சிலையாக நின்றுவிட்டுப்போன மனிதர்கள்!

பிரிட்டன் தலைநகர் லண்டனில் உள்ளது டிராஃபல்கர் சதுக்கம். இங்கு பிரிட்டன் மகாராணி வம்சத்தைச் சேர்ந்தவர்களின் சிலைகளை மட்டுமே வைப்பது வழக்கம். மேலும் நான்கு பீடங்களில் நான்காவது பீடம் மட்டும் காலியாக உள்ளது. அந்த பீடத்தில் சிலையாகப் போவது யார் என்பது இப்போதைக்கு தெரியாது.

இந்தப்பீடத்தில் சிலைகளாக உயிருள்ள மனிதர்களை வைத்தால் என்ன என்று யோசித்தார் சிற்பி ஆண்டனி கார்சம்லெ. அந்த பீடத்தின் மீது யார் வேண்டுமானாலும், எந்த காரணம் பொருட்டும், ஒரு மணி நேரத்திற்கு நின்றுவிட்டுச் செல்லலாம் என அறிவித்தார்.

கடந்த வருடம், ஜூலை 6 ஆம் தேதி தொடங்கிய மனித உயிர்ச் சிலை நிகழ்வு கடந்த அக்டோபர் 14 தேதி முடிந்தது (100 நாள்).

நான்காவது பீடத்தில் நின்றுவிட்டுப்போன சில மனித உயிர்ச் சிலைகள் தான் நீங்கள் காண்பது.

பூனைக்கு கண்ணீர் அஞ்சலி செலுத்திய பேருந்து பயணிகள்

பிரிட்டனில் பர்னே பார்டன் என்ற இடத்தில் உள்ள பேருந்து நிலையத்தில் கேஸ்பர் என்ற பூனைக்கு போஸ்டர் ஒட்டி கண்ணீர் அஞ்சலி செலுத்தி இருந்தனர் பேருந்து பயணிகள் சிலர்.

கேஸ்பருக்கு பேருந்தில் பயணிப்பது என்றல் செம குஷி. கடந்த நான்கு வருடமாக இந்தப் பூனை, ப்ளைமோத், டெவான் நகரங்களுக்கு இடையே ஓடும் பேருந்துகளில் இலவசப் பயணம் மேற்கொண்டிருந்திருக்கிறது. அந்த வழியாகப் பயணிக்கும் பயணிகள் யாவருக்கும் கேஸ்பரை நன்றாகத் தெரியும்.

கடந்த வாரத்தில் ஒருநாள் பேருந்து ஏற சாலையை கடக்கும்போது, கேஸ்பரை ஒரே தட்டு  தட்டி விட்டு பறந்துவிட்டது ஒரு இரண்டு சக்கர வாகனம். படுகாயத்துடன் துடித்துக் கொண்டிருந்த கேஸ்பரின் உயிர் ஒருவழியாக அடங்கியது.தங்களுடன் பயணித்த அருமைப் பூனையின் இழப்பை தாங்க முடியாமல் ஆழ்ந்த வருத்தத்தில் இருக்கிறார்கள் சக பயணிகள்.

அரவாணிகளுக்கான அகில இந்திய அழகு போட்டி

‘இந்தியன் சூப்பர் இளவரசி’ என்ற பெயரில் அரவாணிகளுக்கான அகில இந்திய அழகு போட்டியின் முதல் சுற்று, சென்னையில் நாளை நடக்கிறது.

‘டுவல்வ் நூன் எண்டர்டெய்ன்மென்ட்’ மற்றும் விகேர் இண்டர்நேஷனல் நிறுவனம் இணைந்து, அரவாணிகளுக்கான அழகு போட்டியை ‘இந்தியன் சூப்பர் குயின்’ என்ற பெயரில் நடத்துகிறது. இப் போட்டியின் முதல் சுற்று சென்னை, பெங்களூர், டெல்லி, மும்பை, ஐதராபாத், போபால், புவனேஸ்வர், அகமதாபாத், ஜெய்ப்பூர், கொல்கத்தா ஆகிய 10 நகரங்களில் நடக்கிறது.

போட்டியாளரின் படைப்புத்திறன், சிறப்பு திறன்கள், தன்னம்பிக்கை ஆகியவற்றின் அடிப்படையில் தேர்வு செய்யப்படுவார்கள். ஒவ்வொரு மாநிலத்தில் இருந்தும் 3 பேர் தேர்வு செய்யப்பட்டு, அரையிறுதி சுற்றுக்கு அனுப்பப்படுவார்கள்.

சென்னையில் இந்த போட்டி, கோயம்பேடு ரவுண்டானா அருகில் உள்ள ‘கேட் வே’ ஓட்டலில் நாளை நடக்கிறது.

பிப்ரவரி 6ம் தேதி, மும்பையில் அரையிறுதி போட்டி நடக்கிறது. இதில் தேர்வு செய்யப்படும் 12 பேருக்கு அழகு தொழில் துறை நிபுணர்களால் பயிற்சி அளிக்கப்படும். இவர்களில் மிகச்சிறந்த முறையில் திறமையை வெளிப்படுத்தும் திருநங்கைக்கு, பிப்ரவரி 21ம் தேதி டெல்லியில் நடக்கும் இறுதி போட்டியில் ‘இந்தியன் சூப்பர் இளவரசி’ என்ற பட்டம் அளிக்கப்படும்.

இந்த அழகு போட்டி குறித்து ‘டுவல்வ் நூன் எண்டர்டெய்ன்மென்ட்’ நிறுவனத்தின் முதன்மை செயல் அதிகாரி லஷ்மிநாராயணன் திரிபாதி கூறுகையில்,

” இந்த அழகு போட்டியில், யார் மிகச் சிறந்தவர் அல்லது மிக அழகானவர் யார் என்பது முக்கியமில்லை. அதைவிட, எல்லோரையும் போல அரவாணிகளும் மனிதர்களே என்று உலகுக்கு காட்டவே இந்த போட்டியை நடத்துகிறோம்” என்று கூறினார்.

முட்டையிடும் சீன மனிதர்கள்!

வேறு வழி இல்லை இப்படித்தான் இந்தக் கட்டுரைக்கு தலைப்பிட வேண்டும்.

எலக்ட்ரானிக்ஸ் பொருட்களில் தன்னுடைய ‘கைத்திறமை’ யைக் காட்டி வந்த சீனா, தற்போது கோழி முட்டை தயாரிப்பிலும் கைத்திறமையைக் காட்டி வருகிறது. கோழி முட்டையை கோழி மட்டும் தான் போட வேண்டும் என்பது இயற்கையின் நியதி. ஆனால் சீனாவில் போலி கோழி முட்டைகளை உற்பத்தி செய்யத் தொடங்கி விட்டனர். அதுகுறித்த விவரம் தான் இது.

போலி முட்டை தயாரிக்க 7 வித ரசாயணங்களை பயன்படுத்துகிறார்கள் சீனர்கள். அதில் கால்சியம் கார்பனேட், ஸ்டார்ச், ரெசின், ஜெலட்டின், அலும் மற்றும் சில ரசாயணங்கள் அடக்கம்.

இந்தப் படத்தில் போலி முட்டை தயாரிக்க உதவும் கால்சியம் கார்பனேட் ஒரு பாத்திரத்திலும், மஞ்சள் கருவுக்கு நிறம் சேர்க்க மஞ்சள்  வண்ணக்கலவையும், மஞ்சள் கரு மற்றும் வெள்ளை ப் பகுதி உருவாக்கும் மோல்டுகள் அருகருகே வைக்கப்பட்டுள்ளன.

ரசாயணங்களைக் கலந்து போலியாகத் தயாரிக்கப்பட்ட மஞ்சய் கரு மோல்டில் ஊற்றப்படுகிறது.

மஞ்சய் கருவின் மேலே கால்சியம் கார்பனேட் மற்றும் சில ரசாயணங்கள்  உதவியால் வெள்ளைக்கரு  உருவாக்கப்படுகிறது. சற்று நேரத்தில் மஞ்சள் கருவைச் சுற்றி வெள்ளைப்பகுதி தயார். பின்னர் இது ஒரு மணி நேரம் காய வைக்கப்படுகிறது.

பாரபின் மெழுகில் தோய்த்தெடுக்கப்படும் போலி முட்டை.

பிறகு, அதன்மேல் செயற்கை ஓடு பொருத்தப்படுகிறது.

நிஜ முட்டையும் போலி முட்டையும்.

நிஜ கோழி முட்டையின் ஓட்டைவிட எளிதாக உடையக் கூடியது இந்த போலி முட்டை ஓடு. ஆனால் அதைப் பற்றிய கவலை சீன வாடிக்கையாளர்களுக்கு இல்லை. நிஜ முட்டைக்கும் போலி முட்டைக்கும் சுவையில் பெரிய வித்தியாசமில்லை என்று சொல்வதை விட போலி முட்டையின் சுவை அதிகமாக இருப்பதாகப் பேச்சு. ஆப் பாயில் போடும் போலி முட்டையின் அழகு தெரிய வருகிறது. மஞ்சள் கரு கொஞ்சம்கூட சிதறாமல் பந்துபோல் முழுதாக நிமிர்ந்து நிற்கிறதாம். மேலும், வெள்ளைக்கரு பரவும்போது நுரையும் அதிகமாக எழுகிறது.

போலி முட்டையை உண்பதால் உடலில் மெது மெதுவாக விஷம் ஏறுகிறது என்றும் இதன் விளைவுகள் மோசமாக இருக்கும் என்றும் எச்சரிக்கை விடுக்கிறார்கள் உணவுத்துறை அறிஞர்கள்.
ஆனாலும் சீன போலி முட்டைத் தயாரிப்பாளர்கள் அடங்குவதாகத் தெரியவில்லை. காரணம் காசு! ஒரு கிலோ கோழி முட்டை 60 ரூபாய் என்று வைத்துக்கொள்ளுங்கள். அதுவே போலி முட்டை ஒரு கிலோ தயாரிக்க 6 ரூபாய் தான் செலவாகிறது. ஏன் தயாரிக்க மாட்டார்கள்.

உணவு கலப்படம் மற்றும் போலி உணவுகளால் உடல் நலம் பாதிக்கப்பட்டு சீனாவில் இறப்பவர்கள்  எண்ணிக்கை சமீப காலத்தில் அதிகரித்திருப்பதாகத் தகவல்கள் கூறுகின்றன.

அவதார் படத்துக்கு கோல்டன் குளோப் விருது

ஹாலிவுட் திரைப்படம் ‘அவதார்’ கோல்டன் குளோப் விருது பெற்றுள்ளது. வேற்று கிரக மனிதர்களைத் தேடி பூமியில் இருந்து செல்லும் சிலர் அடையும் அனுபவத்தை சொல்லும் திரைப்படம் அவதார். கடந்த டிசம்பர் மாத மத்தியில் வெளியான இத்திரைப்படம் உலக அளவில் வசூல் சாதனை செய்துள்ளது. இதுவரை இத்திரைப்படம் ரூ.6 ஆயிரம் கோடி வசூலித்துள்ளதாகத் தெரிகிறது. மேலும், தற்போது இந்த படத்துக்கு சிறந்த படத்திற்கான கோல்டன் குளோப் விருது கிடைத்துள்ளது. சிறந்த இயக்குநர் விருது அவதார் படத்தை இயக்கிய ஜேம்ஸ் கேமரூனுக்குக் கிடைத்துள்ளது. சிறந்த நடிகையாக ‘தி பிளைண்ட் சைட்’ படத்தில் நடித்த நடிகை சாண்ட்ரா புல்லக் தேர்ந்தெடுக்கப்பட்டார்.

உலகின் அரிய சந்திப்பு!

இவ்வளவு பிரமாண்டமான கை குலுக்கலை சந்தித்திருக்கவே மாட்டார் ஹி பிங்பிங். இவ்வளவு கீழே குனிந்திருக்கவே மாட்டார் சுல்தான் கோஷன். வேறு ஒன்றுமில்லைங்க…உலகின் உயரமான மனிதரான, துருக்கி நாட்டைச் சேர்ந்த சுல்தான் கோஷனும் உலகின் குள்ளமான மனிதரான, சீனாவைச் சேர்ந்த ஹி பிங்பிங்கும் துருக்கி நாட்டின் தலைநகரான இஸ்தான்புல்லில் சந்தித்துக் கொண்டனர்.

விவசாயக் கூலியான 27 வயது கோஷன் 8 அடி 1 அங்குல உயரத்துடன் உலகின் உயரமான மனிதராக கின்னஸ் சாதனை நிறுவனத்தால் அறிவிக்கப்பட்டவர். 10 செண்டிமீட்டர் வித்தியாசத்தில் சீனத்து பாவோ இஸ்கானை தோற்கடித்தவர் இவர். ஹி பிங்பிங் தன்னுடைய 21 வயதுக்கு ஏற்ற உயரமில்லாமல் 2 அடி 5 அங்குல உயரமே வளர்ந்ததால், உலகின் குள்ளமான மனிதராக அதே கின்னஸ் சாதனை நிறுவனத்தால் சான்றிதழ் தரப்பட்டவர். இவரோ சீனாவைச் சேர்ந்த வூ கேங் என்ற பொடியரால் (2 அடி 3 அங்குலம்) போட்டிக்கு உள்ளாகியிருப்பவர்.

துருக்கியில் கின்னஸ் நிறுவனம் நடத்திய நிகழ்ச்சியையொட்டி, இவ்விருவரின் அரிய சந்திப்பு நடத்தப்பட்டது.

தாஜ் நகர் : மக்களே உருவாக்கிய இரயில் நிலையம்! - விடியோ

இரயில்வே அமைச்சகத்திடம் 20 வருடங்களாகக் கேட்டும் கிடைக்காத இரயில் நிலையத்தை தாங்களே உருவாக்கி சாதனைப் படைத்திருக்கின்றனர் வட இந்திய கிராமத்தினர்.

தலைநகர் டெல்லிக்கு சற்று தொலைவில் உள்ள குர்ஹான் பகுதியில் இருக்கும் கிராமம் தாஜ் நகர். இந்தப் பகுதியை இரயில் தண்டவாளங்கள் தொட்டுச் சென்றாலும் அப்பகுதி மக்களுக்கு அதனால் ஒரு பயனும் இல்லாமல் இருந்தது. மாணவர்கள், வேலைக்குச் செல்பவர்கள், வெளியூர் செல்பவர்கள் என கிராமத்தினர் அனைவரும் சில கிலோ மீட்டர் தாண்டியுள்ள மற்ற இரயில் நிலையம் ஏதாவது ஒன்றுக்குச் சென்றுதான் இரயிலேற வேண்டும்.

தங்களது சிரமத்தைச் சொல்லி, தங்கள் ஊருக்கென இரயில் நிலையம் ஒன்றை அமைக்க இரயில்வே துறையினரிடம் மன்றாடி வந்தனர் இந்த கிராமத்தினர். 20 ஆண்டுகாலமாக கேட்டும், நிதி இல்லாத காரணத்தால் முடியாது என்ற பதிலையே பெற்றுவந்த இக்கிராமத்தினர் இறுதியாக தாங்களே நிதி திரட்டி இரயில் நிலையத்தை கட்டுவது என தீர்மானித்தனர்.

இந்த விஷயத்தை இரயில்வே அதிகாரிகளிடமும் தெரிவித்தனர். அதனை ஏற்றுக்கொண்ட அதிகாரிகள் நிலம் அளிக்கவும், இரயில் நிலையத்தின் கட்டட வரைபடம் அளிக்கவும், வேலையைப் பார்வையிடவும் ஒப்புக்கொண்டனர்.அத்துடன் நீங்கள் ரயில் நிலையத்தை அமையுங்கள் ரயிலை நாங்கள் நிறுத்துகிறோம் என்றனர்

இதில் என்ன கூத்து என்றால், நிலம், நான்கு பெயர் பலகைகள் மற்றும் மேற்பார்வை இவற்றுக்கு கிராமத்தினரிடமிருந்து ரூ.5.6 லட்சத்தை பெற்றிருக்கிறது இரயில்வே துறை.

கிராமத்தில் உள்ள ஒவ்வொரு குடும்பமும் இதற்காக  தலா ரூ.3000 தரவேண்டும் என தீர்மானிக்கப்பட்டது. தாஜ் நகர கிராம மக்கள் சாதாரண விவசாயிகள் என்றாலும் ஊருக்காக என்றதும் அள்ளிக் கொடுத்தனர். இரண்டு வருடத்தில் ரூ. 20 லட்சத்து 80 ஆயிரத்து 786 யை வசூலித்தவர்கள், இரயில் நிலைய பணியை உடனே துவக்கினர். பணியை முடித்து, முழுமையான இரயில் நிலையத்தையும் இந்த மாதத் துவக்கத்தில் திறந்து விட்டனர்.

தாங்கள் உருவாக்கிய தாஜ்நகர் இரயில் நிலையத்தில், இரயில்கள் நின்று செல்வதை இக்கிராமத்தினர் அனைவரும் கண்டு ஆனந்தக்கண்ணீர் வடிக்கின்றனர்.

அரசுதான் எல்லாவற்றையும் செய்யவேண்டுமா என்ன? முயன்றால் சாதாரண மக்களாலும் பொதுப்பணியை எடுத்து செய்து முடிக்க முடியும் என நிரூபித்து விட்டனர் தாஜ்நகர் கிராமத்தினர்.

ஹெய்தி நாட்டு பூகம்பம் : 2 லட்சம் பேர் பலி

ஹெய்தி நாட்டில் ஏற்பட்ட பூகம்பத்தால் பலியானவர்களின் எண்ணிக்கை இரண்டு லட்சத்தை எட்டியுள்ளதாகத் தகவல்கள் தெரிவிக்கின்றன . கரீபியன் கடல் பகுதியில் உள்ள ஹெய்தி  நாட்டில்  கடந்த வாரம் 7.3 ரிக்டர் அளவுக்கு பூகம்பம் ஏற்பட்டது. தலைநகர் போர்ட் ஆப் பிரின்சில் உள்ள அதிபர் மாளிகை உட்பட பெரும்பாலான கட்டடங்கள் நொறுங்கின. மின்சாரம், தகவல் தொடர்பு, தண்ணீர் விநியோகம் ஆகியவை பாதிக்கப்பட்டுள்ளன. ஏழை நாடான ஹெய்தியில் போதிய வசதியில்லாத காரணத்தால், மீட்பு நடவடிக்கைகள் வேகமாக நடக்கவில்லை

நொறுங்கிய கட்டடங்களில் சிக்கியவர்களில் பெரும்பாலானோர் பலியாகி விட்டனர். இதுவரை 40 ஆயிரம் பேரின் சடலங்கள் மீட்கப்பட்டு புதைக்கப்பட்டுள்ளன. இறந்தவர்களின் எண்ணிக்கை இரண்டு லட்சம் இருக்கும் என, அந்நாட்டின் உள்துறை அமைச்சர் பால் ஆன்டனி தெரிவித்துள்ளார்.ஹெய்தி நாட்டுக்கு தேவையான அனைத்து உதவிகளையும் வழங்க அமெரிக்கா உறுதியளித்துள்ளது. ஹெய்தி பூகம்பத்தின் கொடுமையை உணர்ந்த உலக நாடுகள், கப்பல் மற்றும் விமானம் மூலம் நிவாரணப் பொருட்களை அனுப்பி வருகின்றன.

தலைநகர் போர்ட் ஆப் பிரின்ஸ் விமான நிலையத்தில் தகவல் தொடர்பு, மின்சார வசதிகள் இல்லாததால், அந்த விமான நிலையத்தின் தகவல் கட்டுப்பாடு வசதிகளை அமெரிக்கா ஏற்படுத்தி நிர்வகித்து வருகிறது. சாலைகள் முழுவதும் இடிந்த கட்டடங்களின் குப்பைகளும், சடலங்களும் நிரம்பியுள்ளதால், போக்குவரத்து துண்டிக்கப்பட்டுள்ளது. பூகம்பத்தில் ஐ.நா., அலுவலகமும் நொறுங்கி விழுந்து விட்டதால், அதிலிருந்த முக்கிய அதிகாரிகள் சிலர் இறந்து விட்டனர். எனவே, நிவாரணப் பொருட்களை முழு வீச்சில் சப்ளை செய்ய முடியாத நிலை உள்ளது. நிவாரணப் பொருட்களுக்காக பாத்திரங்களை ஏந்திக்கொண்டு குழந்தைகளுடன் மக்கள் திரிவதைக் கண்ட அமெரிக்க மீட்புக் குழுவினர், ஹெலிகாப்டர்கள் மூலம் உணவுப் பொருட்களையும், தண்ணீர் பாட்டில்களையும் வீசி வருகின்றனர்.

நிவாரணப் பொருட்கள் கிடைக்காமல் பொறுமையிழந்த சிலர், நொறுங்கி கிடக்கும் கடைகளில் புகுந்து பொருட்களை கொள்ளையடித்து வருகின்றனர். விமான நிலையம் அருகே விநியோகம்  செய்ய வைத்துள்ள பொருட்களையும் சிலர் கொள்ளையடித்து வருகின்றனர்.

பூகம்பத்தில் மாளிகையும், அலுவலகமும் இடிந்து விட்டதால், தற்போது காவல் துறை  தலைமை அலுவலகத்தில் அதிபர் ரெனி ப்ரிவாலும், பிரதமர் ஜீன் மேக்சும் தங்கியுள்ளனர். தொலைபேசி வசதி கூட இல்லாமல் இவர்கள்  தவித்து வருகின்றனர். ,

“நொறுங்கி கிடக்கும் கட்டடங்களில் சடலங்கள் அழுகி துர்நாற்றம் வீச துவங்கி விட்டதால், தொற்று நோய் பரவும் அபாயம் ஏற்பட்டுள்ளது. புதைப்பதற்கு போதிய ஆட்களும் வசதியும் இல்லாததால், பெரும்பாலான சடலங்களை எரித்து விட்டோம்” என சுகாதாரத் துறை அமைச்சர் அலெக்ஸ் லார்சன்
தெரிவித்துள்ளார்.

ஹெய்தியில் பல ஆண்டுகளாக உள்நாட்டு கலவரம் நடந்து வந்ததால், போர் குழுக்களைச் சேர்ந்த பலர் சிறையில் அடைக்கப்பட்டுள்ளனர். போர்ட் ஆப் பிரின்ஸ் சிறையில் அடைக்கப்பட்டுள்ள பலர் சிறையை உடைத்து தப்பித்து வருகின்றனர்.

மரணம் பக்கத்தில்தான் : புகைப்படத் தொகுப்பு

இந்த நொடியைத் தவிர வேறு எதுவும் நம் கையில் இல்லை. அடுத்த நொடி என்பது போன நொடியில் தீர்மானிக்கப்பட்டதா, அடுத்த நொடிக்கு அடுத்த நொடியால் தீர்மானிக்கப்படுகிறதா? அதைத்தான் விளக்க முடியாமல் விளக்குகின்றன இந்த புகைப்படங்கள்.

நைஜீரியாவின் மீன்பிடி போட்டி!

நைஜீரியாவின் வடமேற்கு பகுதியில் உள்ள கெப்பி மாகாணத்தில் இருக்கும் மீனவர் பகுதி அர்குங்கு. இங்கு ஆண்டுதோறும் மீன்பிடித் திருவிழா நடந்து வருகிறது. அதற்கு ‘அர்குங்கு சர்வதேச மீன்பிடி திருவிழா’ என்று பெயர்.

இந்த போட்டியில் கலந்து கொள்ளும் ஆண்கள் ஆற்றில் இறங்கி, தங்கள் கைகளாலேயே பெரிய மீனாகப் பிடித்துக் காட்ட வேண்டும். ஆண்களின் மீன் பிடிக்கும் திறமையை சுற்றி நிற்கும் பெண்களின் கண்கள் பார்த்தபடி இருக்கும் என்பதால், ஆண்கள் உற்சாகத்துடன் மீன் பிடித்தலில் ஈடுபடுவர்.

நான்கு நாட்கள் தொடர்ந்து நடைபெறும் இந்த மீன்பிடித் திருவிழா ஆண்டுதோறும் பிப்ரவரி அல்லது மார்ச் மாதத்தில் ஏதோ ஒரு புதன்கிழமை அன்று தொடங்கும். கடைசி நாளான சனிக்கிழமை பெரிய மீன் பிடிக்கும் போட்டி நடைபெறுகிறது. இந்த மீன்பிடித் திருவிழா அப்பகுதி மக்களிடையே பிரசித்தமானது என்பதால் ஏராளமான மக்கள் கூடி போட்டியை கண்டு களிப்பர்.

பெரிய மீன் பிடிக்கும் போட்டி நடத்தப்படும் கடைசி நாள்தான் பார்க்கவே ரம்மியமாக இருக்கும். அப்பகுதியில் ஓடும் ‘மாட்டன் ஃபடா’ ஆற்றில் ஒரு மைல் சுற்றளவுக்கு இறங்கும் ஆண்கள் தங்களுடன் கையால் பிடிக்கும் சின்ன வலையும், மீன் கிடைத்தால் அதை பாதுகாக்க ஒரு பானையும் மட்டும் தான் வைத்திருப்பர். 45 நிமிடம் நடக்கும் இந்தப் போட்டியில் பெரிய மீன் பிடிப்பவர்களுக்கு கார் மற்றும் பல்வேறு பரிசுகள் வழங்கப்படுகின்றன. பெரிய மீன் பிடிக்கும் நபருக்கு அந்த வருட ‘சிறந்த மீன் பிடிப்பாளர்’ பட்டமும் அளிக்கப்படுகிறது.

கடந்த வருடம் சிறந்த மீன் பிடிப்பாளராக பட்டமளிக்கப்பட்டவரிடம் இருந்து அந்தப் பட்டம் திரும்ப பெறப்பட்டது. காரணம், போட்டி  நடந்த ஆற்றில் பிடித்ததாக அவர் கொண்டு வந்த பெரிய மீன் ஏற்கனவே வேறு எங்கோ பிடிக்கப்பட்ட மீனாம். இப்படியும் ஏமாற்றுக்காரர்கள் இருக்கத்தானே செய்கிறார்கள்.

இந்த திருவிழாவின் ஒரு பகுதியாக காட்டு வாத்து பிடித்தல், ஆட்டுத்தோலை உரித்தல் என பல போட்டிகள் நடத்தப்படுகின்றன.