Tamilvanan

எம்.சின்னச்சாமி, விளாத்திகுளம்.

கட்சியில் யாரையும் இழக்க விரும்பவில்லை என்கிறாரே ஜெயலலிதா?

இழக்க விரும்பாதது அவரது விருப்பம். இருக்க விரும்பாதது அவரவர் விருப்பம். இல்லீங்களா…? இதைக் கூடவா அம்மையாருக்குத் தெளிவுபடுத்தணும்?

வி.அன்பு, சென்னை.

சிபுசோரன் பிரச்னையால் ஜார்க்கண்ட் மாநில ஆளுநர் தள்ளாடிவிட்டாரே!

அங்கிருக்கும் ஆளுநர் எம்.ஒ.எச். பாரூக் அசல் பாண்டிச்சேரிக்காரர். இந்த தள்ளாட்டதிற்கெல்லாம் அசைந்து கொடுக்காதவா!

எஸ்.பி.மணியன், திருக்கழுக்குன்றம்.

‘புதிய தலைமைச் செயலகம் சர்க்கஸ் கூடாரம்போல் இருக்கிறது’ என்று ஜெயலலிதா சொல்வது எதை வைத்து?

கூடாரத்திற்கே போகாதவர் அங்கே நடப்பது சர்க்கஸ் என்று எப்படித் தெரிந்துகொண்டார்? ஒருவேளை இவரது கட்சிக் கோமாளிகள் யாராவது ஒருசிலர் சொல்லியிருப்பார்களோ?

ஜி.எஸ்.நாதன், சென்னை-7.

அ.தி.மு.க.விற்கு ராஜ்ய சபா எம்.பி. பதவியை விட்டுக் கொடுத்திருக்கும் ம.தி.மு.க. மற்றும் கம்யூனிஸ்டுகளைப் பற்றி?

விழுந்து மீசையில் மண் ஒட்டுவதைவிட விழாமல் மீசை முறுக்கிக் கொள்ளலாமே? அரசியலில் எல்லாமே ஒரு கணக்குத்தான்!

சி.ராமநாதன், கும்பகோணம்.

ராகுலும் பிரதமராகலாம், தடையில்லை என்கிறாரே மன்மோகன்சிங்?

இது பொதுஜனத்திற்கே தெரிந்த விஷயம்! ஆனால் சும்மா சொல்லக்கூடாது. பத்திரிகையாளர்களை அருமையாகச் சமாளித்தார் பிரதமர்.

ஆர்.முத்துகுமார், சென்னை-17.

ஸ்டாலினின் மேடைப் பேச்சுகள் எப்படியிருக்கின்றன?

புள்ளி விவரத்துறை இயக்குநருக்கே ஞாபகம் வராத அளவிற்குப் புள்ளி விவரங்களாய் அள்ளிவிடுகிறார். அரசியலிலிருந்து அரசாங்க உத்தியோகத்திற்குப் போனால் கூட ஸ்டாலின் பிழைத்துக் கொள்வார். அழகிரி என்ன செய்யப்போகிறாரோ தெரியவில்லை.

பி.ஆனந்தன், கடலூர்.

கலைஞரைப் பாராட்டுவதில் யார் சிறந்தவர்கள்?

நடிப்புலகில் இருப்பதாகத்தான் பெயர். இவர்கள் என்னத்த நடிக்கிறாங்க? காங்கிரஸ்காரர்கள் இவர்களை சாப்பிட்டு விடுவார்கள் போலிருக்கிறது. அதுவும் கால்ஷீட் பிரச்னையில்லாமல் நடிப்பில் சும்மா பின்னுறாங்க! சினிமாக்காரர்கள்தான் வெட்கப்படணும். அந்த அளவுக்குப் பாராட்டுவதாக நடிக்கிறாங்க!

இ.குமரன், கொளத்தூர்.

அறிவியல் மற்றும் கணிதங்களில் 20 சதவிகித மதிப்பெண்கள் இருந்தாலே மேற்கு வங்கத்தில் ஆசிரியப் பணியாமே?

ஆசிரியர்களுக்கு 20, மாணவர்களுக்கு 35. இதுதான் இவர்களுக்கான பாஸ்மார்க் என்றால் இதைவிடக் கொடுமையில்லை. இதுவே நேஷனல் வைஸ் சீனியாரிட்டி என்றால் கொல்கத்தாவில் நம்மவர்களால் இன்னும் டிராஃபிக் ஜாம் ஆகும்.

எம்.பாண்டி, கள்ளக்குறிச்சி.

கோவைக்குப் பின் செம்மொழி வளருமா?

நம் மொழி தானாக வளரும். கோவையால் ஒப்பந்தக்காரர்கள் வளருவார்கள். வளர்ந்தும் விட்டார்கள்.

சி.கே.மூர்த்தி, தஞ்சை.

கம்யூனிஸ்டுகள் ஏன் காங்கிரஸ்காரர்களைப் போல் ஆட்சியில் பங்கு கேட்பதில்லை?

கூட்டணியில் பங்கு கொடுத்தாலே கோடி புண்ணியமென்று நினைப்பவர்கள் வேறு புண்ணியம் தேடுவார்களா? அதனால்தான் கேட்பதில்லை.

கே.முருகானந்தம், திருவேற்காடு.

தமிழகத்தில் யார் யாரோடு கூட்டணி?

கொஞ்சம் இருங்க, நமக்கு அதிர்ஷ்டமிருந்தால் தேர்தலுக்குள்ளே இன்னும் நாலைஞ்சு புதுக்கட்சிகள் கூட உருவாகலாம். அதற்குள் ஏன் அவசப்படறீங்க?

எம்.பெருமாள், திருவண்ணாமலை.

எல்லாவற்றிலும் மனைவியை ஆதரிக்கலமா?

இந்த விஷயத்தில் நீங்கள் முலாயம்சிங்காக வேண்டும். பிரச்னை அடிப்படையில்தான் ஆதரவு என்று அறிவிக்க வேண்டும். அப்படி அறிவித்தால்தான் நீங்கள் நிலைக்க முடியும்; நீடிக்கவும் முடியும்.

எஸ்.வி.சாமி, சென்னை.

உங்களுக்கு இலவசத் தொலைக்காட்சி கிடைத்துவிட்டதா?

‘வேண்டாம்’ என மறுத்ததால்தான் என் வட்டத்தில் பெருந்தன்மைப் பட்டம் கிடைத்தது.

இளங்கோ, ராணிப்பேட்டை.

தி.மு.க. ஆட்சியில் விலைவாசியைக் கட்டுப்படுத்த முடியவில்லையே?

கண்ணெதிரே இருக்கும் கட்சிக்காரர்களையே கட்டுப்படுத்த முடியவில்லை. வெட்டிக்கொண்டு மாய்கிறார்கள். காற்றில் கலந்த விலைவாசியை எப்படிக் கட்டுப்படுத்தப் போகிறார்கள்.

வி.ரமணி, செங்கல்பட்டு.

தி.மு.க.வின் அடுத்த இலவசம் என்னவாக இருக்கும்?

அதுவா, ஆளுக்கொரு கிலுகிலுப்பை என்பதாகவும் இருக்கலாம். எதுவா இருந்தா என்ன? நம்மவர்களுக்குத்தான் எதுவும் சும்மா வந்தா சரியாச்சே!

எம்.அப்துல்லா, சென்னை-5.

ப்ளஸ்டூ மற்றும் பத்தாம் வகுப்புத் தேர்வுகளில் இம்முறையும் மாணவிகள் கொடி கட்டிப் பறந்தது பற்றி?

துணிகளைக் காயப்போடும்போது கூடத் துப்பட்டாக்கள்தாம் எப்போதும் மேலே பறக்கும். பேண்ட்டுகள் எப்போதும் கீழே தொங்கிக் கொண்டுதான் இருக்கும். இது உடையிலேயே தெரிகிற சங்கதி. இதைப்போய் ஆச்சரியமாய்க் கேட்கிறீர்கள்?

எம்.பரிமளா, ஆரணி.

தி.மு.க.வில் குஷ்பு?

ஜெயா டி.வி.யில் இவர் நடத்தியது ஜாக்பாட். இப்போது தி.மு.க.விற்குக் கிடைத்துள்ளது. அதே ஜாக்பாட் தி.மு.க.வால் இவருக்கு லாபமில்லை. அவரால் தி.மு.க.விற்குத்தான் இலாபம்.