» Salute the Action On Deemed Varsities

Friday, 29 Jan 2010

கல்வியைக் கடைச் சரக்காக்கிய நிகர்நிலைப் பல்கலைக் கழகங்கள்!

தமிழகத்தின் 17 நிகர்நிலைப் பல்கலைக்கழகங்களுக்கு மத்திய அரசின் கல்வித்துறை கொடுத்த சாட்டையடிகள் காலா காலத்திற்கும் மறக்கவொண்ணாதவை.

60/120 பேரைச் சேர்க்க அனுமதி வாங்கிக்கொண்டு இவற்றை நான்கு இலக்க எண்ணாக மாற்றிக்கொண்டு ஆட்டம் போட்ட தமிழக நிகர்நிலைப் பல்கலைக் கழகங்களுக்கு சரியான கட்டங்கள் கட்டப்பட்டுவிட்டன.

காசே பிரதானம் என்கிற போக்கில் ஆட்டம் போட்ட கல்வி அமைப்புகள் ஒடுக்கப்பட்டிருக்கின்றன.

இடியாக இறங்கியிருக்கும் இந்த அடி, மாணவ மாணவிகளைப் பாதிக்காது என்கிற ஆறுதலான செய்தியை மனிதவள மேம்பாட்டு மந்திரி கபில்சிபலும், அண்ணா பல்கலையின் துணைவேந்தர் மன்னர் ஜவஹரும் தந்திருப்பதுதான் இதில் ஒரே ஆறுதலான செய்தி.

ஆனால் இப்பல்கலைக்கழகங்களில் படிக்கும் சுமார் 50,000 மாணவர்களும் பாதிக்கப்படமாட்டார்கள் என்பது நம்பும்படி இல்லை.

காரணம், நிகர்நிலைப் பல்கலைகளின் பாடத் திட்டங்கள் வேறு; கல்விக் கட்டண அமைப்பு முறைகள் வேறு. சரியான பேராசிரியர்கள் இல்லாததால் தோல்வியடையக் கூடிய மாணவ மாணவிகளுக்கு யார் தேர்வை நடத்துவார்கள்? பல்கலையா, தனியார் கல்லூரியா?

நன்றாக எழுப்பினாரய்யா பிரச்னையை இந்த விப்லவ் சர்மா என்கிற வக்கீல்! நிகர்நிலைப் பல்கலைக்கழகங்கள் பல்கலைக்கழகங்களின் கட்டுப்பாடுகளை அறுத்துக்கொண்டு வெளியேறியதன் நோக்கம் உயரியதல்ல என்பது இவரத வாதம். கல்வியாளர் பி.டாண்டனும் அவரது குழுவும் எல்லா நிகர்நிலைப் பல்கலைக்கழகங்களின் செயல்பாடுகளையும் கட்டமைப்புகளையும் ஆராய்ந்து விப்லவ் சர்மா சொல்வது சரிதான் என்று கண்டுபிடித்துக் சொன்னது நல்லதாகப் போயிற்று.

இல்லாவிட்டால் ஏற்கெனவே நசிந்துகிடக்கும் கல்வித் தரம் (ஒரு விடுமுறை வேண்டும் கடிதத்தைக் கூடத் தவறில்லாமல் எழுதத் தெரியாத இன்ஜினீயரிங் பட்டதாரிகள் எவ்வளவு பேர் தெரியுமா!) இன்னும் தரைமட்டத்திற்குப் போயிருக்கும்.

தமிழகத்தில் இரத்து செய்யப்படாத 126 நிகர்நிலைப் பல்கலைக்கழகங்களுக்கு இப்போதாவது வயிற்றில் புளி கரைக்கப்பட்டிருக்குமா இல்லையா? இனியாவது அடிப்படை விஷயங்களில் கவனம் செலுத்தவேண்டும்; இல்லாவிட்டால் தகுதி பாதிக்கப்படும் என்கிற அச்சம் வந்திருக்குமா வந்திருக்காதா?

நிகர்நிலைப் பல்கலை அந்தஸ்தை வழங்குவதற்கு சிபாரிசு செய்த உயரதிகாரிகளின் ‘நேர்மை’யை உடனே ஆராய வேண்டாமா? விண்ணப்பித்தவர்களுக்கெல்லாம் நிகர்நிலைகளை வழங்கிய வள்ளல்களின் வண்டவாளம் நமக்குத் தெரிய வேண்டாமா? இடையிடையே இவற்றைக் கண்காணிக்கும் பொறுப்பில் உள்ளவர்களும் ஏதேனும் இலாபம் அடைந்தார்களா என்பதும் குடையப்பட வேண்டிய பகுதியே!

இந்தியக் கல்வியைச் சீரமைக்கும் இணையற்ற முயற்சிகளுள் ஒன்றுதான் இந்த இரத்து.

தும்பைவிட்டு வாலைப் பிடித்த கதை இது. என்றாலும்கூட இந்தச் செயலை வரவேற்கிறேன்!

லேனாவின் முந்தைய ஒரு பக்கக் கட்டுரைகள்

2010/01/22 மடுவிற்கும் மலைக்கும் உள்ள வேறுபாடு!

2010/01/15 நடக்கட்டும் நடக்கட்டும்!

2010/01/08 அதற்குள் இப்படி ஓர் ஆயாசமா?

2009/12/31 அம்புகளை நோவானேன்?

2009/12/25 அதென்ன வின்-வின் கொள்கை?

2009/12/18 நீங்களே சொல்லுங்௧ள்

2009/12/11 தரம் காட்டுபவர்கள்!

2009/12/04 சிறு வருத்தங்களால் விலகிப் போகிறவர்கள்!

2009/11/27 சோதனையான காலகட்டமா?