» Engineering in Tamil Language

Friday, 23 Jul 2010

தமிழ் வழிப் பொறியியல்: மூன்று கேள்விகள்!

உலகத் தமிழ்ச் செம்மொழி மாநாட்டின் விளைவுகளாகச் சில நல்ல விஷயங்கள் அரங்கேறிக் கொண்டிருக்கின்றன.

பொறியியல் படிப்பைத் தமிழில் படிக்கும் முயற்சிக்கு ஆரம்ப நிலை வெற்றி கிடைத்திருப்பதையே இப்படித் குறிப்பிடுகிறேன்.

தமிழ் வழியே கட்டடவியல் மற்றும் இயந்திரவியல் சார்ந்த துறைகளில் இனித் தமிழில் படிக்கலாம் என்பது மிக இனிப்பான செய்தியாகும்.

சென்னை கிண்டி பொறியியல் கல்லூரி, திருச்சி அண்ணா பல்கலைக் கழகம் மற்றும் திண்டிவனம, அரியலூர், ராமநாதபுரம், திருக்குவளை, பண்ருட்டி, திண்டுக்கல், பட்டுக்கோட்டை, நாகர்கோவில், தூத்துக்குடி ஆகிய அண்ணா பல்கலைக் கழக கல்லூரிகள் என மொத்தம் 11 கல்லூரிகளில் சிவில் படிப்பில் தமிழ் பயிற்றுமொழி வகுப்புகள் தொடங்கப்பட்டு உள்ளன.

கிண்டி பொறியியல் கல்லூரி திருச்சி அண்ணா பல்கலைக்கழகம் மற்றும் விழுப்புரம், ஆரணி, அரியலூர், ராமநாதபுரம், திருக்குவளை, பண்ருட்டி, பட்டுக்கோட்டை, திண்டுக்கல், நாகர்கோவில், தூத்துக்குடி ஆகிய அண்ணா பல்கலைக்கழக கல்லூரிகள் என மொத்தம் 12 கல்லூரிகளில் மெக்கானிக்கல் படிப்பில் தமிழ் பயிற்று மொழி வகுப்புகள் தொடங்கப்பட்டுள்ளன.

நிறைந்த மதிப்பெண் எடுத்தவர்கள் கூட தமிழ்வழிக் கல்வியை நேசித்துக் தேர்ந்தெடுத்திருக்கிறார்கள். 22 பேர் இந்த முதல் கட்ட மாணவ மாணவிகளாவர்.

எண்ணற்ற தமிழ் ஆர்வலர்களின் கனவு இது. 600 ஆண்டுகளுக்கு முன்பு தோன்றிய ஜப்பானிய மொழிகூட இன்று அனைத்து வழிப் பாடங்களையும் கற்கும் ஊடகமாக ஆகிவிட்டது. இதற்கு 1400 ஆண்டுகளுக்கும் முற்பட்ட மொழிக்கு ஏன் இந்த ஆற்றல் இல்லாமல் போனது என்று அஞ்சியவர்களுக்கு இந்தச் செய்தி விடையளித்துவிட்டது.

எந்த நாட்டிலோ பிறந்த மொழி நம்மை ஆக்கிரமிக்க நம் மண்ணில் தோன்றிய மொழி ஒதுங்கி நின்று வேடிக்கை பார்த்த நிலைமை மாறிவிட்டது குறித்து மகிழ்ச்சி.

இந்த முதலாண்டு மாணவர்களின் எதிர்பார்புகள் மூன்று தமிழில் இப்பாடங்களைச் சிறப்புறப் பயிற்றுவிக்க தமிழை நன்கு அறிந்த பொறியியல் ஆசிரியர்கள் கிடைப்பார்களா? நாம் படிக்கப் படிக்கத் தமிழில் பொறியியல் நூல்கள் முழுமையாகக் கிடைக்குமா? படித்து முடித்தபின் வேலை வாய்ப்பு கிடைக்குமா அல்லது புறந்தள்ளப்படுவோமா?

இந்த மூன்றிற்கும் சாதகமான பதில்கள் கிடைப்பதில்தான் அடுத்தடுத்த ஆண்டு மாணவர்களின் சேர்க்கை பெருகும்.

இந்த விஷயங்களில் தொடர்ந்த அக்கறை காட்டப்படாவிட்டால் சோடாவை உடைத்த கதைதான். குப்பென்று கிளம்பி வெறும் தண்ணீராய் ஆகிப் போய்விடக்கூாது எனகிற அக்கறையிலேயே இப்படிக் குறிப்பிடுகிறேன்.
லேனாவின் பார்வையில் முந்தைய கட்டுரைகள்

2010/07/16 பாதி நன்றியைப் பகிர்ந்து கொள்வோம்!

2010/07/09 தூவப்பட்டிருக்கும் விதைகள்

2010/07/02 அரைக் கிணறு தாண்டினால் போதுமா?

2010/06/25 முற்றிலும் முதலைக் கண்ணீர் தானா?

2010/06/18 எது அசல்!? எது போலி?

2010/06/11 நல்லதொரு சவால்!

2010/06/04 பள்ளிக் கட்டணத்திற்கு மூன்று தரங்கள்!

2010/05/28 சாதனைகளின் மறுபக்கம்!

2010/05/21 மக்களின் நலன் மண்ணின் தூசியா?

2010/05/07 ஜெயலலிதா சொல்லித் தரும் அரசியல் நாகரிகம்!

2010/04/30 சக்தியைத் திரட்ட நல் வாய்ப்பு!

2010/04/23 மேல்சபை மேலான சபையாகுமா?