ஐ.பி.எல்., வெற்றியும் திருமணமும் விதிப்படி நடக்கும்: நடிகை ப்ரீத்தி ஜிந்தா

பப்ளி என்று இனியும் ப்ரீத்தி ஜிந்தாவை அழைக்க முடியாது. ‘அந்த வயசையெல்லாம் கடந்தாச்சுங்க’ என்று ப்ரீத்தியும் ஒப்புக்கொள்கிறார்.

தற்போது ஐ.பி.எல்., போட்டிகள் நடைபெறும் தென்ஆப்ரிக்க மைதானங்களில், தானும் ஒரு பங்குதாரராக இருக்கும் பஞ்சாப் அணி விளையாடும் போதெல்லாம் கேலரியில் ஆட்டம்போட்டு வீரர்களை உற்சாகப்படுத்தி வருகிறார் ப்ரீத்தி.

அவர் சமீபத்தில் ஐ.பி.என். லைவ் சேனலுக்கு அளித்த பேட்டி இது:

கேள்வி: திரைப்படங்கள், ஐ.பி.எல்., கிரிக்கெட், 34 ஏழை பெண் குழந்தைகளுக்கு ஆதரவு…  என்னாச்சு இப்படி கிளைக்குக் கிளை தாவிக்கொண்டேயிருக்கிறீர்கள்?

ப்ரீத்தி: (சிரித்தபடியே) வாழ்க்கை எப்படி இழுத்துச் செல்கிறதோ அதன் போக்கில் வாழ்பவள் நான். எதையும் நான் வித்தியாசமாக செய்யவே விரும்புகிறேன். என்னை மகிழ்விக்கும் செயலையே மேற்கொள்கிறேன். உங்கள் வார்த்தையிலேயே சொல்ல வேண்டுமானால் நான் கிளைக்குக் கிளைத் தாவிபடியே இருக்கிறேன். அதைதான் நானும் விரும்புகிறேன்.

கேள்வி: படங்களை தேர்வு செய்வதில் ரொம்ப கறார்ராக இருப்பது போல் தெரிகிறதே?

ப்ரீத்தி: ஆமாம். எப்போதுமே நான் எனக்கேற்ற கதாபாத்திரங்களையே ஏற்று நடித்திருக்கிறேன். இப்போது இன்னும் அதிக கவனம் செலுத்துகிறேன். நான் பாலிவுட்டுக்கு வந்து பத்தாண்டுகள் ஓடிவிட்டது. இன்னும் நான் கல்லூரி மாணவியாக, காதலியாக மரத்தைச் சுற்றி சுற்றி வந்து டூயட் பாடமுடியாது.  சவாலான கதாபாத்திரங்களை எதிர்நோக்கியுள்ளேன். தீபாமேத்தாவின் விதேஷ் போல அல்லது சல்மான், கரீனா நடிக்கும் மெய்ன் ஓளர் மிஸர்ஸ் கண்ணா- வில் போட்டிருக்கும் சிறப்பு ஆட்டம் போல… இன்னும் நான் மசாலா நாயகியாகவே இருக்க முடியாது.

கேள்வி: பப்ளி என்று செல்லமாக அழைக்கப்படுவதை இன்னும் ரசிக்கிறீர்களா?

ப்ரீத்தி: பப்ளி என்று மக்கள் என்னைச் செல்லமாக அழைத்ததை நான் எப்போதுமே ரசித்ததில்லை. அவர்களுக்கு அப்படித் தோன்றியது அழைத்தார்கள் அவ்வளவுதான். இனியும் அப்படி யாரும் அழைப்பதை நான் விரும்பவில்லை. மற்ற நாயகிகள் போல என் வயதை நான் மறைக்க விரும்பவில்லை.

கேள்வி: இந்த ஐ.பி.எல்., லை உங்கள் பஞ்சாப் அணி வெல்லுமா?

ப்ரீத்தி: நான் கைகளைக் கட்டிக்கொண்டு வேடிக்கை மட்டுமே பார்த்துக்கொண்டிருக்கிறேன். நான் கடன் வாங்கவில்லை, பஞ்சாப் அணியும் எனக்குக் கிடைத்த பரிசு அல்ல. நான் சம்பாதித்ததை வித்தியாசமானத் துறையில் முதலீடு செய்ய நினைத்தேன், செய்தேன். பஞ்சாப் லெவன் அணியை என்னுடைய இரண்டாவது குடும்பமாகத்தான் கருதுகிறேன். வெற்றியை நோக்கி அனைவரும் போராடுவோம். வெற்றி.. விதியின் கைகளில்.

கேள்வி: இந்த ஐ.பி.எல்.லில் நுழைந்திருக்கும் ஷில்பா ஷெட்டி பற்றியும் ஷாருக்கான் பற்றியும்…

ப்ரீத்தி: மேட்ச்சை பார்க்கறீங்களா?(சிரிக்கிறார்)

கேள்வி: என்ன திடீர்னு 34 ஏழை பெண் குழந்தைகளை தத்தெடுத்தீர்கள்?

ப்ரீத்தி: அது ஒன்றும் திடீரென்று நிகழ்ந்ததல்ல. ஏழைக்குழந்தைகளுக்கு குறிப்பாக, பெண் குழந்தைகளுக்கு ஏதாவது செய்யணும்னு என் மனசுக்குள்ளே லட்சியம் இருந்துகொண்டே இருந்தது. இந்த 34 பெண் குழந்தைகளும் பிறக்கும்போதே வறுமைக்கு வாழ்க்கைப்பட்டவர்கள். 10, 15 வருஷம் பொறுங்கள். அவர்கள் அத்தனைப் பேரும் எப்படியெல்லாம் ஆகப் போறாங்க பாருங்க.

கேள்வி: அதெல்லாம் இருக்கட்டும்…எப்போ கல்யாணம்?

ப்ரீத்தி: விதிப்படி அது நடக்கும்போது நடக்கும். என் குழந்தைகளுக்கு என்னையே அர்ப்பணிக்க நான் எப்பவும் தயார்.

புத்தகப் பூனை ஃபிடல் !

பிரிட்டன் கென்ட் நகர நூலகத்திற்கு பூனை ஒன்று தினசரி வருகை தருகிறதாம். கடந்த இரண்டு ஆண்டாக அதன் வருகை  தொடர்ந்து நடந்து வருகிறது.

கரேல் என்ற நிறத்தில் கண்கள் மட்டும் பளபளக்க புத்தகங்களின் மேல் எதையோ தேடும் ஃபிடல் என்கிற பூனைக்கு வயது எட்டு.  இவர் மியாவ் என்று குரலெழுப்ப மறந்தாலும் மறப்பார் கென்ட் நகரில் உள்ள டீல் நூலகத்திற்கு தினசரி வருவதை மட்டும் மறக்கவே மாட்டார்.

அப்படி என்ன இலக்கிய ருசியோ இந்த பூனைக்கு. காலையில் நூலகம் திறக்கும் முன்னேயே கதவுக்கு முன்பாக காத்திருப்பவர், நூலகம் திறந்ததும் ஓரே தாவாகத் தாவி உள்ளே நுழைந்துவிடுவார்.

நூலக பொறுப்பாளர் வரவில்லையென்றால் அவருடைய நாற்காலியில் போய் அமர்ந்து கொள்வார்.போரடித்தால் நூலகத்தின் ஒவ்வொரு பகுதியாகச் சுற்றி சுற்றிவருவார். வரிசையாக அடுக்கப்பட்டிருக்கும் புத்தகங்களின் மேல் ராஜநடை பயில்வார். புத்தகங்களின் மீது ஹாயாக ஒரு தூக்கம்கூட போடுவார். தன்னுடைய பெற்றோர்கள் (வளர்ப்பவர்கள்) வீடு திரும்பும்போது இவர் இடத்தை காலி பண்ணிடுவார்.

நூலகப்பணியாளர்களும் நல்லவர்கள் போலிருக்கிறது. இந்தப் பூனையாரை வலுக்கட்டாயமாக வெளியேற்றும் எந்த நடவடிக்கையையும் இதுவரை எடுத்ததில்லையாம். அதனுடைய வருகையை வரவேற்பது போலவே அவர்களும் நடந்து கொள்வதால் ஃபிடலும் திறந்த வீட்டில் நுழைந்த பூனையாக நுழைந்து விடுகிறார். ஆரம்பத்தில் வெளியே  விட்டாலும் ஃபிடல் மீண்டும் உள்ளே வந்துவிட அப்படியே விட்டுவிட்டார்கள். ஃபிடலும் காதலியைப் பார்க்க கடற்கரைக்குச் செல்லும் காதலனைப் போல, புத்தகங்களைப் பார்க்கவும் புத்தக வாசம் பிடிக்கவும் ரெகுலராக வர துவங்கிவிட்டது.

டீல் நூலகத்தின் மாவட்ட மேலாளர் ஹீத்தர் ஹில்டன் கூறுகையில், ”ஏதோ வந்தே தீரணும்கிற மாதிரிதான் ஃபிடல் இங்கே வருகிறது.  அதன் வருகை எங்கள் வாடிக்கையாளர்களுக்குப் பிடித்திருப்பதால் நாங்களும் கணடுகொள்வதில்லை. அதுமட்டுமல்ல ஃபிடலுக்கு கொஞ்சம் கலை ஞானமும் (​அப்படி ​போடு) இருக்கிறது. எங்கள் கேலரியில் இருக்கும் ஓவியங்கள் மற்றும் படங்களை ஃபிடல் பார்க்கும் பார்வையே வித்தியாசமாக இருக்கும”என்று பிடலின் செயல்களை வர்ணிக்கிறார்.

இந்த நூலகத்தை நடத்தும் கென்ட் கவுண்டி அமைப்பின் செய்தித் தொடர்பாளர் ஃபிடல் பற்றி கூறுகையில், ”எங்களோட முக்கியமான வாடிக்கையாளர்களில் மிகவும் முக்கியமானது ஃபிடல். சில நேரம் எங்கள் பணியாளர்கள் வருவதற்கு முன்பாகவே வந்து வாசலில் அது காத்திருக்கும் ”என்கிறார்.

தெருவோரமிருந்து காப்பாற்றப்பட்ட ஃபிடலை உள்ளூர் காப்பகம் ஒன்று பராமரித்து வந்தது. தற்போதைய அதன் முதலாளி அங்கிருந்து வாங்கி வந்துதான் வளர்த்து வருகிறார்.

புத்தகப் புழு கேள்விப்பட்டிருக்கிறோம். ஃபிடல் சரியான புத்தகப் பூனை போலிருக்கு!

மிஸ் சின்னத்திரையாக அஞ்சனா தேர்வு

சின்னத்திரை நடிகைகளுக்கான அழகிப் போட்டி சென்னையில் சனிக்கிழமை நடைபெற்றது.

விஷன் ப்ரோ ஈவண்ட் மேனேஜ்மெண்ட் நிறுவனம் நடத்திய இந்தப் போட்டியில் நடிகை அஞ்சனா (நடுவில் இருப்பவர்) மிஸ் சின்னத்திரை 2009- பட்டத்தை வென்றார். நடிகை ஐஸ்வர்யா (இடது) இரண்டாவது இடத்தையும் நடிகை ரஞ்சனி (வலது) மூன்றாவது  இடத்தையும் வென்றனர்.

இலங்கை எம்.பி., சிவாஜிலிங்கத்தை நாடு கடத்த வேண்டும்: காங்கிரஸ் வலியுறுத்தல்

தமிழக அரசியலில் குழப்பம் விளைவிக்கும் இலங்கை எம்.பி., சிவாஜிலிங்கத்தை நாடுகடத்த வேண்டும் என்று தமிழக சட்டப்பேரவை காங்கிரஸ் கட்சித் தலைவர் டி.சுதர்சனம் கேட்டுக்கொண்டுள்ளார்.

இது குறித்து அவர், பிரதமர் மன்மோகன் சிங், வெளியுறவுத்துறை அமைச்சர் பிரணாப் முகர்ஜி, தமிழக முதல்வர் கருணாநிதி, தலைமை தேர்தல் ஆணையர் நவீன் சாவ்லா ஆகியோருக்கு தந்தி அனுப்பியுள்ளார்.

அந்தத் தந்தியில் அவர் கூறியிருப்பதாவது:

‘இலங்கை எம்.பி., சிவாஜிலிங்கம் என்பவர் ஓர் இந்தியாவைச்சேர்ந்த அரசியல்வாதியைப் போல தமிழத்தில் தேர்தல் பிரசாரத்தில் நேரடியாக பங்கேற்று, குறிப்பிட்ட அரசியல் கட்சிக்கு ஆதரவாக வாக்கு சேகரிக்கும் பணியில் ஈடுபட்டு வருகிறார்.

இந்திய அரசியல் சாசன சட்டப்படியும், சர்வதேச பாஸ்போர்ட் விதிகளின்படியும் ஒரு நாட்டைச் சேர்ந்த எவரும் வேறொரு நாட்டு  அரசியல் விவகாரத்தில் தலையிடக்கூடாது. இந்த அடிப்படை நெறிமுறையை மீறி சிவாஜிலிங்கம் என்ற இலங்கை எம்.பி., தற்போது பா.ஜ.க., வேட்பாளர் இல.கணேசனுக்கு ஆதரவாகத் தேர்தல் பிரசாரம் செய்து வருகிறார்.

அதோடு மட்டுமில்லாமல் காங்கிரஸ் தலைவர்கள் பற்றியும், மத்திய, மாநில அரசுகள் பற்றியும் தரக்குறைவாகப் பேசி வருகிறார். அவருடைய செயல்கள் இந்திய அரசு அமைப்பு சட்டத்திற்கும், சர்வதேச பாஸ்போர்ட் விதிமுறைகளுக்கும் முற்றிலும் எதிரானது. கடுமையான தண்டனைக்கு உரியது. எனவே, இந்தியாவில் குழப்பம் விளைவிக்கும் செயலில் ஈடுபட்டுள்ள சிவாஜிலிங்கத்தின் பாஸ்போர்ட்டை உடனடியாக ரத்து செய்து அவரை நாட்டைவிட்டு வெளியேற்ற வேண்டும் என்று கேட்டுக்கொள்கிறேன்’ என்று கூறியுள்ளார்.

இலங்கைப் பிரச்னை நாடாளுமன்றத் தேர்தலில் எதிரொலிக்காது: கருணாநிதி

இலங்கைப் பிரச்னை நாடாளுமன்றத் தேர்தலில் எதிரொலிக்காது என முதல்வர் கருணாநிதி கூறியுள்ளார்.

சென்னை அண்ணா அறிவாலயத்தில் செவ்வாய்க்கிழமை செய்தியாளர்களிடம் அவர் கூறியது:

”எனது உண்ணாவிரதப் போராட்டம், எனக்கு முழு திருப்தியை அளித்துள்ளது. இலங்கையில் போர் நிறுத்தம் முழுமையாக அமல்படுத்தப்படும் என நம்புகிறேன்.

மழை விட்டும் தூவானம் தொடர்வது வழக்கம்தான். அதைப் போலத்தான் இலங்கையில் இப்போதும் தொடரும் விமானத் தாக்குதல்களைக் கருத வேண்டும்.

போர் நிறுத்தம் கோரி 2 மாதங்களுக்கு முன்பே உண்ணாவிரதம் இருக்க நான் முடிவு செய்தேன். ஆனால் திருமாவளவன், கி. வீரமணி, ராமதாஸ் ஆகியோர்தான் அந்த முடிவைத் தடுத்தனர்.

தமிழ்நாட்டிலுள்ள எதிர்க்கட்சியினருக்கு தேர்தல் களத்தில் பேசுவதற்கு எந்தப் பிரச்னையும் இல்லை. அதனால்தான் இலங்கைப் பிரச்னையைப் பற்றி மட்டுமே பேசுகின்றனர். ஆனால் தேர்தல் முடிவுகளை இலங்கைப் பிரச்னை எந்த அளவுக்கும் பாதிக்காது.

தனி ஈழத்தை மோசமாகத் தாக்கிப் பேசியவர்கள் இன்று ஆதரிக்கிறார்கள். தேர்தல்தான் அதற்குக் காரணம். தி.மு.க.வைப் பொருத்தவரை 50 ஆண்டு காலமாக தனி ஈழத்தை ஆதரித்து வந்திருக்கிறோம். பல தீர்மானங்களை நிறைவேற்றியிருக்கிறோம்.

இப்பிரச்னையில் இன்றைய சூழலில் மார்க்சிஸ்ட் கட்சியின் நிலையே, எங்களது நிலையும் ஆகும். சிங்களர்களுக்கு இணையாக தமிழர்களுக்கும் சகல உரிமைகளும் வழங்கப்பட வேண்டும். தமிழர்களுக்கு சுயாட்சி உரிமை கிடைத்திட வேண்டும் என்பதே அது.

அதையும் மீறி தனித் தமிழ் ஈழம்தான் வேண்டும் என தமிழ்ப் போராளிகள் போராடி வெற்றி பெற்றால், அதுவும் மகிழ்ச்சி அளிக்கக் கூடியதுதான்.

போராளிகளும், இலங்கை அரசும் உட்கார்ந்து பேசி, தமிழ் மக்களுக்கு நன்மை பயக்கும் எந்தத் தீர்வு ஏற்பட்டாலும், அது வரவேற்கக் கூடியதே.

இப்போதைய போரில் ஒருவேளை விடுதலைப் புலிகள் முற்றாக ஒழிக்கப்பட்டாலும் கூட, புல், பூண்டுகள் அழிந்த மண்ணில், மீண்டும் புதிய செடிகள் முளைப்பதைப் போல புதியவர்கள் பிறப்பார்கள். அதுதான் விடுதலைப் போராட்ட இயக்கங்களின் வரலாறு.

சூழலுக்கேற்ப ஒப்பந்தம்: ராஜீவ்காந்தி - ஜெயவர்த்தனே இடையேயான இந்திய - இலங்கை ஒப்பந்தத்தை இன்று அப்படியே அமல்படுத்த முடியாது. காலத்துக்கேற்ப மாற்றம் செய்ய வேண்டும். அதில் திருத்தங்களைச் செய்த பிறகே அமல்படுத்த முயல வேண்டும்.

இன்றைய சூழலில் எத்தகைய ஒப்பந்தம் தேவை என்பது குறித்து நாங்கள் ஏற்கெனவே அமைத்துள்ள நீதியரசர் குழுவுடன் விவாதித்து, அதை மத்திய அரசு மூலம் நிறைவேற்ற முயற்சி செய்வோம்.

இலங்கையின் மீது இந்தியா பொருளாதாரத் தடை விதிக்க வேண்டும் என்பதை ஏற்க முடியாது. இதனால் இலங்கை அரசுக்கு மட்டுமல்ல; இலங்கை மக்களுக்கும் பாதிப்பு ஏற்படும் என்பதை கருத்தில் கொள்ள வேண்டும்.

மக்களவைத் தேர்தலுக்குப் பிறகு காங்கிரஸ் தலைமையிலான இப்போதைய கூட்டணியே மீண்டும் மத்தியில் ஆட்சி அமைக்கும். மன்மோகன் சிங்கே மீண்டும் பிரதமர் ஆவார். அவரைத் தவிர வேறு யாரையும் பிரதமராக ஏற்றுக் கொள்ள மாட்டோம்.

மத்தியில் இடதுசாரி கட்சிகள் ஆதரவு கிடைத்தால்தான் ஆட்சி அமைக்க முடியும் என்ற நிலை ஏற்பட்டால், அத்தகைய அரசில் இடம்பெறுவது பற்றி தேர்தலுக்குப் பின் எங்கள் கட்சியின் பொதுக்குழு கூடி முடிவு செய்யும்’ என்றார் கருணாநிதி.

உலகக் கோப்பை கிரிக்கெட்: இந்தியாவில் 29 ஆட்டங்கள்

2011 உலகக் கோப்பை கிரிக்கெட் போட்டியில் பாகிஸ்தானில் நடைபெற இருந்த ஆட்டங்கள் இந்தியா, இலங்கை, வங்கதேசத்துக்கு மாற்றப்பட்டன. மும்பையில் செவ்வாய்க்கிழமை நடைபெற்ற போட்டியின் ஒருங்கிணைப்புக் குழு கூட்டத்தில் இம்முடிவு எடுக்கப்பட்டது.

இது குறித்து சர்வதேச கிரிக்கெட் கவுன்சில் தலைமை நிர்வாக அதிகாரி ஹரூண் லோர்கட் கூறியதாவது:

”புதிய திட்டத்தின் படி மொத்தம் நடைபெற உள்ள 49 ஆட்டங்களில் இந்தியாவில் 8 இடங்களில் 29 ஆட்டங்கள் நடைபெறும். இலங்கையில் 3 இடங்களில் 12 ஆட்டங்களும், வங்கதேசத்தில் 2 இடங்களில் 8 ஆட்டங்களும் நடைபெறும்.

2 காலிறுதி ஆட்டங்கள் வங்கதேசத்திலும், தலா ஒரு காலிறுதி ஆட்டம் இந்தியாவிலும், இலங்கையிலும், தலா ஓர் அரை இறுதி ஆட்டம் இந்தியாவிலும், இலங்கையிலும், இறுதி ஆட்டம் இந்தியாவிலும் நடைபெறும்.

போட்டியின் தொடக்க நிகழ்ச்சி பிப்ரவரி 18-ல் பெங்களூரிலும், முதல் ஆட்டம் ஏற்கெனவே திட்டமிட்டபடி பிப்ரவரி 19-ல் வங்கதேசத்திலும் நடைபெறும்.

பாகிஸ்தானில் 14 ஆட்டங்கள் நடைபெறுவதாக இருந்தது. அவற்றில் 8 ஆட்டங்கள் இந்தியாவிலும், 4 ஆட்டங்கள் இலங்கையிலும், 2 ஆட்டங்கள் வங்கதேசத்திலும் நடைபெறும்” என்றார்.

போட்டியின் செயலகமாக லாகூர் அறிவிக்கப்பட்டிருந்தது. போட்டியின் செயலகமாக மும்பை மாற்றி அறிவிக்கப்பட்டுள்ளது.

தவறானத் தகவல் தந்த பாண்டியன் விலகவேண்டும்: முதல்வர் கருணாநிதி

இ.கம்யூனிஸ்ட் கட்சியின் தமிழகச் செயலர் தா.பாண்டியன் வடசென்னை தொகுதியில் போட்டியிடுகிறார். அவருடைய வேட்பு மனு தாக்கலின்போது தவறான தகவல்கள் அளிக்கப்பட்டுள்ளதாக முதல்வர் கருணாநிதி குற்றம் சாட்டியுள்ளார். அவருடைய மனு ஏற்கப்பட்டது குறித்து தக்க சட்டப்பூர்வமான நடவடிக்கைகளை மேற்கொள்வோம் என்றும் அவர் கூறினார்.

இது குறித்து கருணாநிதி நேற்று நிருபர்களிடம் கூறியதாவது:

தா.பாண்டியன் மனு தாக்கல் செய்ததில் நடைபெற்றுள்ள தவறுகள், மறைத்துள்ள மோசடிகள் பற்றி ஆதாரபூர்வமாக வெளியிட்டுள்ளேன். இதை நான் வெளியிடுவதன் மூலம் அவர் சார்ந்திருக்கிற கம்யூனிஸ்ட் கட்சியே அவர் மீது நடவடிக்கை எடுக்கும் என்று எதிர்பார்க்கிறேன். கம்யூனிஸ்ட் கட்சியில் இது போன்ற தவறுகளை அனுமதிக்க மாட்டார்கள். இதை வெளியிட்ட பின் அந்த கட்சியினர் என்ன செய்யப் போகின்றனர் என்பதை பொறுத்திருந்து பார்க்க வேண்டும். நிலத்தை வாங்கவில்லை என்று பாண்டியன் சொல்வது உண்மையல்ல.

தி.மு.க., சட்ட ஆலோசகர் ஜோதி கூறியதாவது: சுப்ரீம் கோர்ட் தீர்ப்பின்படி, வேட்பாளர் மனு தாக்கல் செய்யும்போது, சொத்து சம்பந்தப்பட்ட தகவல்கள் முழுவதும் தர வேண்டும். தா. பாண்டியன் தாக்கல் செய்துள்ள மனுவில் பட்டா எண் 744ல் தனக்கு ஐந்து ஏக்கர் நிலமும், அண்ணா நகரில் 40 லட்சம் ரூபாய் மதிப்பில் வீடு உள்ளதாகவும் கூறிப்பிட்டுள்ளார். இந்த சொத்துகள் குறித்து முழு விவரத்தையும் அவர் தெரிவிக்கவில்லை. அவர் குறிப்பிட்ட பட்டா எண்ணில் 2.62 ஏக்கர் நிலம் மட்டுமே உள்ளது. ஏழு ஏக்கர் நிலம் அவருக்கு சொந்தமாக உள்ளது. ஆனால், ஐந்து ஏக்கர் மட்டுமே மனுவில் குறிப்பிட்டுள்ளார்.

அதே போல் கடந்த ஆண்டு பிப்ரவரி 11ம் தேதி ஒரு லட்சத்து 79 ஆயிரம் ரூபாய் மதிப்பில் பாண்டியன் ஒரு சொத்து வாங்கியுள்ளார். அதை பிப்ரவரி 2ம் தேதி பதிந்துள்ளார். அதற்கான பத்திரப் பதிவில் இரண்டு இடங்களில் அவரது போட்டோ ஒட்டி 15 இடங்களில் கையெழுத்திட்டுள்ளார். அவர் வாங்கிய சொத்தை மறைத்துள்ளார். இதன்படி, அவர் தேர்தலில் நிற்க தகுதியிழந்துள்ளார். அவரது மனு செல்லாது என்பது சட்ட நிலைமை. இதைக் குறிப்பிட்டு நாங்கள் ஆட்சேபனை தெரிவித்தோம். ‘பத்திரப்பதிவில் உள்ள கையெழுத்து தன்னுடையது இல்லை. நான் மனுவில் தாக்கல் செய்தது தவிர வேறு சொத்து எனக்கு இல்லை’ என்று பாண்டியன் தெரிவித்துள்ளார்.

இவ்வாறு ஜோதி தெரிவித்தார்.

பின்னர் முதல்வர் கருணாநிதி கூறுகையில், ”அண்ணா அறிவாலயத்தில் நடந்த அனைத்துக் கட்சி கூட்டத்தில் அவர் போட்டுள்ள கையெழுத்தும் இந்த கையெழுத்தும் ஒன்றாக உள்ளது. இந்நிலையில், தேர்தல் கமிஷன் மனுவை ஏற்றது தவறு. இந்திய தேர்தல் ஆணையர் மற்றும் நரேஷ் குப்தாவின் கண்டிப்பு என்ன ஆயிற்று என்ற கேள்வி எழுகிறது. ஊழல் அடிப்படையில் இந்த மனு ஏற்றுக் கொள்ளப்பட்டுள்ளது. இதையும் மீறி போட்டியில் இருந்து தா.பாண்டியன் விலகவில்லை என்றால் மக்கள் தீர்ப்புக்கு விடுகிறோம்” என்றார்.

‘தி.மு.க.,விற்கு எதிராக தேர்தல் ஆணையம் செயல்படுகிறதா’ எனக் கேட்டபோது,

”சந்தர்ப்பத்திற்கு ஏற்றவாறு தேர்தல் செயல் அதிகாரிகள் நடந்துகொள்கின்றனர். அதிகாரிகளில் சிலர் தவறு செய்கின்றனர் என நரேஷ் குப்தாவே சொல்லியிருக்கிறார். நல்ல தீர்ப்பு தருகிற, நடுநிலையில் உள்ள நரேஷ் குப்தாவிடம் நான் ரொம்ப எதிர்பார்க்கிறேன். அவரது கையை மீறி போகும்போது, சட்டப்பூர்வமான நடவடிக்கையை தி.மு.க., எடுக்கும். இவ்வாறு முறைகேடாக அனுமதிக்கப்பட்ட மனுவை பற்றி நீதிமன்றத்தில் கேள்வி கேட்க உரிமை இருக்கிறது” என்றார் கருணாநிதி.

அமைச்சர் ஆற்காடு வீராசாமி கூறுகையில், ”திருவள்ளூர் அ.தி.மு.க., வேட்பாளர் வேணுகோபால் சென்னையில் ஒரு வீடு வாங்கியுள்ளார். அதற்கு சொத்துவரி செலுத்தவில்லை. ஏற்கனவே தேர்தலில் போட்டியிட்டதற்கான கணக்கு கொடுக்கவில்லை. இதற்காக ஆறு ஆண்டு நிற்க கூடாது என சட்டம் உள்ளது. இதை பரிசீலிக்காமல் அவரது மனு ஏற்கப்பட்டுள்ளது. இது குறித்து வழக்கு தொடுக்கப்பட்டு உள்ளது” என்றார்.

ஐந்து வருடத்தை ஃபோனில் பேசியே கழிக்கும் பிரிட்டன் பெண்கள்!

பேசுவதில் பெண்களை மிஞ்ச ஆணால் முடியாது என்பதை பிரிட்டன் பெண்களும் நிரூபித்து விட்டார்கள்.

பிரிட்டனைச் சேர்ந்த ஒரு பெண் தன் வாழ்நாளில் சுமார் 5 வருடங்களை தொலைபேசியில் கதைப்பதையே வேலையாக வைத்திருக்கிறார். சமீபத்தில் செய்யப்பட்ட ஒரு ஆராய்ச்சியில் இந்த உண்மை தெரிய வந்துள்ளது. பிரிட்டன் பெண்கள் தங்கள வாழ்நாளில், தொலைபேசி மூலம் 2,88,000 முறை ஒன்று அழைக்கிறார்கள் அல்லது அழைக்கப்படுவார்கள். இது கிட்டதட்ட 42,000 மணி நேரத்திற்கு ஈடானது. அதன் கால அளவு 4.75 வருடங்கள்.

இதிலும் ஆண்கள் பெண்கள் கீழேதான் உள்ளனர். பிரிட்டன் ஆண்கள் தங்கள் வாழ்நாளில், தொலைபேசி மூலம் 2,77,000 முறை அழைக்கிறார்கள் அல்லது அழைக்கப்டுகிறார்கள். அதாவது, 28,500 மணிநேரம் அல்லது 3.25 வருடங்கள்.

இதி்ல் 55 சதவிகித தொடர்புகள் அலுவலக அல்லது தொழில்ரீதியானவை. 45 சதவிகிதம் சுய தேவைக்கான அழைப்புகள். இதிலும் என்ன ஆச்சரியம் என்றால், சுய தேவைக்கான அழைப்புகளின் சதவிகிதம் குறைந்தாலும், பேசும் குறைந்தபட்ச நேரம் (10 நிமிடம்) அதிகமாகவும், தொழில்ரீதியாக செய்யப்படும் அழைப்புகள் பேசும் நேரம் (5 நிமிடம்) குறைவாகவும் காணப்படுவதே.

இந்தியப் பெண்கள என்றில்லை இங்கிலாந்து அம்மணிகள் கூட செல்போன் என்றால் மதிமயங்கிப்போய் பேசிக்கொண்டே  இருக்கிறார்களாம். வாரத்திற்கு சுமார் 15 மணிநேரத்தை அவர்கள் செல்போனில் பேசுவதிலே செலவிடுகிறார்கள். இதில் என்ன கூத்து என்றால், அவர்கள் பயன்படுத்தும் செல்போன்களில் பாதிக்கும் மேல் அப்பாவோ, அண்ணனோ, யாரோ வாங்கிக் கொடுத்ததாக இருக்கிறது. பில் கூட உறவினர்கள் கட்டுகிறார்கள்.

அதுமட்டுமல்ல முக்கால் வாசி அழைப்புகளை தவிர்க்க, ஏதாவது ஒரு பொய்க் காரணத்தை 10 இல் 8 பேர் சொல்கிறார்களாம்(இங்கே மட்டும் என்ன வாழுதாம்?). அதில், யாரோ வந்துருக்காங்க… அப்புறம் பண்றேன், நான் பண்றேன் நீங்க வையுங்க, பசங்களா… பக்கத்தில் (இருந்தாலும்) விளையாடப் போயிருக்காங்க… இப்படி ஏகப்பட்ட பொய்க் காரணங்கள் கூறப்படுகின்றவாம்.

10க்கு 7 பேர் தங்களுக்கு வரும் அனாமதேய அழைப்புகளை எடுப்பதில்லை. 42 சதவிகித அழைப்புகள் வாய்ஸ் மெய்ல்களாக மாறுகின்றன.மூன்று பேரில் ஒருவருக்கு இரவு பத்து மணிக்கு மேல் அழைப்பது பிடிக்கவில்லை. நள்ளிரவு வரை சளைக்காமல் பேசுபவர்கள் வெறும் சதவிகிதத்தினர் தான். ஐவரில் ஒருவருக்கு, ராங் நம்பருக்கு அழைப்புச் சென்று வெறுப்பேற்றுகிறது.

பெண்கள் எதைப் பேசினாலும் அது பேசப்படக்கூடிய ஒன்றாக ஆகிவிடுகிறது.

குங்குமப்பூவும் கொஞ்சும்புறாவும் - திரை விமர்சனம்

நடிப்பு: ராமகிருஷ்ணன், தனன்யா, சந்திரா, ஈஸ்வரி, தருண் சத்ரியா
ஒளிப்பதிவு: சித்தார்த்
இயக்கம்: ராஜமோகன்
இசை: யுவன்சங்கர்ராஜா
தயாரிப்பு: எஸ்.பி.சரண்

பிழைப்புத் தேடி முட்டம் வருகிறது குட்டிப்புறாவான தனன்யா, தன்னுடைய பாட்டியுடன். அவர்களுக்கு அடைக்கலம் தருகிறது ராமகிருஷ்ணனின் குடும்பம். அங்கிருந்தபடியே பள்ளிக்குச் செல்கிறார் தனன்யா. அவருக்குத் துணையாகச் செல்கிறார் ராமகிருஷ்ணன். சும்மா இருக்குமா காலம்? இருவரையும் காதலில் கட்டிப் போடுகிறது.

காதல் விவகாரம் தெரிய வந்ததும் ராமகிருஷ்ணனின் தாய் சந்திரா, தனன்யாவையும் பாட்டியையும் ஊரைவிட்டு துரத்துகிறார்.

தூத்துக்குடிக்குச் செல்லும் தனன்யா அவருடைய உறவுக்காரரான தருணுக்கு திருமணம் செய்து தரப்படுகிறார். திருட்டுப்பயலான தருண் கொலை வழக்கு ஒன்றில் சிறைக்குச் செல்கிறார். அங்கிருந்தால், மாமியார் தன்னை விபசாரத்தில் தள்ளிவிடுவார் என பயப்படும் தனன்யா மீண்டும் முட்டம் வருகிறார். 

ராமகிருஷ்ணனைச் சந்திக்கிறார். அவருடைய உண்மையானக் காதலை புரிந்துகொள்கிறார். அப்புறம்… திரையரங்கில் பார்த்தால் தான் த்ரில்லா இருக்கும்(அப்படி ஒண்ணும் த்ரில் இல்லீங்க).

புதுமுகங்கள் என்று அறிமுகமாகும் ராமகிருஷ்ணன், தனன்யா உள்பட புதுமுகங்கள் எல்லாருமே தங்கள் கதாபாத்திரத்தை உணர்ந்து, பழைய முகங்கள் போலவே காட்சியளிப்பது நல்ல விஷயம்.

முதல் பாதியில் பாரதிராஜாவின் வாடை வீசுகிறது. இரண்டாம் பாதியில் தடம் புரண்ட ரயிலாக சரிகிறது. யதார்த்தம் என்று காட்டிக்கொள்ள வசதியாக எடுக்கப்பட்ட காட்சிகள் பல எரிச்சலை வரவழைக்கின்றன.

காதல் தோல்வி என்றால் தண்ணி அடிச்சுட்டு ஊர் வம்பை விலைக்கு வாங்கனும் என்பது இயக்குநர் ராஜமோகனுக்கும் தெரிந்திருக்கிறது! ஏங்க இப்படி படுத்துறீங்க.
 
யுவன்சங்கர்ராஜா இருப்பது பின்னணி இசையில் மட்டுமே தெரிகிறது. கிராமத்து வாடையை தனது கேமிராவில் நன்றாக வெளிப்படுத்தியிருக்கிறார் ஒளிப்பதிவாளர் சித்தார்த்.

தயாரிப்பாளர் எஸ்.பி.சரண் கொடுத்த அருமையான வாய்ப்பை இன்னும் அதிகமாகப் பயன்படுத்திக் கொண்டிருக்கலாம் இயக்குநர் ராஜமோகன்.

ஸ்வைன் இன்புளுயன்சா அபாயம், இந்தியா உஷார் : அமெரிக்காவில் எமர்ஜென்சி

அமெரிக்கா மற்றும் மெக்சிகோ போன்ற நாடுகளில் பன்றிகளால் வரும் இன்புளூயன்சா நோய் (ஸ்வைன் இன்புளுயன்சா) பரவியுள்ளதாக உலக சுகாதார மையம் அறிவித்துள்ளது.

இதைத்தொடர்ந்து விமான நிலையங்கள், துறைமுகங்கள், போன்ற பகுதிகளில் கண்காணிப்பு மையங்கள் அமைக்கப்பட்டுள்ளது. மேலும், பாதிக்கப்பட்ட பகுதிகளுக்கு தேவையில்லாமல் செல்ல வேண்டாம் என இந்திய அரசு கேட்டுக்கொண்டுள்ளது.

இது குறித்து விவாதிக்க பல்வேறு அமைச்சகங்களின் கூட்டுக் கண்காணிப்புக் குழு நேற்று கூடியது.அந்தக் கூட்டத்தில் தீர்மானிக்கப்பட்ட விவரங்கள் வருமாறு:

விமான நிலையங்கள், துறைமுகங்களில் மருத்துவக் குழுவினர் நியமிக்கப்படவேண்டும்.

அமெரிக்கா, மெக்சிகோ, கனடா, ஸ்பெயின், நியூசிலாந்து, பிரான்ஸ் மற்றும் ரஷ்யா போன்ற நாடுகளில் இருந்து வருபவர்களுக்கு இன்புளுயன்சா தாக்குதல் இருக்கிறதா என தீவிரமாகப் பரிசோதிக்க வேண்டும்.

அவர்களில் வைரஸ் தொற்று உள்ளவர்களை தனியே பிரித்து தகுந்த சிகிச்சை அளிக்கவேண்டும்.

இந்த வைரசின் இன்குபேஷன் காலம் ஏழு நாட்கள். எனவே, பாதிக்கப்பட்ட நாடுகளில் இருந்து கடந்த 10 நாட்களில், இந்தியா வந்தவர்களில் யாருக்கேனும் தொடர்ந்து இருமல், தும்மல் போன்ற அறிகுறிகள் இருந்தால், அவர்களைக் கண்டறிந்து மருத்துவமனையில் அனுமதித்து தனியாகச் சிகிச்சை அளிக்க வேண்டும்.

என்று தீர்மானிக்கப்பட்டது.

இது குறித்து சுகாதாரம் மற்றும் குடும்ப நலத்துறை  அமைச்சக இணைச் செயலர் வினீத் சவுத்ரி கூறுகையில்,

”நிலைமையைச் சமாளிக்கும் அளவுக்கு மருந்துகள், உபகரணங்கள் மற்றும் பயிற்சி பெற்ற மருத்துவர்கள் எங்களிடம் உள்ளனர்”என்றார்.

பன்றிகளால் வரும் இந்த இன்புளுயன்சா நோளால் மெக்சிகோ நாட்டில் 103 பேர் உயிரிழந்துள்ளனர். ஸ்பெயினில் ஒருவருக்கு இந்த நோயின் தாக்குதல் ஏற்பட்டுள்ளதாகக் கண்டுபிடிக்கப்பட்டுள்ளது.

மெக்சிகோவை இன்புளுயன்சா தாக்கியதைத் தொடர்ந்து அமெரிக்கா உள்பட மேற்கத்திய நாடுகளில் இதுகுறித்த செய்திகள் பரபரப்பாக பேசப்பட்டுவருகிறது. அமெரிக்காவில் முன்னெச்சரிக்கை நடவடிக்கையாக எமர்ஜென்சி அறிவிக்கப்பட்டுள்ளது.