» Politician illogical arguments

Friday, 3 Sep 2010

பொருந்தா வாதம் செய்யும் பெருந் தலைவர்கள்!

சென்னையில் ஸ்ரீபெரும்புதூர் அருகே இரண்டாவது விமான நிலையம் (கிரீன் ஃபீல்ட்) அமைப்பது பற்றிய கருத்துப் பரிமாற்றங்களில் தமிழகத்தின் மூத்த தலைவர்கள் தீவிரமாக ஈடுபட்டுள்ளனர்.

2007இல் பேசப்பட்ட இந்த ஆரம்பகட்டப் பேச்சுகள் இப்போதுதான் மண் ஆய்வு என்கிற கட்டத்திற்கு வந்திருக்கிறது.

ஆனால் கர்நாடகமும் ஆந்திராவும் முந்திக் கொண்டு கிரீன்ஃபீல்டு விமானநிலையங்கள் உருவாக்கிச் செயல்படுத்திவிட்டன. இவற்றுள் பெங்களூரின் புதிய விமான நிலையத்தைப் பார்க்க நேர்ந்தபோது மிகவும் ஏக்கமாகிவிட்டது. கையில் காசு இல்லாத பையன் திருவிழா மிட்டாய்க் கடையின் வாசலில் ஏக்கத்தோடு நிற்பானே, இதற்கு இதை ஒப்பிடலாம்.

இதற்குத் தடையாக இருப்பவர்கள் வெளிமாநிலத்தவரா என்றால், இல்லை. எதிர்க்கட்சித் தலைவர் ஜெயலலிதாவே இதற்கு எதிர்ப்பாக இருக்கிறார்.

கருணாநிதி அறிவித்த தரிசுநிலங்களை விமான நிலையத்திற்குத் தரட்டும்; ஸ்ரீபெரும்புதூரை ஒட்டிய நிலைகளைக் கையகப்படுத்தினால் வீடுகள், விளை நிலங்கள், பள்ளிகள் வழிபாட்டுத் தலங்கள் பறிபோகும். எனவே இதுகூடாது. இது நடந்தால் போராட்டம்தான் என்கிறார். ஜெயலலிதா, இது ஒரு பொருந்தா வாதமே. 4821 ஏக்கர் நிலத்தைக் கையகப்படுத்தினால் விவசாயம் இருண்ட போய்விடுமா என்ன? நாட்டின் நலனின் முன்னே இவை பெரிய இழப்பாகுமா என்ன? எவ்வளவோ இலட்சம் மக்களின் நன்மையைக் கருத்தில் கொண்டால் சிறு பகுதியினரின் சேதம் பெரிதா என்ன?

மருத்தவர் ராமதாஸ் சற்றுப் பரவாயில்லை. மகாராஷ்டிராவில் ரிலையன்ஸ் நிறுவனத்தை ஆரம்பிக்க நிலம் கையகப்படுத்தப்பட இருந்தபோது மக்களின் கருத்துக் கணிப்பை ஏற்று அது கைவிடப்பட்டதே, அதே பாணியில் மக்களின் கருத்தை அறியுங்கள் என்கிறார். இதுவும் ஓர் ஆகாத வேலையே, பாதிக்கப்பட இருக்கும் மக்கள் ஒருவரும் இந்தா எங்கள் நிலம் என்று ஒருபோதும் சொல்லப்போவது இல்லை. நாட்டுப்பற்று மிகுந்த ஜப்பானிலேயேகூட புதிய விமான நிலையங்களுக்கும், பழைய விமான நிலையங்களில் விரிவாக்கத்திற்கும் எதிர்ப்புப் போராட்டம் நடத்தியிருக்கிறார்கள்.

தங்கள் சொத்து பறிபோகிறது என்றால் எதிர்க்கவே செய்வார்கள். ஒரு தனியார் நிறுவனத்தின் தொழிற்சாலை போன்றதா ஒரு மாநிலத்தின் விமான நிலையம்? பொருந்தாத வாதமிது.

மத்திய அரசு இத்திட்டத்தைக் கைவிட வெகு நாள் ஆகாது. நீங்கள் அடித்து முடித்துக் கொண்டு வாருங்கள். இப்போதைக்குக் கைிவட்டு விட்டு வேறுமாநிலத்தில் கவனத்தைச் செலுத்துகிறோம் என்று சுலபமாகச் சொல்லவிடும்.

இதனால் பாதிக்கப்பட இருப்பது தமிழகத்தின் வளர்ச்சியே.

ம்! ஒரு மாநிலத்திற்கு நல்ல முதல்வர் மட்டுமல்ல, நல்ல எதிர்க்கட்சித் தலைவர்களும் வாய்க்க நல்ல கொடுப்பினை வேண்டும் என்பது இப்போதுதான் புரிகிறது!

லேனாவின் பார்வையில் முந்தைய கட்டுரைகள்

2010/08/27 எக்காளமிடும் எதிர்க் கட்சித் தலைவி!

2010/08/20 ஏங்க வைக்கும் ஆட்சியர்

2010/08/13 வடிகட்டப்பட்ட கருத்து!

2010/08/06 அடித்தளத்தில் செலுத்த வேண்டிய கவனம்!

2010/07/30 விடிகிறபோது விடியட்டும்!

2010/07/23 தமிழ் வழிப் பொறியியல்: மூன்று கேள்விகள்!

2010/07/16 பாதி நன்றியைப் பகிர்ந்து கொள்வோம்!

2010/07/09 தூவப்பட்டிருக்கும் விதைகள்

2010/07/02 அரைக் கிணறு தாண்டினால் போதுமா?