ஐவண்ணம், போரூர்.

குழந்தை பெற்றுக் கொள்ளாமல இருப்பதே மகிழ்ச்சியான வாழ்க்கை என்ற என் கருத்து பற்றி?

உங்களுக்கு நான் வக்காலத்து வர மாட்டேன். நாளைக்கு நம்மை முதியோர் இல்லத்தில் சேர்த்தாலும் இன்றைக்கு ஷோகேஸ் மாதிரி இருக்கும் வீட்டிற்குத் சொந்தம் கொண்டாடி ஒரு ‘ஷோகாஸ்’ வராதபடிக்கு ஒரு பிள்ளையாவது நமக்கு வேண்டும்.

என்.குமாரவேல், திண்டுக்கல்.

அழகிப் போட்டியை நீங்கள் ஆதரிக்கிறீர்களா?

ஆப்பிளைச் சாப்பிட்ட போதுதான் ஏவாளுக்கே மானத்தைப் பற்றித் தெரிய வந்ததாம். நமது அழகிகள் ஒரு ஆப்பிள் கூடவா சாப்பிட்டு இருக்க மாட்டார்கள்.

சி.ராமதாஸ், தஞ்சாவூர்.

டாஸ்மாக் சரக்கில் தண்ணீர் கலந்து விற்கிறார்களாமே?

தண்ணிக்குள் தண்ணீரா? தமிழன் முதல் முறையாகத் தமிழனுக்கு நன்மை செய்ய ஆரம்பித்திருக்கிறான். வரவேற்கிறேன்.

கே.கிருஷ்ணன், தூத்துக்குடி.

தமிழக மின் கட்டண உயர்வால் பாதிப்பில்லை என்கிறாரே கலைஞர்?

அரசியல் விழாக்களுக்குக் கொக்கி போடாமல் இருந்தாலே இந்த கொக்கி தேவைப்படாது. அவ்வளவு மின் திருட்டு. அதனால்தான் இந்த வாரியத்தில் அவ்வளவு இருட்டு.

எம்.சேகர், உடுமலை.

நமது எம்.பி.க்களின் சம்பளம் பல மடங்காகக் கூடிப் போயிருக்கிறதே?

இப்போதே அவர்களை சென்னை பிர்லா கோளரங்கத்திலுள்ள டெலஸ்கோப் மூலம் பார்க்க வேண்டியிருக்கு. இனி அவர்களைப் பார்ப்பது மகாக் கடினம்தான்.

ஆத்மநாதன், சென்னை.

விலைவாசிகள் எப்படியிருக்கு?

அது பற்றிப் பாதிக்கப்பட்டவர்களைத் தவிர வேறு யார் கவலைப்பட்டார்கள்? செம்மொழி மாநாட்டுக்குப் பின் தமிழக மக்கள் தேவர்களாகிவிட்டார்கள். அவர்களுக்கு இப்போது பசியென்பது இல்லை.

எஸ்.சரவணன், மதுராந்தகம்.

உமாசங்கர் ஐ.ஏ.எஸ்.?

இவர் விஷயத்தில் ஆப்பு அசைத்த குரங்காகிவிட்டது அரசு! திருடனுக்கு தேள் கொட்டின கதை என்பார்களே, அது இப்போது நடந்து கொண்டிருக்கிறது. உமாசங்கர் ஒர் அரிய அதிகாரி. இவரது அருமையை இந்த மண் உணரவில்லை.

எம்.சூர்யா, சென்னை-72.

உங்களுக்கு சுய விளம்பரம் பிடிக்குமா?

பிடிக்கும். இங்குள்ள சில தலைவர்களைப் போல அல்ல. அந்த சில தலைவர்கள் எங்கேயோ இருக்கிறார்கள். தூக்கத்திலும் சிவபுராணம் மாதிரி அவர்கள் சுயபுராணம் படிக்கிறார்கள். எனக்கு சிவபுராணமே வராது; அப்புறமல்லவா சுயபுராணம்?

ஏ.இளங்கோ, விழுப்புரம்.

அரசு ஊழியர்களின் வாரிசுகள் தமிழில் படிக்கச் சட்டம் இயற்ற வேண்டும் என்கிறாரே ராமகோபாலன்?

முன்பு சமயவாதிகள்தான் தமிழை வளர்த்தார்கள். அப்படி இவரும் வளர்க்கலாம். ஒருவேளை அமைச்சர்களின் வாரிசுகளைச் சொல்கிறாரா? இவர்களும் அரசு ஊழியர்கள்தானே?

எஸ்.அறிவழகன், பம்மல்.

பெங்களூருவின் விதான் செளதாவைக் கண்டு வியந்தது உண்டா?

உண்டு. ஆனால் இப்போது அது சட்டசபையல்ல. போனமாதமே அது போர்டிங் அண்ட் லாட்ஜிங்காகிவிட்டது. பேசாமல் அதன் பெயரை உடுப்பி செளதா என்றோ அல்லது விதான் கபே என்றோ பெயர் மாற்றம் செய்யலாம். பொருத்தமாக இருக்கும்.

என்.மகாலிங்கம், பாளையங்கோட்டை.

இந்தியா வல்லரசாகுமா?

இப்போதே தாதாக்கள் ஆட்சிதான் பல மாநிலங்களிலும் இருக்கு. எனவே இந்தியா ஒரு நல்லரசாக வேண்டும் என்று வேண்டிக் கொள்வோம்! அதுதான் இன்றையத் தேவை.

எஸ்.சதீஷ், திருமங்கலம்.

வக்கீல் தொழிலில் இன்று சிவில் நல்லதா? கிரிமினல் நல்லதா?

சிவிலோ, கிரிமினலோ இரண்டிலும் வாய்தாதான் நல்லது. வாய்தா வக்கீல்களுக்குத்தான் இன்று வாழ்க்கை பிரகாசமாக இருக்கு.

இ.செல்வராஜ், திண்டுக்கல்.

அரசியல் கட்சிகள் எப்போதும் ஆர்ப்பாட்டங்களை நடத்திக் கொண்டேயிருப்பது ஏன்?

அவர்களுக்கான அடையாள அட்டைகளே இந்த ஆர்ப்பாட்டங்கள்தான். இந்த அட்டைகள் மட்டும் தொலைத்தால் அவர்களை மக்கள் மறந்துவிடுவார்களாம். இது தி.மு.க. கண்டுபிடிக்க ஃபார்முலா!

ஜே. ரகு, பனப்பாக்கம்.

உங்களுக்கு மொட்டைக் கடிதங்கள் வருவதுண்டா?

கலகண்டிற்குத் திருப்பதியில் வாசகர்கள் உண்டு. ஆனால் திருப்பதி வாசகர்கள் எனக்கு எவருமில்லை!

ஆர்.ஜோதி, திருத்தணி.

கவலை இல்லாத மனிதன் யார்?

இலவச டி.வி. இலவச கியாஸ், இலவச அடுப்பு, இலவச அரிசி வைத்திருப்பவர்களுக்குக் கவலை இல்லை என நினைத்திருந்தேன். ஆனால் அவர்களுக்கும் கவலை இருக்கு. இலவச புடவை, இலவச வேட்டி எப்போது வருமென்று கேட்கிறார்கள்?

ஆர்.ரவி, அசோக் நகர்.

டாஸ்மாக் பணியாளர்கள் ஒரு நாள் வேலை நிறுத்தம் செய்து சாதித்துவிட்டார்களே?

யானைப் பசிக்குச் சோளப் பொறி! பாஸ்மாக்குக்குப் பாஸ் மார்க் கிடைக்கலை. பெயிலாகிவிட்டார்கள். அரசு பாஸாகிவிட்டது.

ஆர்.ராகவன், சென்னை-92.

சுதந்திர தினக் கொண்டாட்டங்கள் பழைய கோட்டையிலேயே நடத்தப்பட்டது ஏன்?

என்ன இருந்தாலும் அந்த வெள்ளைக்காரன் கட்டடம்தான் கம்பீரமாய் இருக்கு. நமக்கு புதிய கட்டடம் எதற்கு? அணு உலை மாதிரி இருக்கு. அணு உலைக்கு எதிரில் அணிவகுப்பு நடத்தினால் நன்றாய் இருக்காது.

ஜி.சுந்தர், வேலூர்.

மனைவியை ஒரு சிலர் திட்டமாட்டேன்கிறார்களே?

அவர்கள் (திட்டுவதை) நிறுத்தினால்தான் இவர்கள் தொடர முடியும்? அவர்கள் தொடர்ந்தபடி இருக்கிறார்களே!

கே.சந்தானம், பல்லாவரம்.

தி.மு.க. கூட்டணியில் பா.ம.க.விற்கு எத்தனை சீட்டுகள் கிடைக்கும்?

பிள்ளையாருக்கே பொரி கடலை கேள்விக்குறி! அதற்குள் புகாரியின் பூரிக்கிழங்குக்குப் போய்விட்டீர்களே!

எம்.முத்து, திருவண்ணாமலை.

அ.தி.மு.க. மிகச் சிறிய கட்சிகளையும் இப்போது அணைத்துச் செல்கிறதே?

அ.தி.மு.க.விற்கு கட்ட பழங்களும் இப்போது தேவைப்படுகின்றன. அதனால்தான் மண்ணில் விழுந்த பழங்களையும் அது எடுத்து எடுத்து ஊதிச் சாப்பிடுகிறது.

வி.செந்தில்நாதன், மேட்டுப்பாளையம்.

தலைமைச் செயலக ரேஷன் கடையில் மதுபாட்டில்கள் அடுக்கி வைக்கப்பட்டிருந்தாமே?

அடடே! பாட்டில்களும் இப்போது அத்தியாவசியப் பண்டமாகிவிட்டன போலும்!

எம்.அஜீத், கடலூர்.

மருத்துவக் கல்லூரிகளில் நுழைந்து பெயர் கெடாமல் பேசிவிட்டு வரமுடியுமா?

மனக்காயங்கள்கூட இல்லாமலா? கடினம்தான்! காயங்களும் மருந்து இடவேண்டிய இடத்திலா இப்படி?

எஸ்.பிரபா, சென்னை-6.

காங்கிரசாரின் இப்போதைய யோசனை?

வாலி யாரோடு சேர்த்தாலும் சேர்கிறவர்கள் பலத்தில் பாதி பலம் வாலிக்கு வந்துவிடுமாமம். அந்த வகையில் இவர்கள் கனவெல்லாம் இப்போது நாங்கள் ஒரு இராமாயண வாலியாக வேண்டும் என்பது.