ரூ.1.75 கோடிக்கு ஏலம் எடுக்கப்பட்ட மைக்கேல் ஜாக்சனின் கையுறை

மைக்கேல் ஜாக்சன் மறைந்துவிட்டாலும் அவர் பயன்படுத்திய பொருட்களின் மதிப்பு குறையவில்லை. அவருடைய கையுறை ஒன்று 1.75 கோடி ரூபாயிக்கு ஏலம் எடுக்கப்பட்டுள்ளது.

போதை மருந்துகளை அதிகம் உட்கொண்டதால் கடந்த ஜூன் மாதம் உயிர் நீத்தார் மைக்கேல் ஜாக்சன். இவர் பயன்படுத்திய பொருட்கள் நியூயார்க்கில் உள்ள ஜூலியன் ஏல மையத்தில் ஏலம் விடப்பட்டது. அவருடைய கையூறை ரூ.25 லட்சம் வரை ஏலம் போகும் என எதிர்பார்க்கப்பட்டது.

ஆனால், ஹாங்காங்கைச் சேர்ந்த பாஸ் மேன்  மா என்ற தொழிலதிபர்,  மைக்கேல் ஜாக்சனின் கையுறையை ஒரு கோடியே 75 லட்ச ரூபாய்க்கு ஏலம் எடுத்தார். மைக்கேல் ஜாக்சன் பயன்படுத்திய கருப்புநிற மேலாடை ஒன்று  ஒரு கோடியே 12 லட்ச ரூபாய்க்கு ஏலம் போனது. இந்த தொகை எதிர்பார்க்கப்பட்டதை விட 20 மடங்கு அதிகம் என்பது குறிப்பிடத்தக்கது.
 

நீயா நானா? : மரத்தோடு மோதிய க்ரேன் கவிழ்ந்து பாதியான வீடு

150 வருட ஓக் (20 அடி மிச்சமிருந்த) மரத்திற்கும் 90 அடி உயரமும், 50 டன் எடையும் கொண்ட க்ரேனுக்கும் நடந்த போட்டியில், க்ரேன் கவிழ்ந்து வீடு ஒன்று பாதியாகப் பிளந்தது.

கலிபோர்னியாவைச் சேர்ந்த கெவின் மற்றும் மிச்சேல் மெக்கார்த்தியின் வீட்டுக்குப் பின்புறம் தான்  அந்த ஓக் மரம் இருந்தது. அதை அப்புறப்படுத்த எண்ணிய அவர்கள்,க்ரேன் ஒன்றை வரவழைத்தனர். கொஞ்சம்,  கொஞ்சமாக வெட்டி சாய்ந்தப் பின் 20 அடி ஓக் மரத்தின்  மிச்சம் பூமியில் உறுதியாக நிலைத்திருந்தது. அதை வேரோடு பிடுங்கிவிடும் முயற்சியில் க்ரேன் ஈடுபட்டது. அந்த முயற்சியின்போது பாதியில் மரம் முறிய, க்ரேன் தள்ளாட்டத்துடன் கெவின் வீடு மீது கவிழ்ந்தது. வீடு சரிபாதியாக பிளந்து கொண்டது. அந்தரத்தில் தொங்கிக் கொண்டிருந்த க்ரேன் ஓட்டுநரை ஏணி வைத்துதான் இறக்கவேண்டியிருந்தது. இந்த விபத்தின்போது யாரும் வீட்டில் இல்லை என்பதால் உயிர்ப்பலி எதுவும் ஏற்படவில்லை.

மரத்தை அப்புறப்படுத்த செய்த முயற்சியில் வீட்டை பறிகொடுத்த கெவின் தம்பதிக்கு அன்றைக்கு சோதனையான நாள் போலிருக்கு. வெளியே சென்றிருந்த கெவினின் மனைவி மிச்சேல், விபத்து ஒன்றில் சிக்கி காவல் நிலையம் வரை சென்று புகார் அளித்துவிட்டு வீடு திரும்புகையில்  வீட்டையே பறிகொடுத்த சோகம் நடந்து முடிந்திருந்தது. ‘பட்டக் காலிலேயே படும்’ என்பது அமெரிக்க மக்களுக்கும் பொருந்தும் போலிருக்கிறது.

அன்பு பாராட்டினால்… நாய் சொல்லும் பாடம் : விடியோ

யூ ட்யூப்பின் லேட்டஸ்ட் ஹிட் இது. ஆப்கானிஸ்தானில் இருந்து வீடு திரும்பிய அமெரிக்க போர்வீரர் ஒருவரை, அவருடைய செல்ல நாய் அன்பு பொங்க, பொங்க வரவேற்ற காட்சி இது.

விர்ஜினியா, தேசிய விமானப்படையில் கேப்டனான ஆண்ட்ரு ஸ்கிமிட். கடந்த 2005 ஆம் ஆண்டு காந்தகாரில் உள்ள அமெரிக்க படையில் 5 மாதம் பணியாற்றிவிட்டு வீடு திரும்பினார்.

வீட்டு வாசலில் வந்துகொண்டிருந்தவரை கதவிடுக்கு வழியே பார்த்துவிட்ட இவருடைய செல்ல நாய் கிரேசி (Gracie) முதலில், யாரோ வந்திருக்கிறார்கள் என்று ஒரு முறைப்புடன் குரைக்க, அடுத்த நொடியே உணர்ந்துகொண்டு ஓடோடிச் சென்று அவர்மீது விழுந்து குலாவியது. அதன் அன்பு கண்டு மனம் நெகிழ்ந்து போய்விட்டார் ஆண்ட்ரு. இந்த விடியோவை அவருடைய மனைவி ஜென் படம் பிடித்தார்

இநத நெகிழ்வான நிகழ்ச்சியை ‘யூ ட்யூப்’பில் அப்போதே அரங்கேற்றிவிட்டார் ஜென். இருந்தாலும் படைவீரர்களின் நினைவு நாளை ஒட்டி, இந்த விடியோ காட்சி தற்போதுதான் சூப்பர் ஹிட் ஆகியுள்ளது.

தற்போது இதே காட்சியில் சில வார்த்தைளை சேர்த்து வெளியிட்டிருக்கிறார் ஜென்.

‘இந்த விடியோ காட்சியை, இரண்டு நாட்களுக்கு முன்பு 30 ஆயிரம் பேர் கண்டு மகிழ்ச்சி அடைந்திருக்கிறார்கள். கிரேசியின் இந்த அன்பு பாராட்டல் கிரேசியானது. கிரேசி தன்னுடைய செயல் மூலம் பல பேரை சந்தோஷப்படுத்தியிருக்கிறாள். நீங்களும் மகிழ்ச்சியடைந்தால் மிக்க மகிழ்ச்சி’ என்கின்றன அந்த வார்த்தைகள்.

விடியோ:

2011 இல் வருகிறது பறக்கும் கார்

ஜேம்ஸ்பாண்ட் படங்களில் வருவதுப் போல், பறக்கும் காரை நிஜத்தில் உருவாக்கி வருகிறது அமெரிக்காவைச் சேர்ந்த டெர்ராப்யூஜியா நிறுவனம். ரூ.1கோடி விலையுள்ள இந்தக் கார் 2011 ஆம் ஆண்டு விற்பனைக்கு வரும் எனத் தெரிகிறது.

டிரான்சிஷன் ரோடபிள் ஏர்கிராப்ட் எனப் பெயரிடப்பட்டுள்ள இக்கார் சாலையிலும் ஓடும். இறக்கையை விரித்தால் வானிலும் பறக்கும்.

தற்போது இதன் மாதிரி வடிவம் தயாரிக்கப்பட்டு, ஆராய்ச்சிகள் நடந்து வருகின்றன. இந்த  ஆராய்ச்சிகளின் அடுத்தக்கட்டமாக அமெரிக்க அரசின் அனுமதியோடு, 2011 இல் பறக்கும் கார் அறிமுகமாகுமாம்.

இதுபோன்ற சிறியரக பறக்கும் காரை ஓட்ட சாதாரண பைலட் உரிமம் போதுமானது. சாலையில் செல்லும்போது இதன் இறக்கைகளை மடிக்கலாம். வானில் பறக்கத் தயாராகும் போது, அடுத்த 30 விநாடிகளில் இறக்கையை விரித்துவிடலாம்.

பறக்கும் கார் என்றாலும் விமான நிலையத்தின் ஓடுபாதை வழியாகத்தான் இது பறக்கவேண்டும் என்பதால், விமான கட்டுப்பாட்டு அறையின் அனுமதியும் வேண்டும். விமான நிலையம் வரை சாலையில் ஓட்டிக்கொண்டு வரவேண்டும். பின்னர் விமான ஓடுபாதையில் ஓடி, வானில் பறக்கவேண்டும். அடையவேண்டிய இடம் வந்ததும் இறங்கி சாலையில் காராக மாற்றி ஓட்டிச் செல்லலாம். மோசமான வானிலையிலும் இந்த பறக்கும் காரில பறக்கலாம்.

பாடகி ஓக்ஸானா மூலம் எட்டாவது குழந்தைக்கு அப்பாவான  மெல் கிப்ஸன்

பாடகி ஓக்ஸானா மூலம் எட்டாவது குழந்தைக்கு அப்பாவானார் மெல் கிப்ஸன்

ஆக்டோபஸ் போல ஆக்டோ - மெல் ஆகிவிட்டார் பிரபல ஹாலிவுட் நடிகர் மெல் கிப்சன். ஆமாங்க  புதிய காதலி மூலம் எட்டாவது குழந்தைக்கு தந்தையாகி விட்டார் மெல் கிப்சன்.

ரஷ்ய பாடகியான ஓன்ஸானா க்ரிகோரீவா தான் இவருடைய புதிய காதலி. நிறைமாத கர்ப்பிணியாக  இருந்த இவருக்கு டிசம்பர் மாதம் பிரசவ நாள் குறிக்கப்பட்டிருந்தது. ஆனால், அக்டோபர் 30 ஆம் தேதி அன்றே பெண் குழந்தையைப் பெற்றெடுத்துவிட்டார். குழந்தைக்கு லூசியா எனப் பெயர் வைத்துள்ளனர்.

54 வயது மெல்கிப்சனுக்கு, விவாகரத்துக்கு விண்ணப்பித்துள்ள முதல் மனைவி ரோபின் மூலம் ஏழு குழந்தைகள் உண்டு. இதில் ஒரு மகள், ஆறு மகன்கள். இரண்டு பேரக் குழந்தைகளும் உண்டு. இப்போது (வெளியே)எட்டாவது குழந்தை.

முதல் மனைவி விவாகரத்துக்கு விண்ணப்பித்ததைத் தொடர்ந்து ஓக்ஸானாவுடன் வெளிப்படையாகத் திரியத் தொடங்கினார் மெல் கிப்சன். தனக்கு, ஓக்ஸானா மூலம் பெண் குழந்தை பிறக்கப் போவதை அவரே அவர் வாயால், தொலைக்காட்சி ஒன்றில் ஒப்புக்கொண்டிருந்தார் மெல் கிப்சன்.

அந்த பேட்டியில் அவர், தன்னுடைய மனைவியும் தானும் ஏற்கனவே மூன்று வருடங்களாக பிரிந்துதான் இருப்பதாகக் கூறியவர், எட்டாவது குழந்தைக்கு தகப்பன் ஆவதை குறிக்கும் வகையில் ‘நான்தான் ஆக்டோ - மெல்’ என்றாரே பார்க்கலாம்.

பாடகி ஓக்ஸானாவைப் பொறுத்தவரை லூசியா இரண்டாவது குழந்தை. ஏற்கனவே இவருக்கு, ஜேம்ஸ் பாண்ட் புகழ் திமோத்தி டால்டன் மூலம் பிறந்த 12 வயது குழந்தை இருக்கிறது.

கிடைக்கிற சந்தில் நுழைந்துவிடுகிற எலிபோல, ஐய்யோ…யாரும் லேசுப்பட்டவர்கள் கிடையாது போலிருக்கு.

உலகின் சக்திவாய்ந்த நபர் ஒமாபா: போர்ப்ஸ் முடிவு

போர்ப்ஸ் பத்திரிகை வெளியிட்டுள்ள உலகின் மிக சக்திவாய்ந்த நபர்கள் பட்டியலில், அமெரிக்க அதிபர் ஒபாமா முதலிடம் பெற்றுள்ளார். இந்த பட்டியலில் அல் - குவைதா தலைவர் ஒசாமா பின்லேடன் மற்றும் பிரபல “டிவி’ டாக் ஷோ வழங்குநர் ஒபாரா வின்ப்ரே ஆகியோரும் இடம்பெற்றுள்ளனர்.

இந்த தரவரிசை பட்டியலை தொகுத்ததின் முக்கிய நோக்கம் அவர்களின் அதிகாரத்தை வெளிக்காட்டுவது. உலகளவிலான தலைவர்கள் மற்றும் தொழிலதிபர்கள் முதல் பத்து இடத்தை பிடித்துள்ளனர். ஒருவர் தங்களின் அதிகாரத்தை செயல்படுத்தும் விதம், அவருக்கு இருக்கும் செல்வாக்கு, நிதி வளங்களை கட்டுப்படுத்தும் திறன் மற்றும் எவ்வளவு சுறுசுறுப்பாக தங்கள் அதிகாரங்களை பயன்படுத்துகின்றனர் ஆகியவற்றை அடிப்படையாகக் கொண்டே, இந்த தரவரிசை பட்டியல் தொகுக்கப்பட்டுள்ளது என போர்ப்ஸ் பத்திரிகை கூறியுள்ளது

இந்த பட்டியலில், அமெரிக்க அதிபர் ஒபாமா முதல் இடத்திலும், சீன அதிபர் ஹூ ஜிண்டாவோ இரண்டாவது இடத்திலும், ரஷ்ய பிரதமர் விளாடிமிர் புடின் மூன்றாவது இடத்திலும், அமெரிக்க பெடரல் ரிசர்வ் தலைவர் பென் பெர்னான்கே நான்காவது இடத்திலும், கூகுள் நிறுவனர்கள் செர்ஜே பிரின் மற்றும் லாரி பேஜ் இருவரும் ஐந்தாவது இடத்திலும் உள்ளனர்.

இதில், கோடீஸ்வரர் மற்றும் முதலீட்டாளரான வாரன் பபே 14வது இடத்திலும், போப் பெனடிக்ட் 11வது இடத்திலும், உள்ளனர். பிரிட்டன் பிரதமர் கார்டன் பிரவுன் 29வது இடத்திலும், அல் - குவைதா தலைவர் ஒசாமா பின்லேடன் 37வது இடத்திலும், பிரபல ‘டிவி’ டாக் ஷோ வழங்குநர் ஒபாரா வின்ப்ரே 45வது இடத்திலும் உள்ளனர்.

இருவாரத்தில் 1,32,000 தும்மல் போட்ட அமெரிக்க சிறுமி; நிறுத்த முடியாமல் அவதி

பனிரெண்டு வயது அமெரிக்க சிறுமி தொடர்ந்து வந்துகொண்டே இருக்கும் தும்மலை நிறுத்த முடியாமல் அவதிப்பட்டு வருகிறாள். தன்னுடைய சோகத்தை இவள் தொலைக்காட்சி ஒன்றில் கூறி (கதறி), தும்மலை நிறுத்த ஆலோசனைக் கேட்டாள்.

அமெரிக்க விர்ஜினியா நகரைச் சேர்ந்தவள் லாரன் ஜான்சன். 12 வயது சிறுமியான இவள் நாசியில் இருந்து நிமிடத்துக்கு 12 முறை வீதம் சீறி வருகிறதாம் தும்மல். நவம்பர் 1ஆம் தேதி திடீரென துவங்கிய இந்த தும்மல் நிற்காமல் தொடர்கிறது. இந்த இருவாரங்களில் 1,32,000 தும்மல்களைப் போட்டு சோக  சாதனை செய்திருக்கிறாள் இந்த சிறுமி.

ABC தொலைக்காட்சியின் ‘குட்மார்னிங் அமெரிக்கா’ நிகழ்ச்சியில் பங்கெடுத்த இந்த சிறுமி, தன்னுடைய பிரச்னை குறித்து கூறிக்கொண்டிருக்கும்போதே (நான்கு நிமிட பேட்டியில்) 63 தும்மல்கள் போட்டுவிட்டாள். யாராவது உதவுங்களேன் என்று அவள் கண்கள் கலங்க கூறிய காட்சி நம்மையும்  கலங்க வைக்கும்.

‘ஆழ்ந்து உறங்கும் நேரம தவிர மற்ற நேரமெல்லாம் தும்மலோ தும்மல்’ என்று  துக்கமாகச் சொல்லியிருக்கிறாள்.

மகளின் தும்மல் துக்கத்தைக் கண்டு பொறுக்க மாட்டாத தாய் லின் ஜான்சன் இதுவரை ஆறு மருத்துவர்களைப் பார்த்திருக்கிறார். அதில் காது, மூக்கு, தொண்டை நிபுணர்களும் அடக்கம். 11 விதமான மருந்துகளையும் கொடுத்து பார்த்தாயிற்று . தும்மல், லாரன் ஜான்சனை துரத்துவதை விடுவதாக இல்லை.

“மருத்துவர்களுக்கே இது ஆச்சர்யமாக இருக்கிறது. இந்த தும்மலை நிறுத்தும் வழி எந்த மருத்துவருக்கும் தெரியவில்லை. மருந்துகள் தீவிரமாக வேலை செய்யும்போது வராத தும்மல் மருந்தின் தீவிரம் குறைந்ததும் மீண்டும் வந்துவிடுகிறது” என்று புலம்புகிறார் தாய்

இந்த தொடர் தும்மல் மற்றவர்களையும் தொந்தரவு செய்யும் என்பதால் பள்ளிக்குச் செல்லாமல் வீட்டிலேயே முடங்கிக்கிடக்கிறாள் லாரன் ஜான்சன்.

லாரன் ஜான்சனுக்கு ஏற்பட்டிருப்பது இது அரிய வகை அலர்ஜியாக இருக்கலாம் அல்லது அவள் சைக்கோசோமேட்டிக் நோயால் பாதிக்கப்பட்டிருக்கலாம் என்கிறார்கள் மருத்துவர்கள். இதை ‘மெஷின்கன் ஸ்னிசிங்’ என்று அலர்ஜி மருத்துவர்கள் குறிப்பிடுகிறார்கள். ஆயினும் லாரன் ஜான்சனுக்கு  ஏற்பட்டிருப்பது அரியவகை அலர்ஜி என்றும், அதனால் பாதிக்கப்பட்டவர்கள் உலகில் 40 பேர் மட்டுமே உள்ளனர் என்றும் அவர்களுக்கும் இந்த பிரச்னை தீர்ந்தபாடில்லை என்கிறார்கள்.

ரயில் விபத்தில் இருந்து மயிரிழையில் உயிர் தப்பிய குடிகாரி: விடியோ

கடந்த 6ஆம் தேதி, அமெரிக்காவில் உள்ள பாஸ்டன் நகர ரயில் மேடை, தள்ளாடியபடி வந்த குடிகாரப் பெண் (26) ஒருத்தி ரயில் வருகிறதா என்று எட்டிப்பார்க்க, நிலை தவறி தண்டவாளத்தில் விழுந்துவிட்டாள். எழ முயற்சித்தவளை உள்ளே போயிருந்த பானம் எழ விடாமல் செய்துவிட்டது. தண்டவாளத்தில் அப்படியே கவிழ்ந்துவிட்டாள். இதை கவனித்த இதர ரயில் பயணிகள், படுவேகத்தில் வந்துகொண்டிருந்த ரயிலை நிறுத்தச் சொல்லி கையை காட்டினர். ரயில் ஓட்டுநர் சாரிஸ் லெவிஸ் சாதுர்யமாக அவசர பிரேக் போட்டு ரயிலை நிறுத்தினார். தண்டவாளத்தில் படுத்திருந்த அந்தப் பெண்ணுக்கு சற்று முன்பாக ரயில் நின்றது. மயிரிழையில் உயிர் தப்பினாள் அந்தக் குடிகாரப் பெண் .
விடியோ:

உலகின் மிகப்பெரிய ரப்பர் பாண்ட் பந்தை வாங்கியது ரிப்ளை நிறுவனம்

ரப்பர் பாண்டு விழுந்து கால் விரல் நசுங்குமா? குளிர்க் கண்ணாடி உடையுமா? ஜீன்ஸ் பேண்ட் கிழியுமா? இவை எல்லாம் நடந்தது ப்ளோரிடாவைச்  சேர்ந்த ஜியோல் வாவ்லுக்கு. எப்படி தெரியுமா உலக சாதனை நிகழ்த்த வேண்டி அவர் தயாரித்து மிகப்பெரிய ரப்பர் பாண்டு பந்தால்.

ரிப்ளைவின் ‘நம்பினால் நம்புங்கள்’ நிகழ்ச்சியைப் பார்த்தப் பின்னர் தான் இந்த சாதனையை நிகழ்த்தும் ஆசை ஜியோல் வாவ்லுக்கு  வந்ததாம்.

ஆறு வருடங்களுக்கு முன்பு தனது எண்ணத்திற்கு வடிவம் கொடுக்க துவங்கியிருக்கிறார். முதலில் சின்ன பாண்டுகளை இணைத்து சின்ன பந்து உருவாக்கிறார் அதற்கு மேலாக மேலும் பாண்டுகள். இப்படியே  சுற்றிச்சுற்றி பெரிய பந்தை உருவாக்கிவிட்டார் ஜோயல். வீட்டில் இடமில்லாததால் வெளியே வைத்து இன்னும் பெரிதாக்கினார். ரப்பர் தயாரிப்பு நிறுவனங்களுக்கு போன் போட்டு, தன்னுடைய சாதனை ஆசையை ஜோயல் சொல்ல, அந்நிறுவனங்களும் மிகப்பெரிய பாண்டுகளை ஸ்பெஷலாக தயாரித்து  அவர் வீட்டுக்கு இலவசமாக அனுப்பி வைத்தன.

படிப்படியாக உருவான இந்த ரப்பர் பாண்ட் பந்து ஒரு கட்டத்தில் 2 மீட்டர் உயரத்தில், 4100 கிலோ எடை கொண்டதாக உருவாகி விட்டது. அக்கம் பக்கம் உள்ளவர்கள் கவனித்ததை கின்னஸ் சாதனை நிறுவனமும் கவனித்தது. உலகின் மிகப்பெரிய ரப்பர் பாண்ட் பந்து என 2008 ல் சான்றிதழ் கொடுத்துவிட்டது. இதற்கு முன்னர் செய்யப்பட்டதை விட ஜோயலின் பந்து 7.2 மீட்டர் சுற்றளவு பெரிதாம்.

28 வயதான ஜோயல் 6 வருடங்கள் இரவு பகல் பாராமால் உருவாக்கிய இந்த ரப்பர்பாண்ட் பந்தை, இதை உருவாக்க காரணமாக இருந்த ரிப்ளை நிறுவனமே நல்ல விலை கொடுத்து வாங்கிக் கொண்டிருக்கிறது. விரைவில் இது ரிப்ளேவின் கலைக்கூடத்தில், பொதுமக்கள் பார்வைக்கு வைக்கப்பட உள்ளது.

சொகுசு ஓட்டலும் கொடுத்து வைத்த நாய்களும்!

கலிஃபோர்னியாவில் உள்ள ‘கேன்யான் வியூ ரான்ச் ரிசார்ட்’டில் தங்க வேண்டுமானால் புசுபுசுவென தோல் வேண்டும். குழையும் வால் வேண்டும். குறிப்பாக, நான்கு கால்கள் இருக்கவேண்டும். இப்ப புரிந்து கொண்டிருப்பீர்களே… இந்த ரிசார்ட்டுக்குள் நுழைய வேண்டுமானால் நாயாக இருக்க வேண்டும் மேலும், ஹாலிவுட் நட்சத்திரங்களின் ஆதர்ச செல்ல நாயாக இருக்கவேண்டும். அப்பதான் செலவும் கட்டுப்படியாகும்.

டிஸ்னி லேண்டு பாணியில், ஐந்து நட்சத்திர தகுதியுடன் அமைக்கப்பட்டுள்ளது நாய்களுக்கான இந்த ரிசார்ட்.

சில்வஸ்டர் ஸ்டலோன், ஜெனிபர் லோபஸ், ட்ரூ பேரிமோர் போன்ற ஹாலிவுட் நட்சத்திரங்கள் படப்பிடிப்பிலோ, விடுமுறைக்கால சுற்றுப்பயணத்திலோ இருந்தால், தங்கள் செல்ல நாய்களை இந்த ரிசார்ட்டில் விட்டுச் செல்கிறார்கள். அவர்கள் திரும்பி வரும்வரை செல்ல நாய்கள் இங்கே சொகுசாக காலம் கழிக்கின்றன.

பெரிய வீட்டு விருந்தாளிகள் அல்லவா, இவை பகலில் ஓய்வெடுக்க பனை மர நிழலில் இருந்து சின்ன சின்ன குகைகள் வரை இருக்கிறது. அழகாக வெட்டப்பட்ட புல்வெளிகளில் இவை புரண்டு புரண்டு முதுகு சொறியலாம். எலும்பு போன்ற வடிவிலான நீச்சல் குளங்களில் நீச்சல் அடிக்கலாம்.
நாய்களின் குணாதியப்படி அல்லது அவற்றின் டயட்டின்படி உணவு விநியோகிக்கப்படும். கூப்பிட்ட ‘லொள் லொள்ளு’ க்கு ஓடோடி வந்து சேவை செய்ய 24 மணிநேரமும் பணியாளர்கள் உண்டு. குட்டிகள் விளையா வொண்டர் லேண்ட் பாணியில் அதிசய விளையாட்டுக்களும் நிறைந்திருக்கிறது இங்கே.
குரைக்கும்போது குரல் ஈனஸ்வரத்தில ஒலித்தால், உடம்புக்கு என்ன, ஏது நஎன்று பார்க்க சிறப்பு மருத்துவர்களும் தயாராக இருக்கிறார்கள்.

பகலெல்லாம் ஆட்டம் பாட்டம் முடிந்ததும் இரவு உறங்கவேண்டாமா? அதற்கேற்ப சொகுசான அறையில் சிறப்பு குகைகளும் உருவாக்கப்பட்டுள்ளன. இவை இப்படி ஜாலியாக தங்கள் பொழுதைப்போக்க ஒரு நாளைக்கு ரூ.1500 ஆகும். தங்கள் எஜமானர்கள் வந்து அழைத்துச் செல்லும்வரை இப்படி உண்டு, விளையாடி, உறங்குவதுதான் இவற்றின் வேலை.

நாய்களுக்கான இந்த ரிசார்ட்டை பத்து வருடங்களுக்கு முன்பே தொடங்கிவிட்டார், நாய்களுக்கான பயிற்சியாளர் ஜோ டிம்கோ. இவருடன் ரேண்டி நீஸ் என்பவரும் கைகோர்த்து செயல்படுகிறார்.

ம்ம்ம்… கொடுத்து வைத்த நாய்கள்!