» People will understand?

Friday, 12 Mar 2010

புரியாமலா போகும்?

தமிழக முதல்வர் கருணாநிதி, நல்ல பேச்சாளர்; நல்ல எழுத்தாளர்; இணையற்ற சிந்தனையாளர், கருணாநிதியுடன் அரசியலில் கருத்து வேறுபாடுகளும் முரண்பாடுகளும் கொண்டிருப்பவர்களும்கூட, இவரது பிரசன்ஸ் ஆப் மைண்டையும் (தமிழில் ?), நகைச்சுவை உணர்வையும், சொல்லாடல்களையும், வளமான தமிழையும், இலக்கிய உதாரணங்களையும் இரசிக்காமல் இருக்க முடியாது.

குறைந்தபட்சம் மனத்திற்குள்ளாவது இரசிப்பார்கள்.

அவரது ஆட்சித் திறமையைக் குறை கூறுகிற நடுநிலையாளர்கள் கூட, அவரது இலக்கியத் திறமையை பேச்சாற்றலை, உரைநடை அழகை வியந்தே தீருவார்கள். அண்மையில் சென்னைப் பொது மருத்துவமனையின் 175 ஆண்டு விழாவின்போது முதல்வர் பேசிய பேச்சு இருக்கிறதே இது. மிக அருமை என்பேன்.

குறிப்பாக மருத்துவ மாணவர்களுக்கு முதல்வர் சொன்ன அறிவுரை இருக்கிறதே, இது அட்சர இலட்சம் பெறும்.

மருத்துவம் என்பது தொழில் அல்ல. அது சேவை என்கிற கருத்தை முதல்வர் வலியுறுத்தியுள்ள விதம் என்றும் நினைத்துக் கொள்ளும்படியானது.

மருத்துவர்களுக்கு ஈரம், கருணை, இதயக்கசிவு வேண்டும் என்று பேசியிருப்பது இன்றையச் சூழலுக்கு மிக அவசியமாகிறது.

முதல்வர் என்று இல்லாவிட்டாலும் வயதில் மூத்த குடிமகன் என்ற வகையிலும் பிறந்தது முதல் மருத்துவர்களிடம் மிக அதிகமாகப் பழகியவர் என்ற வகையிலும் (இது அவரது வாக்குமூலமாகும்!) முதல்வரின் கருத்துக்கு மருத்துவர் சமுதாயம் செவி சாய்க்குமா?

இலட்சங்களைக் கொட்டிக் கொடுத்துப் (ஒரு சில மருத்துவப் படிப்புகள் கோடியைத் தொட்டும் தாண்டியும் விட்டன) படிப்பதால் அதை முதலிடமாகவே கருதி அதைத் திரும்ப எடுக்கும் (பன்மடங்காக) முயற்சிகள் பல மருத்துவர்கள் வியபாரிகளாகவே ஆகிப் போனார்க்ள.

“உங்களுக்கு ஒன்றும் இல்லை” என்கிற வாக்கியத்தைச் சொல்வதற்குள் நோயாளிகளிடம் ஒன்றுமே (பணம்) இல்லாமல் ஆக்கிவிடுகிறவர்கள் இன்று எவ்வளவோ பேர்!

மருத்துவமனை பில்கள் நூறுகளாகி, ஆயிரங்களாகி, இலட்சங்களாகிவிட்டன. நாம் என்ன அமெரிக்காவிலா வாழ்கிறோம்? அனைத்துச் செலவுகளையும் அரசே ஏற்றுக்கொள்ள?

கலைஞர் காப்பீட்டுத் திட்டம் கூடச் சிலரையே சிறுஅளவில் காப்பாற்றுகிறது. பெரும்பகுதிப் பணத்தைக் கையைவிட்டே கொடுக்கவேண்டிய நிலை.

அவசர கதியில் வேறு வைத்தியம் நடப்பதால் நோயாளிகளுக்கு ஏகப்பட்ட மனக்குறைகள் இருக்கின்றன.

இவர்களது ஏக்கங்களை, விரக்திகளை, சலிப்புகளை வெளிப்படுத்தும் ஏகப் பிரதிநிதியாகத்தான் முதல்வர் பேசியிருக்கிறார்.

மருத்துவர்களுக்கு முதல்வர் விடுத்தது அன்பான வேண்டுகோள் போலத் தெரிந்தாலும் சரியான சம்மட்டிஅடியாகவும் தோன்றுகிறது.

கலைஞரது சொல்வித்தை மருத்துவர்களுக்குப் புரியாமலா போகும்.

லேனாவின் முந்தைய ஒரு பக்கக் கட்டுரைகள்

2010/03/06 செயற்குழுவா பகைக்குழுவா?

2010/02/26 கைக்கு எட்டி என்ன பயன்; வாய்க்கு எட்டாமல்?

2010/02/19 தமிழ்வழிக் கல்விக்கான தருணம்!

2010/02/12 கொசு(று)ப் பிரச்னையல்ல இது!