திருவாரூரில் மத்திய பல்கலைக்கழகம்: இன்று தொடக்கம்

தமிழ்நாட்டில் முதன்முதலாக திருவாரூரில் ரூ.1000 கோடி முதலீட்டில் மத்திய பல்கலைக்கழகம் அமைகிறது. முதல்வர் கருணாநிதி தலைமையில் இன்று நடைபெறும் விழாவில் மத்திய மனிதவள மேம்பாட்டுத்துறை அமைச்சர் கபில்சிபல் கலந்துகொண்டு பல்கலைக்கழகத்தை தொடங்கி வைக்கிறார்.

மத்திய பல்கலைக்கழகம் அமைக்க திருவாரூர் அருகே 516 ஏக்கர் நிலம் கையகப்படுத்தப்பட்டு கட்டுமானப்பணிகள் நடந்துவருகின்றன. மேலும் இவ்வாண்டு முதலே இப்பல்கலைக்கழகம் செயலாற்ற தொடங்கிட வேண்டும் என்ற முதல்வரின் விருப்பபடி உடனடியாக பல்கலைக்கழகம் தொடங்கப்படுகிறது.

திருவாரூர் ஆட்சியர் அலுவலக வளாகத்தில் உள்ள கூடுதல் கட்டமொன்றில் தற்காலிகமாக இப்பல்கலைக்கழகம் இயங்க உள்ளது.

இந்தக் கட்டடம் கடந்த மாதம் 7ஆம் தேதி மத்திய பல்கலைக்கழக துணைவேந்தர் பி.பி.சஞ்சயிடம் ஒப்படைக்கப்பட்டது.

பேராசிரியர் நியமனம், மாணவர் சேர்க்ககை போன்றவை நடந்து முடிந்த நிலையில் இன்று காலை 11மணியளவில் இப்பல்கலைக்கழகம் முறைப்படி தொடங்கி வைக்கப்படுகிறது.

திருவாரூர் மத்திய பல்கலைக்கழகத்தில் எம்.ஏ., தமிழ், எம்.ஏ., ஆங்கிலம் உள்ளிட்ட 4 பாடப்பிரிவுகள் முதலில் தொடங்கப்படுகின்றன. ப்ளஸ் டூ முடித்தவர்கள் இளநிலை, முதுநிலை, ஆய்வு படிப்புகள் வரை தொடர்ச்சியாக கற்கும் வகையில் ஒருங்கிணைந்த கல்வி முறை அமல்படுத்தப்படுகிறது.

உலகத் தமிழ் மாநாடு தேதி மாற்றம்: அடுத்த ஜூன், ஜூலையில் நடத்த அரசு யோசனை

சனவரி 2010 இல், கோவையில் நடத்த முடிவு செய்யப்பட்டிருந்த உலகத் தமிழ் மாநாட்டை ஜூன், ஜூலையில் நடத்த முடிவு செய்யப்பட்டிருப்பதாக தமிழக அரசு அறிவித்துள்ளது.

இது தொடர்பாக தமிழக அரசு வெளியிட்டுள்ள செய்திக் குறிப்பில்
 
முதல்- அமைச்சர் கருணாநிதி தலைமையில் செம்மொழித் தமிழாய்வு மத்திய நிறுவனத்தில் ஒன்பதாவது உலகத் தமிழ் மாநாடு தொடர்பான ஆய்வரங்கக் கலந்தாய்வுக் கூட்டம் இன்று நடைபெற்றது.
 
முனைவர் வா.செ. குழந்தைசாமி கூட்டத்திற்கு வந்திருந்த அனைவரையும் வரவேற்று உரையாற்றினார். 14 ஆண்டுகளாக நடைபெறாதிருந்த உலகத் தமிழ் மாநாட்டைத் தற்போது நடத்த முன்வந்த தமிழக முதல்-அமைச்சர் கருணாநிதிக்கு, தமிழறிஞர்கள் நன்றியும், பாராட்டும், மகிழ்ச்சியும் தெரிவித்தனர்.
 
தமிழ்நாட்டில் கோவையில் ஒன்பதாவது உலகத் தமிழ் மாநாடு நடைபெறும் என அறிவிக்கப்பட்டதிலிருந்து உலகளாவிய நிலையில் பேராசிரியர்களும், தமிழ றிஞர்களும், தமிழ் ஆர்வலர்களும், குறிப்பாக ஆய்வாளர்களும், மகிழ்ச்சியும் நன்றியும் தெரிவித்து வருகின்றனர்.
 
எனினும் ஆய்வுக் கட்டுரைகள் தயாரிக்கவும், பயணத்தைத் திட்டமிட்டுக் கொள்ளவும், கால அவகாசம் கூடுதலாகக் கிடைத்தால் வெளிநாடுகளைச் சார்ந்த தமிழறிஞர்கள் பெரும் பாலோர் பங்கேற்க வாய்ப்புக் கிட்டும் என்றும், மாநாடு மேலும் சிறப்புறும் என்றும் கருத்து தெரிவித்துள்ளனர்.
 
எனவே, போதுமான கால அவகாசம் எடுத்துக்கொண்டு ஆய்வுக் கட்டுரை உருவாக்கி அளிக்கவும், வெளிநாடுகளில் உள்ள தமிழாய்வு அறிஞர்கள் பெருமளவில் கலந்து கொள்ளவும் வசதியாகத் தற்போது 2010 சனவரி இறுதி வாக்கில் நடைபெறும் என அறிவிக்கப்பட்டுள்ள மாநாடு 2010 ஜூன் திங்கள் இறுதியிலோ அல்லது ஜூலைத் திங்கள் முதல் வாரத்திலோ நடைபெறத் தேவைப்படும் நடவடிக்கைகள் மேற்கொள்ளலாம் என இன்றைய கூட்டத்தில் ஒரு மனதாக முடிவெடுக்கப்பட்டது.
 
கூட்டத்தில் நிதி அமைச்சர் அன்பழகன், துணை முதல்- அமைச்சர் மு.க.ஸ்டாலின், தலைமை செயலாளர் கே.எஸ்.ஸ்ரீபதி, உலக தமிழ் ஆராய்ச்சி கழக துணை தலைவர் முனைவர் வா.செ.குழந்தைசாமி, தஞ்சை தமிழ் பல்கலைக்கழக துணைவேந்தர் முனைவர் மா.ராசேந்திரன் ஆகியோர் கலந்து கொண்டனர்.
 
மேலும் கலந்து கொண்ட உறுப்பினர்கள் விவரம்:-
 
முனைவர் அவ்வை நடராஜன், மணவை முஸ்தபா, கவிப் பேரரசு வைரமுத்து, பேராசிரியர் ராசராசேசுவரி, கவிஞர் கனிமொழி எம்.பி.
 
முனைவர் மா.நன்னன், கவிக்கோ அப்துல் ரகுமான், முனைவர் சிலம்பொலி செல்லப்பன், கவிவேந்தர் கா.வேழவேந்தன், பேராசிரி யர் சாலமன் பாப்பையா, து.ரவிக்குமார் எம்.எல்.ஏ. முனைவர் பொன். கோதண்டராமன், முனைவர் க.ப.அறவாணன், ஐராவதம் மகாதேவன், முத்துக் குமாரசுவாமி, முனைவர் சுப்பராயலு ஆகியோர் கலந்துகொண்டனர்’ என்று கூறப்பட்டுள்ளது.
 

முதலைகளைக் காப்பாற்ற முதல் ஆளாக வர முடியுமா?

முதலைக்கண்ணீர் வடிப்பவராக இருந்தால்கூட பரவாயில்லை உப்பு நீரில் கிடந்து துடித்துக்கொண்டிருக்கும் முதலைகளை பாதுகாப்பான மற்றொரு இடத்திற்கு கொண்டுசெல்ல தொண்டர்கள் வேண்டும். தைரியமுள்ள இரக்கமுள்ளவர்கள் முன்வரலாம்.

ஆஸ்திரேலியாவின் டார்வின் நகரில் முதலைப்பண்ணை (Crocodylus Park) ஒன்றுள்ளது. அதன் நிர்வாகம் தான் இந்த அழைப்பை விடுத்திருக்கிறது. 

“இது மாதிரி ஒரு அட்வென்ஞ்சரை நீங்கள் உங்கள் வாழ்க்கையில் காணமுடியாது!” என்று வார்த்தையில் வெண்ணெய் தடவி ‘வா, வா’ என்றழைக்கிறார் முதலைப்பண்ணையின் ஆராய்ச்சி பிரிவின் இயக்குநர் மாட் பிரையின். சுமார் 400 முதலைகளை இடம் மாற்றம் செய்ய வேண்டுமாம்.

முதலைகளுக்குக் கைகொடுக்க இப்போதே 15 பேர் வரை தயாராகி விட்டார்கள். ஆனால் தொண்டர்கள் எண்ணிக்கை போதாது. ஒரு முதலையை இடமாற்றம் செய்ய குறைந்தபட்சம் இரண்டு பேராவது தேவை என்கிறார்கள்.

“எவ்வளவு பேர் முன்வந்தாலும் சந்தோஷம் தான். முதலைகளைக் காப்பாற்ற பல்வேறு முன்எச்சரிக்கை நடவடிக்கைகளை எடுக்கவேண்டியிருக்கிறது (அப்போ முதலைகளைக் காப்பாற்ற வருபவர்களுக்கு?)” என்கிறார் பிரையின்.

முதலைக்கு ஒருவர் என்பதைவிட இருவர் என்பது அந்த முதலைக்கும் நல்லது. உதவி செய்யும் அந்த இருவருக்கும் கூட நல்லது(?)என்கிறது முதலைப்பண்ணை நிர்வாகம்.
 
முதலைகளை அளவு வாரியாக, தனித்தனியாக குளத்தில் விடவும் இத்தனை தொண்டர்கள் தேவைப்படுகிறார்கள். அம்மா, அப்பா, பிள்ளை என குடும்பமாக இருக்கும் முதலைகள்தான் இவர்களை இன்னும் குழப்பிக்கொண்டிருக்கும் ஒரு விஷயம்.

மாணவர்கள், விலங்குகளைப் பற்றி ஆராய்ந்து கொண்டிருப்பவர்கள், இத்துறையில் ஏற்கனவே ஈடுபட்டிருப்பவர்கள் என ஆட்கள் வந்துகொண்டிருக்கிறார்கள்.

“மிகப் பெரிய ஜீவன்களைக் கையாளும் அரிய வாய்ப்பு இது. ஏன், வாழ்க்கையில் இனி கிடைக்கவே கிடைக்காது என்ற வாய்ப்பும் கூட” என்று தொண்டர்களை நைஸ் பண்ணி வரவழைத்துக் கொண்டிருக்கிறது முதலைப்பண்ணை நிர்வாகம்.

உயிரைச் துச்சமாக மதிப்பவர்கள் உதவப் போகலாம். உயிர் போனாலும், முதலைக்கண்ணீரை துடைத்தவர் என்ற உயர்ந்த பெயராவது கிடைக்கும். என்ன முதல் ஆளாக நீங்கள் தயாரா?

உலகின் மிகப் பெரிய தூரிகை!:சீன ஓவியர் அசத்தல்

சிறந்த ஓவியமொன்றை உருவாக்க வேண்டுமானால் அதற்குரிய திறமையோடு உகந்த தூரிகையும் வேண்டும். சீன ஓவியர் ஹிவென்சும்முக்கு ஓர் ஆசை இவ்வுலகை திரும்பிப் பார்க்க வைக்கும் அளவுக்கு மிகப் பெரிய ஓவியத்தை உருவாக்க வேண்டுமென்று. அவருடைய லட்சியத்தில், மிகப்பெரிய ஓவியத்திற்கு முன்பாக உலகின் மிகப் பெரிய தூரிகையை உருவாக்கிவிட்டார்.

ஹிவென்சும் உருவாக்கிய தூரிகை 12 அடி நீளமுடையது. 52 கிலோ எடை கொண்டது. இந்தத் தூரிகையில் 300 குதிரைகளின் முடி பயன்படுத்தப்பட்டுள்ளது. இந்தத் தூரிகையை ஒருமுறை வண்ணத்தில் குழைத்தெடுத்தால் அதன் எடை 45 கிலோ அதிகரித்து விடுகிறதாம்.

“இந்தத் தூரிகையை உருவாக்க ஒர் ஆண்டும், அதில் ஓவியம் வரைந்து பழக ஓர் ஆண்டும் பிடித்திருக்கிறது எனக்கு” என்கிறார் ஹிவென்சும்.

தெற்கு சீனாவில் உள்ள நான்சோங்க் நகரில் நடைபெற்ற விழாவில் பாரம்பரிய ஓவியமொன்றை வரைய இந்த மெகா தூரிகையைப் பயன்படுத்தினார் ஹி வென்சும்.

என் கருத்தால் பிறர் மனதை புண்படுத்த விரும்பவில்லை:
சரத்குமார் படவிழாவில் முதல்வர் கருணாநிதி பேச்சு

நான் யாருக்கும் அவர்கள் தரும் கருத்துகளுக்கு எதிரான கருத்துக்களைக் கொண்டு யாருடைய மனதையும் புண்படுத்த விரும்பவில்லை. இது உறுதி, உறுதி. இது அரசியல் அல்ல. அரசியல்வாதிகளுக்கும் உள்ளம் உண்டு. அந்த உள்ளத்தில் அன்பு பிறக்கிறது என்றால், அந்த அன்பு ஆரத்தழுவி மற்றவர்களை அரவணைப்பது உண்டு என்று தமிழக முதல்வர் கருணாநிதி பேசினார்.

கே.எஸ்.ரவிக்குமார் இயக்கத்தில், சரத்குமார் நடித்துள்ள  ஜக்குபாய்  பாடல்  வெளியீட்டு விழா, சென்னை அண்ணா அறிவாலயத்தில் நேற்று முன்தினம் நடந்தது.

பாடல் குறுந்தகடுகளை வெளியிட்டு முதல்வர் கருணாநிதி பேசுகையில்,

“இந்த நிகழ்ச்சியில் நான் கலந்து கொள்ளப்போகிறேன் என்றதும் திடுக்கிட்டவர்கள் பலர். அண்ணா அறிவாலயத்திலா? சரத்குமாரும், ராதிகாவும் கலந்து கொள்ளும் விழா நடக்கிறது? அந்த விழாவில் முதல்வரும் கலந்து கொள்கிறாரா? என்ற ஆச்சர்யக்குறி எழுந்திருக்கும்.

இந்த விழாவுக்கு வரும்படி ராதிகா என்னைக் கேட்ட போது, உடனே ஒப்புக்கொண்டேன். இது, கலைஞர் அரங்கில் நடக்கிறது என்பதால் அல்ல, அண்ணா அறிவாலயத்தில் நடக்கிறது என்பதால் அல்ல, அவர்கள் அண்ணா அறிவாலயத்தை விட்டுப் போகவும் முடியாது; கலைஞர் அரங்கத்தை விட்டுப் பிரியவும் முடியாது என்பதை நான் நன்றாகப் புரிந்தவன். சரத்குமார் இங்கு பேசும் போது, துரோணாச்சாரியாரின் மாணவனாக தன்னை ஆக்கிக்கொள்ள விரும்பிய ஏகலைவன் நேரடியாகச் சென்று வில் வித்தையை கற்றுக் கொண்டு புகழ் பெற்றான் என முடித்துவிட்டார். மீதிக் கதையை சொல்ல மறந்துவிட்டார். இதயமற்ற குருநாதர் துரோணாச்சாரியார், கட்டை விரலை காணிக்கையாகக் கேட்டார். நான் சரத்குமாரை அப்படி கேட்க மாட்டேன். உமது கட்டை விரலில் பலம் இருக்கிற வரை என் மீது கணை தொடுக்கலாம். அது, என் தம்பிகளில் ஒரு தம்பி தொடுத்த கணை தான் என்று எண்ணி, அதை நான் மலர்க் கணையாக ஏந்திக்கொள்வேன். காஞ்சிபுரம் கூட்டத்தில் நான் சொல்லாமல் விட்டதை இங்கு சொல்ல நினைக்கிறேன். இதுவரை என் மீது விழுந்த கணைகளுக்கு அவர்கள் விடுத்த அதே கணைகளைப் போல் நான் இதுவரை விட்டிருந்தால், அதை எல்லாம் நீங்கள் மறந்து விடுங்கள்.

நான் வாழ்வில் முக்கால் பகுதியை முடித்துவிட்டு, அந்த முக்கால் பகுதியில் முத்தமிழுக்கு, தமிழகத்தில் வாழ்கிற மக்களுக்கு, இந்திய மக்களுக்கு என்ன செய்தேன், இன்னும் என்ன செய்ய வேண்டும் என்பதில் நான் கவனத்தைச் செலுத்துவேன். யார், யார் என்ன சொன்னார்களோ, அதற்கு அளிக்க வேண்டிய விளக்கங்களை, கட்சியில் உள்ள மற்றவர்கள் சொல்லிக்கொள்ளட்டும். நான் யாருக்கும் அவர்கள் தரும் கருத்துகளுக்கு எதிரான கருத்துக்களைக் கொண்டு யாருடைய மனதையும் புண்படுத்த விரும்பவில்லை. இது உறுதி, உறுதி. இது அரசியல் அல்ல. அரசியல்வாதிகளுக்கும் உள்ளம் உண்டு. அந்த உள்ளத்தில் அன்பு பிறக்கிறது என்றால், அந்த அன்பு ஆரத்தழுவி மற்றவர்களை அரவணைப்பது உண்டு. அந்த வகையில் தான் சரத்குமாரை இடைக்காலத்தில் - நான் இப்போது இடைக்காலம் என்று சொல்வதற்கு காரணம், வருங்காலம் எப்படி இருக்குமோ சொல்ல முடியாது - பிரிந்திருக்க நேர்ந்தாலும், அவரிடம் நான் காட்டி வரும் அன்புக்கும், மரியாதைக்கும் எள்ளளவும் குறைவின்றி தமிழ்ப் பண்பாட்டை நிலை நிறுத்தி வருகிறார். அந்த பண்பாடு, அவரது குடும்பத்தின் வழித் தோன்றல்”என்றார்.

இதயங்களை இணைப்பது இறை உணர்வு மட்டுமே:
தினமணி ஆசிரியர் கே. வைத்தியநாதன்

மக்களின் இதயங்களை இணைப்பது இறை உணர்வு மட்டுமே என்று ‘தினமணி’ நாளிதழ் ஆசிரியர் கே. வைத்தியநாதன் பேசினார்.

சென்னை மயிலாப்பூர் அருண்டேல் தெருவில் உள்ள பள்ளிவாசல் வளாகத்தில் நேற்று நடைபெற்ற ‘ஈத் பெருநாள் சந்திப்பு’ நிகழ்ச்சியில் கலந்துகொண்டு அவர் பேசுகையில்,இ

“கூடாரங்கள் வெவ்வேறாக இருக்கட்டும். இதயங்கள் இணைந்தால் போதும்’ என்று மத நல்லிணக்கத்துக்கு இலக்கணம் வகுத்தவர் நபிகள் நாயகம். அசைக்க முடியாத இறை நம்பிக்கையால் மட்டுமே எதையும் சாதிக்க முடியும் என்பதை உலகுக்கு எடுத்துரைப்பது இஸ்லாம்.

இறைநம்பிக்கை இல்லாதவர்கள் நன்மைக்கும், தீமைக்கும் வித்தியாசம் தெரியாதவர்கள். இறைவனையே ஏற்க மறுக்கும், நம்பிக்கை என்பதே இல்லாமல் இருக்கும் இவர்கள் எதிர்மறைச் சிந்தனையாளர்கள். அப்படிப்பட்டவர்களால் சமுதாயத்தை ஒன்றுபடுத்த முடியாது. நல்லிணக்கத்தை ஏற்படுத்தவும் முடியாது.

ஆட்சி அதிகாரத்தை தக்க வைத்துக் கொள்வதற்காக ஆங்கிலேயர்கள் கடைபிடித்த பிரித்தாளும் சூழ்ச்சியை இன்றைய ஆட்சியாளர்களும் பின்பற்றுகிறார்கள் என்பதுதான் வேதனைக்குரிய விஷயம்.

அரசியல் ஆதாயத்துக்காக மனிதனை மதம் பிடிக்கச் செய்கிறார்கள். அவர்கள் சண்டையிட்டுக் கொள்ளட்டும். அதில், அரசியல் ஆதாயம் தேடட்டும். ஆனால், நாம் ஒற்றுமையாக இருப்போம். நல்லிணக்கத்தை வளர்ப்போம்.

எனக்கு முன்பு பேசிய, டாக்டர் ஹபீப் முகம்மது, சொன்னது போல, தீயவர்கள் ஐந்து சதவீதம் தான். அதை எதிர்ப்பவர்களும் ஐந்து சதவீதம் தான். மீதி 90 சதவீதம் பேர் தீமை நடப்பதை கண்டும் காணாமலும் நமக்கேன் வம்பு என்று இருப்பவர்கள். இப்படி இருப்பதும் ஒரு வகையில் தீமைக்கு சமம் தான். அதைத் தான் புனிதக் குர்ரான் கூறுகிறது.

நல்லது செய்ய நினைப்பதை அன்றே செய்திட வேண்டும் என்கிறது புனிதக் குர்ரான். ஏனைய மத நூல்களும் இதைத்தான் கூறுகின்றன. காரணம், நாளை என்பது நம்மிடம் இல்லை. வள்ளுவப் பேராசான் கூறுவது போல, உறங்குவது போலும் சாக்காடு, உறங்கி விழிப்பது போலும் பிறப்பு.

மனிதன் தான் நிரந்தரமானவன் அல்ல என்பதை உணர்ந்து கொண்டாலே அவனது அகந்தையும், தான் என்கிற ஆணவமும் அழிந்து விடும். நம்மில் ஒருவர் கூட இந்த உலகுக்கு நிரந்தர விசாவில் வரவில்லை. இதைப் புரிந்து கொண்டாலே நமக்குள் கருத்து வேறுபாடுகளும், கோபதாபங்களும் அகன்று விடும். இதைத்தான் திருக்குர்ரானும் ஏனைய மத நூல்களும் நமக்கு உணர்த்துகின்றன. இதை நமது மதவாதிகள் மக்களுக்கு உணர்த்தினாலே மதமாச்சரியங்களும் மனமாச்சரியங்களும் மறைந்து விடும்.

மதத்தின் பெயராலும், ஜாதியின் பெயராலும் ஒருவரை வெறுப்பதையும், பழிப்பதையும் விடப் பகுத்தறிவுக்கு ஒவ்வாத விஷயம் எதுவுமே இருக்க முடியாது. வேடிக்கை என்னவென்றால் ஜாதியின் பெயரால் பழிப்பவர்கள் தங்களைப் பகுத்தறிவாளர்கள் என்று சொல்லிக் கொள்வது தான். இங்கே நம்மில் எவராவது ஒருவர் விரும்பிப் பெற்றோமா நமது பிறப்பை? எனக்கு இந்த ஜாதியில், இந்த மதத்தில் பிறக்க வேண்டும் என்று மனுப் போட்டுப் பெற்றோமா? ஜாதியும், மதமும் கடைச்சரக்காக வாங்கியதா?

பிறப்பு என்பதே ஒரு விபத்து. சில நொடிப் பொழுது மாறியிருந்தால் நமது ஜாதியும், மதமும், நாடும், மொழியும், கூட மாறியிருக்கக் கூடும். அப்படி இருக்கும் போது, ஜாதியின் பெயராலும், மதத்தின் பெயராலும் மனிதன் சண்டை போட்டுக் கொள்வதை விட முட்டாள்தனம் வேறு என்னவாக இருக்க முடியும்?

ஆங்கிலேயர்கள் வருவதற்கு முன், ராமேசுவரத்திலிருந்து காசிக்குப் போகும் இந்து யாத்திரிகர் யாரிடமும் எந்த நவாபும், ராஜாவும் விசா, பாஸ்போர்ட் கேட்டதில்லை. அதேபோல, தாக்காவிலிருந்து அஜ்மீர் ஷெரீப் செல்லும் இஸ்லாமிய யாத்ரிகர்களை எந்த ராஜாவும் தடுத்ததில்லை. சமூக நல்லிணக்கம் என்பது இந்தியாவின் அடிப்படைக் கோட்பாடு. நமது ரத்தத்தில் ஊறிய உணர்வு.

இந்து, இஸ்லாமியர், கிறிஸ்தவர், சீக்கியர், ஜைனர், பௌத்தர் என்ற வேறுபாடில்லாமல் இங்கே நாமெல்லாம் கூடியிருப்பது போல, இந்தியர்களாக நாம் எல்லா விழாக்களிலும் ஒன்று கூட வேண்டும். இதை எல்லா மதத்தினரும் பின்பற்ற வேண்டும். எல்லா பள்ளி வாசலிலும், கோயில்களிலும், மாதா கோயில்களிலும் கடைப்பிடிக்க வேண்டும். பிறகு, நம்மை அரசியல்வாதிகளும், மத வெறியர்களும் பிரிக்க முடியாது ” என்றார் வைத்தியநாதன்.

2007 2008 தமிழக அரசு விருதுகள் அறிவிப்பு:
ரஜினி, கமலுக்கு சிறந்த நடிகர் விருது

ரஜினிகாந்த் நடித்த சிவாஜி, கமல்ஹாசன் நடித்த தசாவதாரம் திரைப்படங்களுக்கு 2007 மற்றும் 2008-ம் ஆண்டுகளுக்கான சிறந்த திரைப்பட விருதுகளை தமிழக அரசு அறிவித்துள்ளது. சிவாஜி நாயகன் ரஜினி 2007   ஆம் ஆண்டிற்கான சிறந்த நடிகராகவும், தசாவதாரம் எடுத்த கமல் 2008 ஆம் ஆண்டிற்கான சிறந்த நடிகராகவும் தேர்ந்தெடுக்கப்பட்டுள்ளனர்.

திரைப்பட விருதுகளுக்கான பரிந்துரைகளை வழங்க, நீதிபதி ஏ.கே.ராஜன் தலைமையில் குழு அமைக்கப்பட்டது. இந்தக் குழுவின் பரிந்துரைகளை அப்படியே ஏற்றுக் கொண்டு, விருதுகளுக்கான விவரங்களை தமிழக அரசு திங்கள்கிழமை வெளியிட்டுள்ளது.

2007-ம் ஆண்டின் சிறந்த படத்துக்கான முதல் பரிசை ‘சிவாஜி’ திரைப்படமும், அந்தப் படத்தில் நடித்த ரஜினிகாந்த், சிறந்த நடிகருக்கான விருதையும் பெற்றுள்ளார்.

சிறந்த படத்துக்கான இரண்டாவது பரிசை ‘மொழி’ திரைப்படம் தட்டிச் சென்றுள்ளது. அந்தப் படத்தில் காது கேட்க, வாய் பேச முடியாத கதாபாத்திரத்தில் தத்ரூபமாக நடித்த ஜோதிகாவுக்கு சிறந்த நடிகை விருதும் கிடைத்துள்ளது.

சிறந்த படத்துக்கான மூன்றாம் பரிசை ‘பள்ளிக்கூடம்’, சிறந்த படத்துக்கான சிறப்புப் பரிசை “பெரியார்’ திரைப்படமும் வென்றுள்ளன.

“மொழி’ படத்தின் இசையமைப்பாளர் வித்யாசாகர், சிறந்த இசையமைப்பாளருக்கான விருதுக்கு தேர்ந்தெடுக்கப்பட்டுள்ளார். “பெரியார்’ படத்தில் பாடல்கள் எழுதியதற்காக, சிறந்த பாடலாசிரியருக்கான விருது கவிஞர் வைரமுத்துவுக்கு கிடைத்துள்ளது.

2008-ம் ஆண்டுக்கான விருது:  2008-ம் ஆண்டுக்கான சிறந்த படத்துக்கான முதல் பரிசு தசாவதாரம் திரைப்படத்துக்கு கிடைத்துள்ளது. அதில் பத்து வேடங்களில் நடித்து அனைவரையும் பிரமிப்பில் ஆழ்த்திய நடிகர் கமல்ஹாசன் சிறந்த நடிகருக்கான விருது பெறுகிறார்.

சிறந்த படத்துக்கான இரண்டாம் பரிசு ‘அபியும் நானும்’ படத்துக்கும், அதில் நடித்த த்ரிஷாவுக்கு சிறந்த நடிகைக்கான சிறப்புப் பரிசும் கிடைத்துள்ளது. மூன்றாவது பரிசு ‘சந்தோஷ் சுப்பிரமணியம்’ படத்துக்கு வழங்கப்படுகிறது.

சிறந்த நடிகைக்கான விருது, “பிரிவோம் சந்திப்போம்’ படத்தில் நடித்த சிநேகாவுக்கும், சிறந்த நடிகருக்கான சிறப்புப் பரிசு “வாரணம் ஆயிரம்’ படத்தில் தந்தை, மகன் என இரண்டு வேடங்களில் தன் நடிப்பாற்றலை வெளிப்படுத்திய சூர்யாவுக்கும் கிடைத்துள்ளது.

சிறந்த நகைச்சுவை நடிகருக்கான 2007-ம் ஆண்டுக்கான விருதினைப் பெற நடிகர் விவேக் தேர்ந்தெடுக்கப்பட்டுள்ளார். 2008-ம் ஆண்டுக்கான விருதினை நடிகர் வடிவேலு பெறுகிறார்.

சிறந்த குணசித்திர நடிகருக்கான விருது பிரகாஷ் ராஜுக்கும், நடிகைக்கான விருது ‘நான் கடவுள்’ படத்தில் நடித்த பூஜாவுக்கும் கிடைத்துள்ளது.

2008-ம் ஆண்டுக்கான சிறந்த இசையமைப்பாளருக்கான விருது இளையராஜாவுக்கும், பாடலாசிரியருக்கான விருது கவிஞர் வாலிக்கும் வழங்கப்படுகிறது.

முதல்வர் படத்துக்கு மூன்று விருதுகள்

முதல்வர் கருணாநிதியின் கதை, வசனம் மற்றும் திரைக்கதையில் உருவான ‘உளியின் ஓசை’ திரைப்படத்துக்கு மூன்று விருதுகள் கிடைத்துள்ளன.

2008-ம் ஆண்டுக்கான விருதுகள் அறிவிப்பில், சிறந்த உரையாடல் ஆசிரியருக்கான விருது “உளியின் ஓசை’ படத்துக்கு வசனம் எழுதிய முதல்வர் கருணாநிதிக்கும், அதே படத்தின் பாடல்களுக்கு நடனம் அமைத்த சிவசங்கருக்கு சிறந்த நடன ஆசிரியருக்கான விருதும் கிடைத்துள்ளது. ‘உளியின் ஓசை’ படத்தில் நகைச்சுவை பாத்திரம் ஏற்று நடித்த கோவை சரளாவுக்கு சிறந்த நகைச்சுவை நடிகைக்கான விருது அறிவிக்கப்பட்டுள்ளது.

விருதுகள் விபரம் வருமாறு:

2007

சிறந்த படம் (முதல் பரிசு) - சிவாஜி

சிறந்த படம் (2-ம் பரிசு) -மொழி

சிறந்த படம் (3-ம் பரிசு) -பள்ளிக்கூடம்

சிறந்த படம் (சிறப்பு பரிசு) -பெரியார்

பெண்களுக்கான சிறந்த படம்

(சிறப்பு பரிசு)- மிருகம்

குடும்ப நெறிகளை பிரதிபலித்த படம் (முதல் பரிசு) -தூவானம்

சிறந்த நடிகர் -ரஜினிகாந்த் (சிவாஜி)

சிறந்த நடிகை -ஜோதிகா (மொழி)

சிறந்த நடிகர் (சிறப்பு பரிசு) -சத்யராஜ் (பெரியார்)

சிறந்த நடிகை (சிறப்பு பரிசு) -பத்மபிரியா (மிருகம்)

சிறந்த வில்லன் நடிகர் -சுமன் (சிவாஜி)

சிறந்த நகைச்சுவை நடிகர் -விவேக் (சிவாஜி)

சிறந்த குணசித்திர நடிகர் -எம்.எஸ்.பாஸ்கர் (மொழி)

சிறந்த குணசித்திர நடிகை -அர்ச்சனா (ஒன்பது ரூபாய் நோட்டு)

சிறந்த இயக்குநர் -தங்கர்பச்சான்

(பள்ளிக்கூடம்)

சிறந்த கதையாசிரியர் -வசந்த்

(சத்தம் போடாதே)

சிறந்த உரையாடல் ஆசிரியர் -பாலாஜி சக்திவேல் (கல்லூரி)

சிறந்த இசையமைப்பாளர் -வித்யாசாகர் (மொழி)

சிறந்த பாடலாசிரியர் -வைரமுத்து (பெரியார் உள்ளிட்டவை)

சிறந்த பின்னணி பாடகர் -ஸ்ரீநிவாஸ் (ஒன்பது ரூபாய் நோட்டு)

சிறந்த பின்னணி பாடகி -சின்மயி (சிவாஜி)

சிறந்த ஒளிப்பதிவாளர் -நீரவ்ஷா (பில்லா)

சிறந்த ஒலிப்பதிவாளர் -யு.கே. அய்யப்பன் (பில்லா)

சிறந்த எடிட்டர் -சதீஸ் குரோசோவா (சத்தம் போடாதே)

சிறந்த கலை இயக்குநர் -தோட்டாதரணி (சிவாஜி)

சிறந்த சண்டைப் பயிற்சியாளர் -அனல் அரசு (கருப்பசாமி குத்தகைதாரர்)

சிறந்த நடன ஆசிரியர் -பிருந்தா

(தீபாவளி)

சிறந்த ஒப்பனைக் கலைஞர் -ராஜேந்திரன் (பெரியார்)

சிறந்த தையல் கலைஞர் -அனுவர்தன் (பில்லா)

சிறந்த பின்னணி (ஆண் குரல்) -கே.பி.சேகர் (மலரினும் மெல்லிய)

சிறந்த பின்னணி (பெண் குரல்) -மகாலட்சுமி (மிருகம்)

2008

சிறந்த படம் (முதல் பரிசு) -தசாவதாரம்

சிறந்த படம் (2-ம் பரிசு) -அபியும் நானும்

சிறந்த படம் (3-ம் பரிசு) -சந்தோஷ் சுப்ரமணியம்

சிறந்த படம் (சிறப்பு பரிசு) -மெய்பொருள்

பெண்களுக்கான சிறந்த படம் (சிறப்பு பரிசு)- பூ

குடும்ப நெறிகளை பிரதிபலிக்கும் படம் (முதல் பரிசு) -வல்லமை தாராயோ

இரண்டாம் பரிசு -வண்ணத்துப் பூச்சி

சிறந்த நடிகர் -கமல்ஹாசன் (தசாவதாரம்)

சிறந்த நடிகை -சினேகா (பிரிவோம் சந்திப்போம்)

சிறந்த நடிகர் (சிறப்பு பரிசு) -சூர்யா (வாரணம் ஆயிரம்)

சிறந்த நடிகை (சிறப்பு பரிசு) -த்ரிஷா (அபியும் நானும்)

சிறந்த வில்லன் நடிகர் -ராஜேந்திரன் (நான் கடவுள்)

சிறந்த நகைச்சுவை நடிகர் -வடிவேலு(காத்தவராயன்)

சிறந்த நகைச்சுவை நடிகை -கோவை சரளா (உளியின் ஓசை)

சிறந்த குணசித்திர நடிகர் -பிரகாஷ்ராஜ் (பல படங்கள்)

சிறந்த குணசித்திர நடிகை -பூஜா(நான் கடவுள்)

சிறந்த இயக்குநர் -ராதாமோகன் (அபியும் நானும்)

சிறந்த கதையாசிரியர் -தமிழ்ச்செல்வன் (பூ)

சிறந்த உரையாடல் ஆசிரியர் -மு.கருணாநிதி (உளியின் ஓசை)

சிறந்த இசையமைப்பாளர்-இளையராஜா (அஜந்தா)

சிறந்த பாடலாசிரியர் -வாலி (தசாவதாரம்)

சிறந்த பின்னணி பாடகர் -பெள்ளிராஜ் (சுப்ரமணியபுரம்)

சிறந்த பின்னணி பாடகி -மஹதி (நெஞ்சத்தை கிள்ளாதே)

சிறந்த ஒளிப்பதிவாளர்-ஆர்தர் ஏ.வில்சன் (நான் கடவுள்)

சிறந்த ஒலிப்பதிவாளர் -ரவி (வாரணம் ஆயிரம்)

சிறந்த எடிட்டர் -ப்ரவீன் -ஸ்ரீகாந்த் (சரோஜா)

சிறந்த கலை இயக்குநர் -ராஜீவன் (வாரணம் ஆயிரம்)

சிறந்த சண்டை பயிற்சியாளர் -கனல் கண்ணன் (சிலம்பாட்டம்)

சிறந்த நடன ஆசிரியர் -சிவசங்கர் (உளியின் ஓசை)

சிறந்த ஒப்பனைக் கலைஞர் -மைக்கேல் வெஸ்ட்மோர் -கோதண்டபாணி
(தசாவதாரம்)

சிறந்த தையல் கலைஞர் -ரவீந்திரன் (பிரிவோம் சந்திப்போம்)

சிறந்த குழந்தை நட்சத்திரம் -ஸ்ரீலட்சுமி (வண்ணத்துப்பூச்சி)

சிறந்த பின்னணி ஆண் குரல் -எம்.ஏ.பிரகாஷ் (கி.மு.)

சிறந்த பின்னணி பெண் குரல் -சவீதா (பல படங்கள்)

ஆயுத பூஜை வாழ்த்துகள்!

தமிழ்வாணன் வாசகர்கள் அனைவருக்கும் ஆயுத பூஜை மற்றும் விஜயதசமி வாழ்த்துகள். தொழிலை, கல்வியைப் போற்றும் இவ்விரு தினங்களுக்கும் அலுவலகம் விடுமுறை என்பதால் 27 மற்றும் 28ம்   தேதிகளில் செய்திகள் இடம்பெறாது என்பதை தெரிவித்துக் கொள்கிறோம்.

-ஆசிரியர்

கைவண்ணம்!

கையிலே கலைவண்ணம் காண்போம்… கைகளால் நிழல் உருவங்களை கொண்டு வருவது ஒருவிதமென்றால், அந்தக் கையையே கலைவண்ணமாக மாற்றுவது சிலருக்கு கைவந்த கலை!

பச்சையும் சிவப்பும் சரிசமமாக ஓர் அதிசய ஆப்பிள்!

இங்கிலாந்தில் உள்ள கோலட்டன்ரேலிஹ் பகுதியைச் சேர்ந்தவர் கென் மோரீஷ். ஓய்வு பெற்ற ஒவியரும், அலங்கார நிபுணருமான இவர் ஒரே நாளில் கதாநாயகன் ஆகிவிட்டார். எல்லாம் இவருடைய தோட்டத்தில் விளைந்த ஒர் ஆப்பிளின் கைவண்ணம்.

கடந்த வாரத்தில் ஒரு நாள் தன்னுடைய தோட்டத்தைச் சுற்றி வந்த அவர் ஆப்பிள் மரத்தில் வித்தியாசமாக ஏதோ தொங்குவதைப் பார்த்து அதிசயித்து, பறித்துப் பார்த்தார். வெளிர்பச்சையும் அடர்சிவப்பும் சரிசமமாக தன்னுடைய தோலில் கொண்டிருந்தது அந்த ஆப்பிள்.

பெயிண்டர் ஆச்சே… யாரோ இப்படி கச்சிதமாக வரைந்து தன்னை ஏமாற்றப் பார்க்கிறார்கள் என்று முதலில் எண்ணிவிட்டார். ஆனால், அவர் நினைத்ததுப் போல் யாரும் விளையாட்டாக செய்ததில்லை அந்த ஆப்பிள். இயற்கை அடித்த அதிசய நிறம் அது என்று பின்னர் கண்டுக்கொண்டார்.

சிவப்பு ஆப்பிளையும் பச்சை ஆப்பிளையும் பாதியாக நறுக்கி ஒட்டவைத்தது போல் இருந்த ஆப்பிளை உடனே தன் வீட்டு ஃபிரிட்ஜியில் பத்திரப்படுத்திவிட்டார் மோரீஸ். அப்புறம் என்ன, அவருடைய கிராமத்தில் உள்ள அனைவரும் மோரீஸின் வீட்டுக்குப் படையெடுத்து, அந்த அதிசய ஆப்பிளை படம் எடுத்தனர்.

இப்படி சரிவிகிதத்தில் இருவேறு வண்ணத்தில் ஆப்பிள் உருவாவது 10 லட்சத்தில் ஒன்று என்கிறார்கள் விவசாய வல்லுனர்கள்.

இந்த ஆப்பிளை அவர் தன்னுடைய தோட்டத்தில் இருந்த கோல்டன் டெலிசியஸ் சீ ஆப்பிள் மரத்தில் இருந்து பறித்திருக்கிறார். இந்த ஆப்பிள் இருவேறு வண்ணங்களை சரிசமமாகக்கொண்டிருப்பது போலவே இருவேறு சுவைகளையும் கொண்டிருக்குமாம். சிவப்பு பகுதி சுவை மிகுந்ததாகவும் பச்சைநிறப் பகுதி அதைவிட சுவை குறைந்தும் காணப்படுமாம்.

72 வயதாகும் மோரீஸ் கடந்த 45 வருடங்களாக ஆப்பிள் பயிரிட்டு வருகிறார். இதுபோன்றதொரு அதிசயம் இதுவரையில் நிகழ்ந்ததில்லை. இவர் பறித்த அதிசய ஆப்பிளை தோட்டக்கலை வல்லுனர்கள் ஆராய்ச்சிக்காக எடுத்துச் சென்றுள்ளனர்.

இந்த அதிசய ஆப்பிள் புகழ் சேர்த்த அளவுக்கு மோரீஸ்ஸுக்கு பணம் சேர்க்குமா என்பது போகப்போகத்   தெரியும். குறிப்பிட்ட மரத்தில் இம்மாதிரி ஆப்பிள் நிறைய விளைந்தால் நிச்சயம் அது பணம் காய்ச்சி மரமாக மாறிவிடும் என்கிறார்கள் இங்கிலாந்து ஆப்பிள் வியாபாரிகள்.