» Oppose for woman rights?

Friday, 19 Jun 2009

பெண்களுக்கா உரிமை மறுப்பது?

பதவி ஏற்ற 100 நாள்களுக்குள் பெண்கள் இட ஒதுக்கீடு மசோதாவை எப்படியும் நிறைவேற்றுவது என்பதில் புதிய அரசு குறிப்பாக உள்ளது என்கிறார்கள் நம்புவோம்.

குடியரசுத் தலைவரின் உரை இந்த உணர்வை உறுதி செய்தாலும் சிலரது எதிர்ப்புகளை மையப்படுத்தி மத்திய அரசு இதிலிருந்து தப்பிக்கப் பார்க்குமா என்கிற ஐயமும் எழாமல் இல்லை.

இதனைச் செயல்படுத்த வேண்டிய நிலைக்குழு புதிய பாராளுமன்றம் உருவானதுமே கலைக்கப்பட்டுவிடுவது என்ன வழக்கமோ தெரியவில்லை. கழன்று கொள்ளும் உத்தியில் இதுவும் ஒன்றா என்றும் ஐயுற வேண்டியுள்ளது. புதிய நிலைக்குழு நியமிக்கப்படும்போது கருத்து வேறுபாடுகள் வலுவடைந்தால் மறுபடி தடங்கல்களும் முடங்கல்களும் உருவாக வாய்ப்பு உள்ளது.

வாஜ்பாய் ஆட்சிக் காலத்திலேயே பெண்களுக்கு 33 சதவிகித இட ஒதுக்கீடு பற்றிய சட்ட மசோதா உருவாகிவிட்டது. ஆனால் எதிர்ப்பு பலமாக இருந்ததால் கிடப்பில் போடப்பட்டுவிட்டது.

இந்தக் காலக்கட்டத்தில் இதற்காக உழைத்த தமிழக அரசியல் பிரமுகர் சுதர்சன் நாச்சியப்பனின் பங்குப் பணி சாதாரணமானதல்ல. கிட்டத்தட்ட 90 சதவிகித சம்பிரதாயங்களை இவர் முடித்து வைத்துவிட்டார்.

கோல் கம்பம் வரை நெருங்கி வந்த இந்தப் பந்தை மறுபடி நடுக்கோட்டிற்கு உதைத்துத் தள்ளிவிட்டார்கள் சிலர்.

பெண்களுக்குக் கிடைக்கக்கூடிய இந்த நியாயமான சலுகையை எதிர்ப்பவர்கள் வெகு நாள் வரை திரைமறைவுக்காரர்களாகவே இருந்து வந்தார்கள்.

ஆனால் இப்போது சிலர் தங்களை அடையாளம் காட்டிக் கொள்ளத் துணிந்துவிட்டார்கள். அவர்களுள் முக்கியமானவர் சரத்யாதவ். இவரது எதிர்ப்பு மிகக் கடுமையாக இருக்கிறதே தவிர, பெண்களுக்கு இட ஒதுக்கீடு கூடாது என்பதற்கு இவர் சொல்லும் காரணங்கள் உளுத்துப் போனவையாகவே இருக்கின்றன.

எதிர்க் கட்சியான பாரதிய ஜனதா ஆதரிக்க, பெண்ணினத்தின் பெரும் பிரதிநிதியாக இன்று தலைமைப் பொறுப்பிலே சோனியா இருக்க, குட்டித் தேவதைகளின் குறுக்கீடுகளால் இச்சட்டம் நிறைவேறாமல் போய்விடுமோ என்கிற அச்சம் தொடர்கிறது.

இந்திய அரசியல் சட்டத்தின் நம்பகத்தன்மை உலக அளவில் தெரிய வேண்டுமானால், இது உண்மையான ஜனநாயக மண் என்றால் இச்சட்டம் நிறைவேற்றப்பட்டே ஆக வேண்டும். பாதிக்குப் பாதியா கேட்கிறார்கள்? மூன்றில் ஒரு பங்கு என்பது ஒன்றும் அநியாய சதவிகிதம் அல்லவே!

லாலு போன்றவர்களும் சரத்யாதவ் போன்றவர்களும் இதற்கு எதிர்ப்புத் தெரிவிப்பது மிகவும் துரதிர்ஷடவனமானது.

சிறுபான்மை இனத்தவர்களுக்கும் உள் ஒதுக்கிடு தேவை என்பது முலாயம் சிங்கின் கோரிக்கை. இது நியாயம் என்றாலும் இதற்குக் கால அவகாசம் கோராமல் முற்றிலுமாக எதிர்ப்பது உள்நோக்கமுடைய செயலாகவே படுகிறது.

ஒரு பெரும்பான்மைக் கட்சியின் ஆட்சி நடக்கிறது. முக்கிய எதிர்க்கட்சியும் ஆதரிக்கிறது. எனவே சிறுசிறு எதிர்ப்புகளை பொருட்படுத்தாமல் இம்மசோதா நிறைவேற்றப்படுமானால் சோனியாவுக்கு அது மிகப்பெரிய மணிமகுடமாக அமையும்.

லேனாவின் பார்வையில் முந்தைய கட்டுரைகள்

2009/06/12 நல் வாய்ப்பில் உயர்ந்துள்ள எதிர்பார்ப்பு!

2009/06/05 நேர்மையை நிரூபிக்கவேண்டிய கட்டாயம்!

2009/05/29 மெச்சும்படியான தீர்ப்பு!

2009/05/22 தேர்வில் வென்ற தேர்தல் ஆணையம்!

2009/05/15 தண்டிக்கும் எதிர்க்கட்சி! தாண்டிக் குதிக்கும் ஆளுங்கட்சி!

2009/05/08 நல்ல பூச்சுற்றல்!

2009/05/01 நிறம் மாறும் நிலைமை ஏன்?

2009/04/24 இன்னும்கூட அதிகம் எதிர்பார்க்கிறோம்!

2009/04/17 மனம் இரங்குவோம்!

2009/04/10 தீயினும் கொடியது காமம்!

2009/04/03 கிரிக் ‘கெட்டுப்’ போச்சு!