» Ginger

Friday, 25 Dec 2009

Ginger

மணிமேகலைப் பிரசுரம் வெளியீடு வளமான வாழ்விற்கு உணவே மருந்து - டாக்டர் றொசாரியோ ஜோர்ஜ், Ph.D.,வளமான வாழ்விற்கு உணவே மருந்து

இஞ்சியின் மகத்துவம்

இறைவனின் படைப்பில் இயற்கையின் மூலம் எண்ணற்ற மூலிகைகளும் காய்கனிகளும் கீரை வகைகளும் மற்றும் தானிய வகைகளும் பெரும் மருத்துவ குணங்களுடன் மனிதகுலத்திற்கு உடல் நலம் காக்க பேருதவி புரிகின்றன. அவ்வகையில் இஞ்சிக்கு உள்ள சிறப்பு என்பது பல்வேறு வகையில் மிகவும் உயர்வாக கருதப்படுகிறது. சித்தவைத்தியம், ஆயுர்வேதம், யுனானி மற்றும் அலோபதி சிகிச்சை முறையில் கூட இஞ்சியை பயன்படுத்தி எண்ணற்ற நோய்களிலிருந்து சுகமடையச் செய்துள்ளார்கள். பொதுவாகவே அனைத்து இல்லங்களிலும் இஞ்சி சமையலுக்கு பயன்படுத்துவது காணக்கூடியதே. இஞ்சிக்கு உள்ள மருத்துவ குணமே பித்தத்தைப் போக்குவதற்கும், தலைசுற்றல், மயக்கம், அஜீரணம் மற்றும் தீராத தலை வலி போன்ற உபாதைகளை போக்கும் தன்மை இந்த இஞ்சிக்கு உண்டு. சாதாரணமாக குருத்து இஞ்சி அல்லது முற்றின இஞ்சியை ஊறுகாயாகவோ, இஞ்சி மரப்பாகவோ பயன்படுத்துவதோடு பல்வேறு சிற்றுண்டிகளான வெண்பொங்கல், லெமன் ரைஸ், பிரியாணி மற்றும் தயிர் சாதம் போன்றவை தயாரிக்கும்போது இஞ்சியையும் பயன்படுத்துவார்கள். பல்வேறு மருத்துவ குணம்கொண்ட இஞ்சியின் சிறப்பினை கீழ்க்காணும் வகையில் அறிந்து பயன்படுத்துவதன் மூலம் பல்வேறு நோய்களிலிருந்து குழந்தைகள் முதல் பெரியோர் வரை பலன்பெற முடியும்.

பொதுவாகவே இஞ்சித் துண்டை ஈரப்பதமுள்ள நிலத்தில் புதைத்து பயிரிடலாம். வெகு விரைவில் துளிரிட்டு விடும். அதுவும் மார்கழி தை மாதம் குளிர் சீதோஷணத்தில் வளரும் குருத்திஞ்சியை தைப்பொங்கலன்று பொங்கல் பானையில் மஞ்சள் செடி மற்றும் இஞ்சிச் செடியையும் இணைத்துக்கட்டி பொங்கல் திருவிழாவை கொண்டாடுவது தமிழர்களின் கலாச்சாரமாகும். குழந்தைகளுக்கு ஏற்படும் வரட்டு இருமல், தொண்டைப்புண் ஆகியவற்றிற்கு இஞ்சி சொரசம் தயாரித்துக் கொடுப்பது என்பது அனைத்து கிராமங்களில் இன்றும் பெரியோர் வழக்கம். இஞ்சி காய்ந்தால் சுக்கு எனப்படும். சுக்குக்கு மிஞ்சிய மருந்தும் இல்லை சப்ரமண்ய சுவாமிக்கு நிகர் கடவுள் இல்லை என்பது சான்றோர் வாக்கு. அதை மெயப்பிப்பதுபோல் பண்டைய காலத்திலேயே சுக்கு மிளகு திப்பிலி ஆகிய கலவையில் இருமல், சளி, காய்ச்சல் போன்றவற்றிற்கு நோய் தீர்க்கும் அரும் மருந்துகளாக பயன்படுத்தியுள்ளனர். அதுபோன்றே இஞ்சி மரப்பா எனும் சிறு வில்லைகள் சாதாரணமாக பேருந்துகளில் பயணிக்கும்போது ஏற்படக்கூடிய தலைச்சுற்றல், வாந்தி, மயக்கம், அஜீரணக் கோளாறுகளுக்கு கை கண்ட நிவாரணியாகும். அதுபோன்றே சுக்கு கஷாயம் அல்லது சுக்கு காப்பி ஆகியவை தலைவலி மற்றும் வயிற்றுப்பிணிகளுக்கும் சிறந்த பலனைத் தருவதாகும்.

இவ்விதமாக ‘உணவே மருந்து’ மருந்தே உணவு என்பதுதான் இயற்கை மருத்துவத்தின் தத்துவம். காற்று, நீர், மண் ஆகியவற்றின் மூலம் தான் ஒருவரது உடலில் புகும் நோய்க்கிருமிகள் பல்வேறு நோய்கள் தோன்றக் காரணமாகும்.

ஆரோக்கியமாக வாழ்வதற்கும், மருத்துவச் செலவைக் குறைப்பதற்கும் இயற்கை உணவு இன்றியமையாதது. திருமுருக கிருபானந்த வாரியார் கூறியதுபோல் நோயின்றி வாழ்வது அறிவுடைமை. நோயின்றி வாழ்வதற்குத துணை புரிவது இயற்கை உணவே. அவ்வகையில் இயற்கையில் விளையும் பல்வேறு மருத்துவ குணம் கொண்ட நமது குடும்பங்களில் அன்றாடம் பயன்படுத்தும் உணவுப் பொருட்களைப் பற்றிய பயன்களைக் காண்போம்.

றொசாரியோ ஜோர்ஜ்யின் வளமான வாழ்விற்கு உணவே மருந்து

2009/12/18 பூண்டின் மருத்துவப் பயன்

2009/12/11 வெங்காயம்

2009/12/04 நெல்லிக்காய்

2009/11/27 தண்ணீர்

2009/11/20 நின்று கொல்லும் நீரிழிவும், கட்டுப்படுத்தும் வழிமுறைகளும் - 3

2009/11/13 நின்று கொல்லும் நீரிழிவும், கட்டுப்படுத்தும் வழிமுறைகளும் - 2

2009/11/06 நின்று கொல்லும் நீரிழிவும், கட்டுப்படுத்தும் வழிமுறைகளும்

2009/10/30 அவஸ்தைப்படுத்தும் ஆஸ்துமாவும்! அல்லல் படும் ஆன்மாவும் - 2

2009/10/23 அவஸ்தைப்படுத்தும் ஆஸ்துமாவும்! அல்லல் படும் ஆன்மாவும்

2009/10/16 இயற்கை உணவும் ஆரோக்கியமும்

2009/10/09 அன்புநல் முதிய பருவம் அடைந்த இளம் நெஞ்சங்களே!