» When you miss the punctuality

Thursday, 31 Dec 2009

நேரத்தைக் கடைப்பிடிக்க முடியாதபோது…!

“எந்த ஒரு நிகழ்விற்கும் நான் நேரத்தோடு செல்வேன். அப்படிக் குறித்த நேரத்திற்கு நான் ஒரு நிகழ்விற்கு வராவிட்டால் நான் செத்துப்போய்விட்டேன் என்று நீங்கள் தாராளமாக எடுத்துக் கொண்டுவிடலாம்’ என்று ஒரு முறை நம் உரையின்போது குறிப்பிட்டிருந்தார் நெப்போலியன் ஹில் என்கிற வாழ்வு முன்னேற்றச் சிந்தனையாளர்.

இந்த வாக்குமூலத்தை நான் முதல் முறை அறிய நேர்ந்தபோது ஆடிப் போய்விட்டேன் ஆடி!

என்ன ஒரு தன்னம்பிக்கை இருந்தால் ஒரு கொள்கையில் எத்தகைய ஓர் உறுதிப்பாடு காட்டினால், அப்படி ஒரு வாக்கியத்தை ஒருவர் ஒரு பொது மேடையில் சொல்லியிருக்க முடியும் என்பதே என் வியப்பிற்குக் காரணம்.

நம்மவர்கள் பலர் குறித்த நேரம் (punctuality) என்றால் வீசை என்ன விலை என்று கேட்பவர்களாக இருப்பது மிகுந்த ஏமாற்றத்தை அளிக்கிறது. நம்மைவிடப் பலவிதங்களிலும் பின்தங்கியிருக்கிற ஆசிய நாடுகள் சிலவற்றிலும், ஆப்பிரிக்க நாடுகளிலும்கூட மக்கள் அப்படி ஒரு நேர உணர்வு உள்ளவர்களாக இருப்பதைப் பார்க்கும்போது, ஐயோ! எல்லாத் திறமைகளும் உள்ள நம்மவர்களுக்கு இந்த நேர உணர்வும் வந்துவிட்டால் எவ்வளவு உயர்வுகளை இவர்கள் அடைய முடியும் என நான் ஏங்குவது உண்டு.

சற்றும் எதிர்பாராத காரணங்களினால் ஒருவர் நேரத்தைக் கடைப்பிடிக்க முடியாமல் போனால்கூட அதை ஈடுகட்டும் விதமாகச் சில செயல்களப் பின்பற்றுவது சற்றேனும் ஆறுதலாக இருக்கும்.

6.15-க்கு வருகிறேன் என்கிறீர்களா? போக்குவரத்து நெரிசலில் சிக்கிவிட்டீர்களா? 6.14-க்கு உரியவருக்குப் பேசுங்கள். இருக்கிற நிரவரங்களைச் சொல்லிவிடுங்கள். ‘பரவாயில்லையா’ நான் என்ன செய்ய? நீங்கள்பாடு தொடருகிறீர்களா? உங்கள் முடிவுப் படி செய்யுங்கள். என் தாமதத்தால் உங்கள் போக்கு எதுவும் தடைப்படக்கூடாது என்று பெருந்தன்மையாகப் பேசுங்கள். ஒரு புகழ்மிக்க பேச்சாளர் கிட்டத்தட்ட ஒரே பெயர் உள்ள இரு ஓட்டல்களின் பெயரால் குழம்பி வேறு ஓட்டலுக்குப் போய், இந்த ஓட்டலில் நடந்த கூட்டத்திற்குத் தாமதமாக வந்தார். பேசும் போதாவது ஏன் தாமதம் என்று விளக்கி, பார்வையாளர்களின் அடப்பாவமே என்கிற அன்புனர்வைப் பெற்றிருக்கலாம் அல்லவா? செய்யவில்லை.

தாமதம் எனில் அவசியம் மன்னிப்புக் கேட்க வேண்டும். இது ஒரு பெரிய குற்றமா? நான் ஏன் மன்னிப்புக் கேட்க வேண்டும் என்பது நம்மவர்களின் பார்வையாக இருக்கிறது. தவறு. இது நம்மைச் சமூகத்தில் உயர்த்துகிறது. அது மட்டுமல்ல; சே! இப்படியெல்லாம் மன்னிப்புக் கேட்டு வழியக் கூடாது. இனியாவது நேரத்திற்குப் போக வேண்டும் என்கிற மனத் தூண்டுதலிலும் இது முடியும்!.

லேனாவின் முந்தைய ஒரு பக்கக் கட்டுரைகள்

2009/12/25 அதென்ன வின்-வின் கொள்கை?

2009/12/18 நீங்களே சொல்லுங்௧ள்

2009/12/11 தரம் காட்டுபவர்கள்!

2009/12/04 சிறு வருத்தங்களால் விலகிப் போகிறவர்கள்!

2009/11/27 சோதனையான காலகட்டமா?

2009/11/20 கேட்டதால் இழந்தவை!

2009/11/13 கேட்காததால் இழந்தவை!

2009/10/30 மென்மைப் போக்கின் நன்மைகள்!

2009/10/23 தானத்திற்குரிய பாத்திரம்தானா?

2009/10/16 கணவன் மனைவிக்குள் கலகமூட்டுகிறவர்கள்!

2009/10/09 கவனத் தருணங்கள்!