Friday, 5 Feb 2010
குப்பைக் கூளங்களை வைத்து ஒரு பாலம் : சீன நிறுவனம் செய்த மோசடி
சீனாவின் பெருநகரங்களில் ஒன்றான ஷாங்காயில் வூசாங்க் ஆற்றின் மீது கட்டப்பட்ட பாலம் இடிந்து விழுந்தது. அதற்கு காரணம் மோசமாக கட்டப்பட்டது அல்ல, அதைவிட மோசமானது. பாலத்தின் பல இடங்களில் கான்கிரீட்டுக்கு பதிலாக உள்ளே குப்பைக் கூளங்களும், பிளாஸ்டிக் கழிவுகளும் வைத்து கட்டப்பட்டுள்ளது.
ஷாங்காயில் ஓடும் வூசாங்க் ஆறு முக்கிய கப்பல் போக்குவரத்து பாதையாகும். சீனாவின் உள்ளே ஒரு சரக்கு செல்ல வேண்டுமானால் இந்த ஆற்றை கடக்காமல் முடியாது. இந்த ஆற்றுடன் கலக்கும் ஷசோவ் ஆற்றின் ஒரு பகுதியில் இருந்த பழைய பாலத்திற்கு பதிலாக புதிய பாலம்ஒன்று கட்டப்பட்டது. 2009 இல் பாலப் பணிகள் நிறைவடைந்தன. ஆனால், குறுகிய காலத்திலேயே பாலத்தின் பல இடங்களில் விரிசல் விடத்தொடங்கியது. அமைந்த நிலம் சரியாக இல்லையோ என்று சந்தேகம் ஏற்பட்டது. ஆனால் அப்படி ஏதும் இல்லை என்பதும், பாலம் உறுதியாகக் கட்டப்படவில்லை என்பதும் தெரிய வந்தது. விரிசல் விடத்தொடங்கிய இடங்களை தட்டிப் பார்த்தபோது அந்த இடத்தில் கான்கிரீட்டுக்குப் பதிலாக கட்டட மிச்சங்களும், பிளாஸ்டிக் மற்றும் துணி குப்பைக் கூளங்களும் வெளியே வந்து விழுந்துள்ளன.
பாலப் பணிக்கு சரியான விகிதத்தில் சிமெண்ட், மணல் மற்றும் இதர அவசியமான பொருட்களைப் பயன்படுத்தாமல் கழிவுகளை கலப்படம் செய்து பாலத்தை தயார் செய்து விட்டார்கள். அது புழக்கத்திற்கு வந்த சில மாதங்களிலேயே பல்லிளித்து விட்டது..
மறு சுழற்சி தேவைதான் அது மனித சுழற்சியை கெடுக்கும் அளவுக்கா போகும் என்ற கேள்வியுடன் அந்தப் பாலத்தை கட்டிய நிறுவனம் மீது விசாரணை நடந்து வருகிறது.
Thursday, 4 Feb 2010
பார்பி பொம்மைக்கு உருவம் தரும் ரவுலிங், கிம் கிளிஸ்டர்ஸ்
பிரபல டென்னிஸ் வீராங்கனை கிம் கிளிஸ்டர்ஸ், ஹாரி பாட்டர் புகழ் ஜே.கே. ரவுலிங் மற்றும் ஸ்வீடன் இளவரசி விக்டோரியா ஆகியோர் பார்பி பொம்மை மாடலாகின்றனர். இவர்கள் உருவத்தில் பார்லி பொம்மைகள் தயாரிக்கப்படுகிறது.
இதுகுறித்து பார்பி பொம்மைகளைத் தயாரிக்கும் மாட்டல் நிறுவனத்தன் துணைத் தலைவர் ரோசா ஜீகர்ஸ் கூறுகையில்,
“4 வயதோ 70 வயதோ ஒவ்வொரு பெண்ணுக்கும் அவர்களுடைய வாழ்வில் ரோல் மாடல் தேவைப்படுகிறது. எனவே, சிறந்த ரோல் மாடல்களாகத் திகழும் இம்மூவரின் உருவத்தில் பார்பி பொம்மைகளைத் தயாரிக்கிறோம். இவர்கள் மூலம் பார்பி பொம்மைக்கு அதிகப் புகழ் உண்டாகும்.
கிம் கிளிஸ்ட்ர்ஸ் திருமணமாகி, ஒரு குழந்தைக்கு தாயானப் பிறகு கடந்த ஆண்டு அமெரிக்க ஓபன் டென்னிஸ் போட்டியில் கலந்துகொண்டு பட்டத்தை வென்று சாதனைப் படைத்தவர். அப்படிப்பட்டவர் அந்த போட்டியின்போது அணிந்திருந்த உடையின் தோற்றத்தில் பொம்மை இருக்கும். அவருடைய குழந்தை ஜடாவைப் போல, குழந்தை பார்பியும் தயாரிக்கப்படும்.
ஜேகே ரவுலிங் கடந்த ஆண்டு மான்ஸ்டர்ஸ் அன்ட் கிரிட்டிக்ஸ் விருது வழங்கும் நிகழ்ச்சியில் அணிந்திருந்த உடையின் தோற்றத்தில் ஒரு பொம்மையும், ஸ்வீடன் இளவரசி விக்டோரியா தோற்றத்தில் ஒரு பொம்மையும் தயாரிக்கப்படும்” என்று தெரிவித்துள்ளார்.
Thursday, 4 Feb 2010
சின்னத்திரை இயக்குநர் சி.ஜே. பாஸ்கர் மீது செக்ஸ் புகார்
சின்னத்திரை இயக்குநர் சி.ஜே. பாஸ்கருக்கு ரெட் கார்டு போட்டிருக்கிறது சின்னத்திரை கலைஞர்கள் சங்கம். சித்தி, அண்ணாமலை, மனைவி, பெண், அஞ்சலி என ஓழுக்கமான கதைகளை தொடராகக் கொடுத்த இவர்மீது வைக்கப்பட்டிருப்பது செக்ஸ் புகார்.
தான் இயக்கும் தொடர்களில் நடிக்கும் நடிகைகள் மீது இவர் பார்வை படாமல் இருக்காது என்கிறார்கள். சின்னத்திரை நடிகைகள் பலரும் சங்கத்தில் தங்கள் குறையை கொட்டியதால்தான் இந்த ரெட் கார்டு போடப்பட்டிருக்கிறது என்கிறார்கள். குறிப்பாக முன்னணி நடிகைகளிடம் வாலாட்டாமல் இரண்டாம், மூன்றாம் நிலை நடிகைகளிடம் மட்டுமே இவர் இவ்வாறு அணுகியதால், அதிக பாதிப்பு இல்லாமல் தப்பித்துவிட்டார் என்றும் கூறப்படுகிறது.
அதேநேரம் தன்னுடைய தவறுகளை உணர்ந்து கொண்ட சி.ஜே. பாஸ்கர் அதற்காக மன்னிப்பு கேட்கவும் தயாராக இருக்கிறாராம்.
Thursday, 4 Feb 2010
குழந்தை வேண்டி நாக்கை அறுத்துக்கொண்ட நம்பிக்கையாளர்!
மரணம் நம் வாழ்வின் ஒரு பகுதி. ஆனால், அதுவாக தழுவும் முன்பாக நாம் அதை தழுவ விரும்புவதில்லை. இது இயற்கை. மனிதன் உயிருடன் ஏன் இருக்கவேண்டும். அவனால் இயன்றவரை இனவிருத்தி செய்யவேண்டும். தனிமனிதன், குடும்பம், தந்தை, தாத்தா, கொள்ளுதாத்தா போன்ற நிலைகள் எல்லாம் மனித வாழ்க்கையின் ஏணிப்படிகள். இதற்கெல்லாம் அடிப்படை நமக்கென ஒரு வாரிசு அல்லது வாரிசுகள்.
வசவசவென்று வாரிசுகளை வைத்துக்கொண்டு அவதிப்படுபவர்களைவிட வாரிசு என்ற ஒன்று இல்லாமல் அவதிப்படுபவர்களின் நிலை பரிதாபம். குழந்தை இல்லாவிட்டால் இந்த சமூகம் நம்மை பார்க்கும் பார்வையே வேறு. கல்யாணமாச்சா அடுத்த பத்தாவது மாதம் பெண்ணின் வயிறு உப்பி இருக்கிறதா என்று உற்றுப்பார்க்கும் உலகம் இது. இந்த இயலாமைக்கெல்லாம் பெயர் வைத்திருக்கிறது நம் சமூகம். அதெல்லாம் நமக்கு வேண்டாம். ஆனால், வாரிசு இல்லாதவர்கள் என்னவெல்லாம் செய்து பார்க்கிறார்கள் தெரியுமா? முறையான மருத்துவத்தைப் பார்க்காமல், ‘எத்தை தின்றால் பித்தம் தெளியும்’ கணக்கில் செயல்படுகிறவர்கள் நிறைந்த இந்தியா இது.
உத்தரபிரதேச மாநிலம் பந்தாரி கிராமத்தைச் சேர்ந்தவர் முகேஷ் குமார். இவருக்கு திருமணம் ஆகி நான்கு ஆண்டுகள் கரைந்துவிட்டன. ஆனால் மனைவி வயிற்றில் புழு, பூச்சி உருவாகவில்லை என்ற மன உளைச்சலில் உழன்று வந்தார் இவர். ஏன் தனக்கு வாரிசு உருவாகவில்லை என்றெல்லாம் இவர் மருத்துவ ஆராய்ச்சி செய்துகொண்டிருக்கவில்லை. விதி என்று நம்பி விட்டார். இதனால் கணவன், மனைவி இடையேயும் கருத்து வேறுபாடு ஏற்பட்டது. தம்முடைய இயலாமையைக் கண்டு நொந்தவர், கடவுளை வேண்டினால் போதும் குழந்தை பாக்கியம் கிடைக்கும் என்று எண்ணினார். சடாரென ஒரு முடிவுக்கு வந்தவர் அருகில் இருந்த சிவன் கோயிலுக்குச் சென்று குழந்தை பாக்கியம் வேண்டி மனம் உருக வேண்டினார். அதற்கு ஈடாக தன் நாக்கை அறுத்து காணிக்கையாக்கினார் முகேஷ்குமார்.
இவருடைய மூடச்செயலைக் கண்டவர்கள் அவரை அழைத்துச்சென்று மருத்துவமனையில் சேர்த்தனர். நல்லவேளை, அங்கு மருத்துவர்கள் செய்த அறுவைசிகிச்சையில் அறுந்த நாக்கு இணைக்கப்பட்டது. நாக்கை இணைத்துவிட்டாலும் முகேஷ் குமாருக்கு பேச்சு சரியாக வருமா என்பதை இப்போது சொல்ல முடியாது என்று கூறிவிட்டனர் மருத்துவர்கள்.
குழந்தைக்காக லஞ்சம் கொடுப்பதை அந்தக் கடவுளே விரும்பமாட்டார் என்பது இந்த பக்தருக்கு தெரியாதது பரிதாபம்தான்.
Thursday, 4 Feb 2010
ஆன்லைனில் அரிசி தானம் : பசி போக்கும் சூப்பர் தளம்
சாப்பிட்டீங்களா…நாம் சாப்பிட்டப் பிறகு மற்றவர்களை விசாரிக்கும் குசல வார்த்தை இது. சாப்பிடும் முன்பாக காகம் மற்றும் பறவைகளுக்கும் சாப்பிட்டு முடித்தப் பின்னர் நாய், பூனை போன்ற வீட்டு விலங்குகளுக்கும் மிச்சம் சொச்சத்தை போடுவது நம்முடைய தொன்றுதொட்ட வழக்கம். ராப்பிச்சைக்காரருக்காக மதியமே சமைத்து வைக்கும் அளவுக்கு தாராள மனதிற்கு நாம்
சொந்தக்காரர்கள்தான். ஆனால் கேள்விப்படும் உண்மைகள் சுடுகின்றன. இந்த உலகில் 100 கோடிக்கும் மேலானவர்கள் சரியான சாப்பாடு இல்லாமல் சிரமப்பட்டு வருகிறார்கள். உலகில் இப்போதைய மக்கள் தொகை 600 கோடி சொச்சம். ஆனால், 1200 கோடி மக்களுக்கு உணவளிக்க நம்மால் முடியும். உலகின் உணவு உற்பத்தி அந்தளவுக்கு அதிகமாகவே இருக்கிறது என்கிறார்கள்.
வற்றிப் போன வயிற்றோடு காத்திருப்பவர்களுக்கு உணவை கொண்டுபோய் சேர்க்கத்தான் ஐ.நா., போன்ற அமைப்புகள் உணவுத் திட்டங்களை, உலகம் முழுக்க அமல்படுத்தி வருகின்றன. நம்முடைய மத்திய, மாநில் அரசுகளும் சத்துணவு திட்டம், மதிய உணவுத் திட்டம், அன்னதான திட்டம் மற்றும் ரூபாய்க்கு 1 கிலோ அரிசி திட்டங்களையெல்லாம் செயல்படுத்தி வருகின்றன எனலாம். தனியார் தொண்டு அமைப்புகளும் பல்வேறு அன்னதான திட்டங்களை நடத்தி வருகின்றன. சிறிய அமைப்புகள் சில கைப்பிடி அரிசித் திட்டத்தை உள்ளூரில் செயல்படுத்தி வருகின்றன. கைப்பிடி அரிசித் திட்டத்தின் படி, அதன் அமைப்பாளர் வரும்போது நாம் ஒரு கைப்பிடி அரிசியை அளிக்க வேண்டும். சிறு துளி பெரு வெள்ளமாவதைப் போல், கைப்பிடி கைப்பிடியாக அரிசியை சேர்த்து மொத்தமாக பசியால் தவிப்பவர்களுக்கு அது உதவும்.
இதெல்லாம் நேரடியானவை ஆன்லைனில் என்ன செய்யலாம் என்று யோசித்த ஜான் பிரீன் என்பவர் freerice.com என்ற இணையதளத்தை சில ஆண்டுகளுக்கு முன் தொடங்கினார்.
அரிசி தானம் செய்யச்சொல்லி அதில் பிரசாரம் செய்தார். நன்கொடை தரச் சொன்னார். பசியால் வாடும் மனிதர்களின் நிலையைச் சொன்னார். அத்துடன் புதிய வித்தை ஒன்றையும் செய்தார். தன்னுடைய தளத்திற்கு வருபவர்கள் பசிக்கொடுமையை உணரவும், அதைப் போக்க தங்களால் ஆன உதவியை செய்ய தூண்டுதல் பெறவும் வித்தியாசமான ஒரு முயற்சியை மேற்கொண்டார்.
இந்த தளத்தின் முதல் பக்கத்தில் ஒரு வார்த்தை விளையாட்டு இடம் பெறுகிறது. அதில், ஆங்கில வார்த்தை ஒன்று தரப்படுகிறது. இதற்கான சரியான அர்த்தத்தை கீழே கொடுக்கப்பட்டுள்ள நான்கு பதில் வார்த்தைகளில் இருந்து எடுத்து ‘க்ளிக்’ செய்யவேண்டும். சரியான விடை என்றால் உங்கள சார்பாக 10 எண்ணிக்கை அரிசி நன்கொடையாக அளிக்கப்படும். இதற்காக நீங்கள் ஒரு பைசா கூட செலவழிக்க வேண்டியதில்லை. இதைத் தொடர்ந்து புதிய புதிய வார்த்தைகள் வந்துகொண்டே இருக்கும். உங்கள் சரியான விடைக்கு ஏற்ப நன்கொடையாகத் தரப்படும் அரிசியின் எண்ணிக்கை கூடிக்கொணடுச் செல்லும்.
இதன் மூலம் பசிக்கொடுமையை நாம் அறிந்துகொள்வதோடு நம்முடைய ஆங்கில அறிவையும் அதிகரித்துக்கொள்ளலாம்.
இந்த சேவை தளம் குறுகிய காலத்தில் மிகப்பெரிய வளர்ச்சியை அடைந்தது. இந்த தளம் மூலம் லட்சக்கணக்கான மக்களின் பசி பறந்தது. இதுவரை 74 பில்லியன் எண்ணிக்கை அளவிலான அரிசி தானமாக அளிக்கப்பட்டுள்ளது. தளத்தின் வெற்றியைத் தொடர்ந்து அதனை ஐ.நா., சபையின் உலக உணவுத் திட்டத்துடன் இணைத்து விட்டார் ஜான் பிரீன். இந்த தளம் மூலம் குவியும் அரிசி மூட்டைகளை ஐ.நா. சபை உலகமெங்கும் கொண்டு போய் சேர்க்கும்.
சமீபத்தில் பயங்கர நிலநடுக்கத்தால் கடுமையாகப் பாதிக்கப்பட்ட ஹெய்தி நாட்டு மக்களுக்கு உதவும்படி பிரசாரம் செய்து வருகிறது இந்தத் தளம். நீங்களும் சென்று கண்டு உங்களால் முடிந்த உதவியைச் செய்யுங்கள். யாரோ ஒருவரின் வயிற்றை நிரப்பிய புண்ணியம் கிடைக்கும்.
video:
Wednesday, 3 Feb 2010
அழகிகளுக்கெல்லாம் அழகி காட்ரீனா கைஃப்!
பிரபல பெண்கள் பத்திரிகையான ஃபெமினா இந்தியாவின் 50 அழகுப் பெண்கள் பட்டியலை வெளியிட்டுள்ளது. அந்த அழகிகள் பட்டியலில் முதல் இடத்தை இந்தி நடிகை காத்ரீனா கைஃப் கைப்பற்றியுள்ளார்.
பல்வேறு தளங்களில் எடுக்கப்பட்ட கருத்துக்கணிப்புகளில் காத்ரீனா கைஃப்புக்கே முதல் இடம் தரப்பட்டது. இவர், தன்னுடைய சக போட்டியாளர்களான பிரியங்கா சோப்ரா மற்றும் கரீனா கபூர் ஆகியோரை பின்னுக்குத் தள்ளி, முதல் அழகி இடத்தைப் பிடித்துள்ளார்.
இவர்களைத் தவிர, இந்த முதல் 50 அழகிகள் பட்டியலில் நடிகைகள் கல்கி கோசெலின், பிரீத்தி ஜிந்தா, பெண் எழுத்தாளர் ஜும்பா லகிரி, பேட்மிண்டன் வீராங்கனை சாய்னா நெக்வால், பிரியங்கா காந்தி ஆகியோரும் இடம் பிடித்துள்ளனர்.
Wednesday, 3 Feb 2010
காவல் பணிக்கு காசுப் பார்க்கும் நேபாள் நாய்!
நேபாள் நாட்டில் நாய் ஒன்று மாதச் சம்பளமாக ரூ. 1000 வாங்குகிறது. ஓவர்டைம் செய்தால் கூடுதல் சம்பளமும் பெறுகிறது. அதன் நன்றி விசுவாசத்திற்கும், காவல் காக்கும் தன்மைக்கும் இந்த சன்மானத்தை நேபாள் செஞ்சிலுவைச் சங்கம் வழங்குகிறது.
நேபாளின் கிழக்குப் பகுதியில் உள்ள ஜாபா மாவட்டத்தில் செஞ்சிலுவைச் சங்கத்தின் கிளை அலுவலகக் கட்டடம் உள்ளது. இந்த வளாகத்திற்கு கடந்த 2 வாரங்களுக்கு முன், காயம்பட்ட நிலையில் தெரு நாய் ஒன்று வந்தது. பின்னர் அங்கேயே நிரந்தரமாகத் தங்க ஆரம்பித்த அதை அடித்து விரட்டியும் போகவில்லை.
இரவு நேரத்தில் கட்டடத்தின் வாசலில் படுத்து காவல் புரியும் நாய், செஞ்சிலுவைச் சங்க பணியாளர்களைத் தவிர வேறு யாரையும் உள்ளே விடுவதில்லை. இதையடுத்து, அந்த நாயின் பராமரிப்புச் செலவிற்கு மாதம் ரூ.1000 ஒதுக்க முடிவு செய்தது செஞ்சிலுவைச் சங்க கிளை.
அதன்படி அந்த நாயின் விசுவாசம் மற்றும் காவல்பணிக்காக ஒதுக்கப்படும் இந்தப்பணம் நாயின் உணவு, மருத்துவ செலவுக்குப் பயன்படுத்தப்படும். அதன் கூடுதல் உழைப்பிற்காக வாரத்திற்கு இருமுறை மாமிச உணவு அளிக்கவும் ஏற்பாடு செய்யப்பட்டுள்ளது.
நேபாள் நாட்டில், நாயை கடவுளாக வணங்கும் வழக்கம் இருப்பது குறிப்பிடத்தக்கது.
Tuesday, 2 Feb 2010
சர்ச்சில் புகைத்து மிச்சம் வைத்த சுருட்டு ரூ.3.31 லட்சத்திற்கு ஏலம்
இங்கிலாந்தின் முன்னாள் பிரதமர் வின்ஸ்டன் சர்ச்சில் புகைத்து பாதியில் அணைத்த சுருட்டு ஒன்று ரூ. 3.31 லட்சத்திற்கு விற்கப்பட்டது.
69 வருடங்களுக்கு முன்னர் இங்கிலாந்தின் பிரதமராக இருந்த வின்ஸ்டன் சர்ச்சிலும் அவருடைய சுருட்டுப் புகைத்தலும் பிரபலமானவை. ஒரு போர் நேரத்தின்போது அவசரமாக கிளம்பிய சர்ச்சில் புகைத்துக்கொண்டிருந்த சுருட்டை பாதியில் அணைத்துவிட்டு சென்றுவிட்டார். அந்த பாதிச் சுருட்டின் இன்றைய மதிப்பு ரூ. 25 ஆயிரம் என கணிக்கப்பட்டிருந்தது. ஆனால், நம்ப முடியாத வகையில் ரூ.3.31 லட்சத்திற்கு விற்பனை ஆகியுள்ளது.
9.5சென்டிமீட்டர் நீளமுள்ள இந்த பாதி புகைத்த சுருட்டு, நார்போல்க் நகரில் உள்ள கீயிஸ் ஏல நிறுவனத்தால் ஏலம் விடப்பட்டது. இதை அரிய பொருள் சேகரிப்பாளர் ஒருவர் ஏலம் விடுவதற்காக இங்கே கொண்டுவந்திருந்தார்.
நவம்பரில் விடப்பட்ட ஒரு ஏலத்தில், சர்ச்சில் ஆஷ்ட்ரேவாக பயன்படுத்திய ஒரு வெண்ணெய் பேப்பர் யாரும் எதிர்பாராத வகையில் சுமார் ரூ.3 லட்சத்திற்கு விற்கப்பட்டது குறிப்பிடத்தக்கது.
Tuesday, 2 Feb 2010
9 வயதில் அம்மா ஆன சீனச் சிறுமி!
ஒன்பது வயதே ஆன சீனச் சிறுமி ஆண் குழந்தை பெற்றெடுத்திருக்கிறாள். பெரு நாட்டைச் சேர்ந்த ஒரு சிறுமி தான் மிகச் சிறிய வயதில் குழந்தை பெற்றவள் என்று சாதனை குறிப்புகள் கூறும் நிலையில் சீனச் சிறுமியின் பிரசவம் அங்கே பரபரப்பை கிளப்பியிருக்கிறது.
சீனாவில் உள்ள ஜிலின் மாகாணத்தில் இருக்கிறது சாங்சுன் மருத்துவமனை. ஜனவரி 25 ஆம் தேதி மாலை இந்த மருத்துவமனை வளாகத்தில் திடீர் பரபரப்பு ஏற்பட்டது. இதன் மகப்பேறு பிரிவில் ஒன்பது வயதான ஒரு சிறுமி 8.5 மாத கர்ப்பத்துடன் அனுமதிக்கப்பட்டாள். ஜனவரி 27 ஆம் தேதி செய்யப்பட்ட சிசேரியன் பிரசவத்தில் கிட்டத்தட்ட 3 கிலோ எடை உள்ள அழகான ஆண் குழந்தையை அந்தச் சிறுமி பெற்றெடுத்தாள்.
இச்சிறுமியின் பிரசவத்தை மருத்துவமனை நிர்வாகம் மறைக்கப் பார்த்தாலும் விஷயம் வெளியில் கசிந்துவிட்டது. அந்தச் சிறுமி சோங்கியான் என்ற பகுதியைச் சேர்ந்தவள் என்பதும் தெரியவந்துள்ளது. ஆனால் கர்ப்பத்திற்கு யார் காரணம் என்பது மட்டும் இன்னும் தெரியவரவில்லை.சீன நாட்டுச் சட்டப்படி 14 வயதுக்கு உட்பட்ட குழந்தைகள் கர்ப்பமானாலே அது கற்பழிப்புக் குற்றத்திற்குக் கீழேதான் வரும். அப்படியிருக்க 9 வயது பெண் குழந்தை பெற்றது அங்கே பரபரப்பை கிளப்பியிருக்கிறது.
9 வயதான பெண் கர்ப்பமாவதும், அவளுக்கு பிரசவம் எளிதாக நடந்து குழந்தை பெற்றெடுப்பதும் அரிதானவை. ஆயினும் அது சமுதாயத்திற்கு அவமானம்.
Monday, 1 Feb 2010
கள்ளக்காதலி மூலம் 20 ஆவது குழந்தை :
தென் ஆப்ரிக்க அதிபரின் பெருஞ்சாதனை
தென் ஆப்பிரிக்கா அதிபர் ஜேக்கப் ஜூமா(67) 20 ஆவது குழந்தைக்கு அப்பா ஆகியுள்ளார்.
இவருக்கு ஏற்கனவே 3 மனைவிகள் உள்ளனர். அவர்கள் மூலம் 19 குழந்தைகள் உள்ளன. இந்நிலையில் நண்பரின் பெண் உடன் ஏற்பட்ட தொடர்பால் 20 ஆவது குழந்தைக்கு தந்தையாகியுள்ளார் ஜேக்கப்.
உலகக்கோப்பை புட்பால் அமைப்புக் கமிட்டி தலைவர் ஜோசப் பிளாட்டர். இவர் அதிபரின் நண்பராவார். இவருடைய மகள் சோனானோ. இவருடன் அதிபர் தொடர்பு வைத்திருந்திருக்கிறார்.
39 வயது சோனானோ மூலம் ஒரு குழந்தைக்கு அப்பாவாக ஆசைப்பட்டிருக்கிறார் அதிபர் ஜேக்கப் . அதற்கு சோனானோவும் மறுப்புத் தெரிவிக்கவில்லை. இந்நிலையில் அவருக்கு கடந்த அக்டோபர் மாதம் பெண் குழந்தை ஒன்று பிறந்திருக்கிறது.
மூன்று மனைவிகள், சோனானோவுடன் கள்ளத்தொடர்பு போன்றவை போதாது என்று அதிபர் ஜேக்கப்புக்கு மேலும பல பெண்களுடன் தொடர்பு இருப்பதாகக் கூறப்படுகிறது. அவர்கள் மூலமும் அதிபருக்கு பல குழந்தைகள் இருப்பதாக வெளிநாட்டுப் பத்திரிகைகள் எழுதி எழுதி இவரை கிழிக்கின்றன. ஆனாலும் இவர் அடங்குவதாகத் தெரியவில்லை.
தென் ஆப்ரிக்க ஜூலு இன வழக்கப்படி கள்ளத்தொடர்பு மூலம் பிறக்கும் குழந்தைகளுக்கும், அந்த தாய்க்கும் ஜீவனாம்சம் தரவேண்டும். அதை நிர்ணயிக்க, அதிபர் நியமித்த குழு சோனானோ மற்றும் அவரது குடும்பத்தாருடன் பேரம் பேசியதாகச் செய்திகள் வெளியாகின.
பல தாரம் மணத்தை ஆதரிக்கும் அதிபர் ஜேக்கப், தாவோசில் நடந்த உலக பொருளாதார மாநாட்டில் பல பெண்களை மணப்பதற்கு ஆதரவு தெரிவித்துப் பேசினார்.அப்போது அவர், நாட்டுக்கு நாடு கலாசாரம் மாறுகிறது. ஒரு இடத்தில் தவறாகக் கருதப்படுவது மற்றொரு இடத்தில் ஏற்கப்படுகிறது என்றும் மற்ற நாடுகளின் கலாசாரத்தை நான் மதிக்கிறேன். ஆனால் ஒவ்வொருவரும் தங்கள் பழக்க வழக்கம் தான் சிறந்தது உயர்ந்தது என்று எண்ணுவதுதான் பிரச்னையே என்றார்.