சாலைகளையும் ஒரே மாதிரியாக நடத்த எண்ணும் தமிழக அரசின் புதிய திட்டம் நல்ல திட்டமல்ல. பழைய மின்வெட்டு முறையே சிறந்தது.

எம்.பாலு, சேலம்.

மத்திய அமைச்சர் ஆ.ராசா சம்பந்தப்பட்ட கிரீன் ஹவுஸ் விவகாரங்கள் என்னாச்சு?

பசுமை என்பது ஈரமுள்ளது. அது தீப்பிடிக்காது. ஆனால் இந்த ராசாவின் ‘கிரீன் ஹவுஸ்’ கொழுந்துவிட்டு எரிகிறது. இப்போதெல்லாம் ராசா பிறரால் பேசப்படுவதில் ராஜாவாக இருக்கிறார்.

ஆர்.கண்ணன், பொன்னேரி.

ஒரு அரசு நிர்வாகம் எப்போது தன்னிச்சையாகச் செயல்படும்?

கமிஷன் என்ற சொல்லில் ஓர் ‘ஒமிஷன்’ செய்ய வேண்டும். அதாவது ‘க’வை எடுக்க வேண்டும். அப்போதுதான் அரசாங்கம் என்ற மிஷன் சுத்தபத்தமாகச் செயல்படும்.

எம்.பாஷா, சென்னை-18.

ஒரு பெண்ணின் காதல் எதில் ஆரம்பிக்கிறது?

முன்பெல்லாம் அவர்கள் சிணுங்கினால்தான் காதல்! இப்போதெல்லாம் அவர்களின் செல்போன்கள் சிணுங்கினாலே காதல்! காதல் அப்படியேதான் இருக்கிறது; அந்தச் சிணுங்கால்தான் இடம் மாறிப் போச்சு!

சி.டி.சிதம்பரம், மந்தவெளி.

தோனி மகிழ்ச்சியில் திளைப்பார் என ஊகிக்கலாமா?

வாய்ப்புக் குறைவு. தோனி வாழும் பகுதியில் உள்ளூர் ரெளடிகள் அவரது குடும்ப உறுப்பினர்களை அடிக்கடி பணம் கேட்டுக் மிரட்டுகிறார்கள். தராவிடில் தோனிக்கு ஆபத்து விளைவிப்போம் என்கிறார்கள். கேட்பதோ ஐம்பது இலட்சம். தோனி நிம்மதியாக இருந்தார். தோனியின் குடும்பமும் நிம்மதியாக இருந்தது. புகழும் வசதியும் பெருக ஆரம்பித்ததும் மன நிம்மதியைப் பறிக்கிற இத்தகைய மிரட்டல்கள் அதிகமாகிவிட்டன. பாவம் தோனி!

பி.ரமேஷ், சென்னை-40.

எந்திரன் படம் இப்போது கைமாறிவிட்டதே?

பிள்ளையாரை ஐங்கரன் என்பார்கள். ஆனால் இப்படத்திற்குப் பிள்ளையார் சுழி போட்ட அந்த ஐங்கரனுக்கே இப்போது ‘சுழி’ மாறிவிட்டது. நானும் இதைத்தான் சொல்லணும்!

ஆர்.அசோகன், நெம்மேலி.

உங்களுக்குப் பிடித்த கட்சி?

தமிழகத்தில் புதிதாக முளைத்துள்ள ஜனநாயக தேசிய கட்சி. மின்சாரத் திருட்டு இல்லாமல் பொதுக்கூட்டம் நடத்துவதாய், ஊரெல்லாம் வெளிச்சம் போட்டுக் காட்டிக் கொண்டிருக்கிற கட்சி! இந்த வெளிச்சத்திற்கே இந்தக் கட்சிக்கு சூரியனுக்கு முன்னால் நிலவைப் பிடித்துக் கையில் கொடுக்கலாம்.

எஸ்.மணி, காஞ்சிபுரம்.

ஈராக்கில் புஷ்மீது வீசப்பட்ட ஷூக்களை நாற்பத்தேழு கோடி ரூபாய்க்கு விலை கொடுத்து வாங்க ஒருவர் ஆசைப்பட்டிருக்கிறாரே?

அந்தப் பாதரட்சையைப் புனிதமாகவே போற்றுகிறது ஈராக். உலக வரலாற்றிலேயே காலில் இருந்து கழன்ற மாத்திரத்திலேயே முக்தி கண்ட ஷூக்கள் இவையாகத்தான் இருக்கும்.

ரா. அழகப்பன், திருப்பூர்.

உள்நாட்டுப் பாதுகாப்புக் குறித்து ப.சிதம்பரம் எடுத்து வரும் புதிய முயற்சிகள் குறித்து உங்கள் கருத்து?

கடலில் விழுந்தாலும் முத்தெடுத்து மீளக்கூடியவர் ப.சிதம்பரம். சிதம்பரத்தின் முயற்சிகள் கைகூட வேண்டும். நாடு வன்முறைக் கொடுமையிலிருந்து மீள வேண்டும்!

எஸ்.பீதாம்பரம், கொடுங்கையூர்.

சரத்குமார் தம் வேட்பாளர் ஜெயிப்பார் என்கிறாராமே?

கூட்டம் கூடுவது வேறு; ஓட்டுப் பெட்டியில் ஓட்டு விழுவது வேறு என்பதை சரத்குமார் புரிந்து கொள்ள திருமங்கலம் தேர்தல் நல்ல முன்னோட்டமாக அமையும்!

எம்.பாரதி, சென்னை.

உங்களுக்குக் கதை சொல்லப் பிடிக்குமா?

ஒரு ஊரில் ஒரு தாத்தா, ஒரு பேரன்! அந்தத் தாத்தாவும், பேரனும்… என்று கதையை ஆரம்பிப்பதற்குள்ளாகவே குழந்தைகளுக்கு முகச் சலிப்பு வந்து விடுகிறது. போப்பா எனக்கு அரசியல் கதைகளெல்லாம் வேண்டாம் என்கின்றன.

டி.பிரபாகரன், ஆற்காடு.

நீங்கள் யாரை அதிகம் நேசிக்கிறீர்கள்?

ஐம்பதுகளில் என் இதயத்தை! ஐம்பதுகளுக்கு முன்னால் நடந்த கதையெல்லாம் கேளாதீர்கள். ஐம்பதுக்குப் பின்னால் இதயத்தைக் காதலித்தால்தான் பிழைத்துக் கிடக்கவே முடியும் போலிருக்கு!

ஆர்.குமார், சென்னை.

இடை ஓடிகிற மாதிரி நடக்கும் இளம் பெண்களைப் பற்றி?

ஏதோ ஐ.எஸ்.ஒ, தரச் சான்றிதழுக்குப் பாடுபட்டு நடப்பது போல் பாடுபடுவது அவ்வளவு பண்பானதல்ல! ஒடித்து விழும் இடைக்கு நொடித்துப் போகிற இளைஞர்கள் ஏராளம் என்பதை இவர்கள் கவனத்தில் கொள்ளட்டும்.

சி.குமரேசன், மாதவரம்.

தி.மு.க. எப்படியிருக்கிறது?

இந்து மதக் கடவுள் மாதிரி இதற்கும் இப்போது அறுபடை வீடுகள். என்னத்தச் சொல்ல?

ஏ.ராஜன், பள்ளத்தூர்.

மன்மோகன் எதற்கும் அசர மாட்டேன்கிறாரே?

‘பயமே நோய்க்குப் பிரம்மா’ என்று யாரோ அவருக்குச் சொல்லியிருக்கிறார்கள். அதனால்தான் இந்த டாக்டர் மன்மோகன் பயமே இல்லாமல் இருக்கிறார்.

வி.முனுசாமி, பட்டுக்கோட்டை.

சத்தியமூர்த்திபவனை விடுதலைச் சிறுத்தைகள் தாக்கிய பிறகு இந்த அரசு மீது தங்கபாலு காட்டமாக இருக்கிறாரே?

அவர் தேனியிலிருந்து பேசியது உங்களுக்குத் தேனீ போலக் கொட்டிருச்சோ? தங்கபாலு எங்கே காட்டமானார்? எங்கள் தயவால் நடக்கும் இந்த அரசு உடனே அவர்களைக் கைது செய்ய வேண்டும் என்றுதான் சொன்னார். ‘எங்கள் தயவு’ என்றது உங்களுக்குக் காட்டமா? உண்மை சுடத்தான் செய்யும்?

பி.சுரேஷ், சென்னை-118.

இன்றைய போலீசாரின் வேலை?

எங்கெல்லாம் உருவ பொம்மைகள் எரிக்கப்படுகிறதோ அங்கெல்லாம் போய் அதைத் தண்ணீர் ஊற்றி அணைப்பதுதான்! பெண்களுக்குப் பதில் இப்போது இவர்கள்தான் இடுப்புத் தண்ணீரைத் தூக்குகிறார்கள், நல்ல வேலை போங்க!

எஸ்.ஜான்பீட்டர், உடுமலை.

உங்கள் வீட்டிலும் குடும்பப் பிரச்னை வருமா?

சென்னையில் டிசம்பர் மாதம்தான் சங்கீத சீசன்! ஆனால் எனது வீட்டில் எல்லா மாதமும் டிசம்பர் மாதம்! வீட்டிலுள்ளவர்கள் ஒன்றாய்ச் சேர்ந்து, சபா களை கட்ட ஆரம்பித்து, அவர்களும் ஆலாபனை செய்ய ஆரம்பிக்கும் போது நானும் வீட்டை விட்டுக் கிளம்பி விடுவேன். எல்லாம் சபா பழக்கம்!

என்.மூர்த்தி, திருச்சி.

தேர்தல் பணிக்குழுத் தலைவர் பொறுப்பிலிருந்து அழகிரி திடீரென்று விலகிவிட்டாரே, அதுபற்றி?

தி.மு.க.வில் சமீப காலமாய் நடக்கும் கண்ணாமூச்சி விளையாட்டுகளில் இதுவும் ஒன்று. நம் தமிழகத்தின் தலையெழுத்து, அப்பா பிள்ளை விளையாட்டை ஒரு மாநில விளையாட்டாய் இரசிக்க வேண்டியுள்ளது.

ஆர்.ராகவன், ஈகை.

தி.மு.க. இல்லாத காங்கிரஸ்?

போலியோ மருந்து கொடுக்கப்பட வேண்டிய குழந்தை, அதனால்தான் தி.மு.க. டாக்டர்களைத் தேடி இந்தக் குழந்தை வீரிடுகிறது.

கே.எஸ்.எல்.நாராயணன், சென்னை.

2009-ஐ எப்படி வரவேற்கிறீர்கள்?

மோப்ப நாய்களுக்கு வேலையில்லாத ஒரு ஆண்டாக! இந்த வகை நாய்களுக்கு ஏப்பம் வராதபடி அமையட்டும்.

எஸ்.லோகேந்திரன், செங்கல்பட்டு.

கலைஞர் ஆங்கிலத்தில் பேசுவாரா?

மைக், கேமரா இல்லாவிடில் பேசுவார். சமீபத்தில் ஒரு பேட்டியில் தனக்கு மொத்தம் ஆறு இஷ்யூஸ்கள் என்று கலைஞர் கூறியிருக்கிறார். இஷ்யூஸ் என்றால் பிள்ளைகள் என்றும் பொருள்; விவகாரங்கள் என்றும் பொருள். கலைஞர் ஆங்கிலத்திலும் சிலேடையாகப் பேசவல்லவர் என்பது இப்போது தான் தெரிகிறது!.