தமிழ் ஈழம் ஏன் தாமதம்? முதல்வர் கருணாநிதி விளக்கம்

சகோதரச் சண்டையினால் தான் தமிழ் ஈழம் கிடைப்பது தாமதமாகி விட்டது என்று முதல்வர் கருணாநிதி கூறியுள்ளார்.

தி.மு.க., சொற்பொழிவாளர்கள் கூட்டம், முதல்வர் கருணாநிதி தலைமையில் நேற்று நடந்தது.

கூட்டத்தின் முடிவில் முதல்வர் கருணாநிதி பேசியதாவது:

”நம்முடைய சொற்பொழிவாளர்களுக்கு பல குறைகள் இருக்கின்றன; எனக்குத் தெரியும். குறைகள் முழுமையாக தீர்க்கப்படாவிட்டாலும், எங்களால் இயன்ற அளவிற்கு களையப்படும். இந்தத் தேர்தலில் மத்திய, மாநில அரசுகளின் குறைகளை எடுத்துக்காட்டி, பிரசாரம் செய்து, வெற்றி பெறலாம் என்ற நம்பிக்கை, எதிர்க்கட்சியினருக்கு இல்லை. தமிழகத்தைப் பொறுத்தவரை எதைச் சொல்லி மக்களுடைய உணர்ச்சிகளைத் தூண்டலாம் என்று கணக்கிட்டு, இலங்கைத் தமிழர் பிரச்னையை கையில் எடுத்துள்ளனர்.

முதலில், இந்திய கம்யூனிஸ்ட் கட்சி சார்பில் சென்னையில் உண்ணாவிரதம் தொடங்கினர். ஏதோ இவர்கள் தான் இலங்கைத் தமிழர்களுக்காகப் பாடுபடுபவர்கள் என்பதை காட்டிக்கொள்ள அதைச் செய்தனர். தமிழக அரசின் சார்பில் அனைத்துக் கட்சிக் கூட்டம் நடத்தி, போர் நிறுத்தம் செய்யாவிட்டால் எம்.பி.,க்கள் ராஜினாமா செய்வது என்று தீர்மானம் நிறைவேற்றினோம். இதன்படி தி.மு.க., எம்.பி.,க்கள் ராஜினாமா கடிதம் கொடுத்தனர். ஆனால், இன்றைக்கு துடிப்போடு பேசுகிற பா.ம.க., - ம.தி.மு.க., - கம்யூனிஸ்ட் கட்சிகளோ, தங்களது எம்.பி., பதவியை ராஜினாமா செய்யவில்லை.

ஜனநாயக ரீதியில் அங்கேயுள்ள மக்கள் ஓட்டளித்து தமிழ் ஈழம் உருவாகுமேயானால், அதைப் பார்த்து என்னை விட மகிழ்ச்சி அடைபவர்கள் யாரும் தமிழகத்தில் இருக்க முடியாது.

தமிழ் ஈழம் கிடைப்பதற்கு தமிழ் ஈழத்தில் உள்ளவர்கள் தான் முட்டுக்கட்டையாய் உள்ளனர். சகோதரச் சண்டையால் தான் தமிழ் ஈழம் கிடைப்பதற்கு இவ்வளவு தாமதமாகி விட்டது. அங்கே போர்க் களத்தில் இருக்கிற போராளிகளிடத்தில் மட்டுமல்ல, அவர்களை ஆதரிப்பதாக சொல்லுகிற நம்மிடையேயும் சகோதரச் சண்டை நடக்கிறது. நாம் ஏதோ இலங்கைத் தமிழர்களுக்கு விரோதிகள் என்பதைப் போலவும், அவர்களுக்கு எதுவும் செய்யவில்லை என்பதைப் போலவும் பிரசாரம் செய்வதை, புள்ளி விவரத்தோடு நமது சொற்பொழிவாளர்கள் மறுக்க வேண்டும்.

இந்தத் தேர்தலில் நாம் பெறும் வெற்றியின் மூலம், நம்மை தமிழ் உணர்ச்சிக்கு மாறுபட்டவர்கள் என்று கூறிய போலித் தமிழர்களை அடையாளம் காட்ட வேண்டும்.

மேடையில் கண்ணியமாக, கடமையுணர்வோடு பேச வேண்டும். வெற்றி முக்கியமல்ல; அதை பெறுவதற்கு நாம் கடைபிடிக்கின்ற வழிமுறைகள் முக்கியமானவை. நம்முடைய சொற்பொழிவுகள், மாற்றாரையும் நம் பக்கம் இழுக்கும்படியாக இருக்க வேண்டும்”என்று பேசினார்.

சூப்பர் ஷாட்ஸ்!

சூப்பர் ஷாட்டுன்னு ஈஸியா சொல்லிடறோம். அதை எடுக்க நம்ம போட்டோகிராபர்கள் எவ்வளவு கஷ்டப்படுறாங்கத் தெரியுமா?

சில நேரம் அவங்களே சூப்பர் ஷாட் ஆகிடறதுதான் சூப்பர்ங்க!

பல்டியடிச்சாக் கூட நடக்காதுன்னு சொன்னே. நான் கேட்டாதானே, இப்படி கவுத்துப்புட்டியே!

உன்னையும் எப்படி என் அளவுக்கு இறங்க வச்சுட்டேன் பார்த்தீயா!

எதையோ உயிரைக் கொடுத்து எடுக்கப் பார்க்கறாரு. இவர் உயிரு ஊஞ்சலாடிகிட்டு இருக்கறது தெரியாம.

ஏண்டா… சூப்பர் ஷாட்டுக்காக எங்களைப் படுத்தறீங்க.

மவனே இன்னும் கொஞ்சம் கிட்டவந்தேன்னு வச்சுக்கே ஒரே குத்துதான். லென்ஸ் பீஸ்பீஸாயிடும் ஜாக்கிரதை!

ஹலோ… அப்பா, அம்மாவை பக்கத்தில வச்சுக்கிட்டு கேமரா வழியே வேற ஃபிகரப் பார்த்து ஜொள்ளு விட்டது போதும். கழுத்து வலிக்குது இறக்கி விடு என்கிறதோ குழந்தை.

அப்படியே கவுந்து ஆத்தோட போயிட்டின்னா, ஆண்டனியோட ஐஸ்லாந்துக்கு பறந்துடுவேன்.

நாங்க எடுக்கறது போட்டோதான். ஆனா, எங்க பரம்பரை கலைகளான குங்ஃபூ, கராத்தே கலையெல்லாம் மறக்க மாட்டோம்.

ஒண்ண எடுக்க, இன்னொண்ண கவுக்கனுமா என்ன?

என்னதான் கத்துக்குட்டின்யினாலும் அதுக்காக இப்படியா?

தடுக்கி விட்ட புல்லை ஞாபகார்த்தமாக படம் எடுத்து வச்சுக்கிறாரோ!

அப்படி என்னதான் உள்ளே வச்சுருக்காருன்னு தெரியலையே!

மனுஷன போட்டோ எடுக்க நான் போதாதா?

சப்ஜெக்ட் எப்படி இருக்கோ, நான் அப்படிதான் போட்டோ எடுப்பேன்னு அடம்பிடிச்சா எப்படி?

நான் ஒண்ணும் இந்திய அரசியல் கட்சிகள் போல இல்ல, அடிக்கடி தாவ. இருந்தாலும் நீ சட்டுபுட்டுன்னு எடுத்துட்டு ஆளை விடுப்பா!

படத்தை விட அதிகப் பணம் கொடுத்த விளம்பரம்:
ஸ்லம்டாக் மில்லியனர் -  ரூபியானா மகிழ்ச்சி

ஆஸ்கார் விருதுகளை அள்ளிக் குவித்த ஸ்லம்டாக் மில்லியனர் திரைப்படத்தில் குழந்தை நட்சத்திரமாகத் தோன்றிய சேரிக்குழந்தை  ரூபியானா அலி. இவளுக்கு ஸ்லம்டாக் திரைப்படத்தில் நடித்ததற்காக தரப்பட்ட சம்பளத்தை விட அதிகப் பணம் விளம்பரம் ஒன்றின் மூலமாக கிடைத்துள்ளது.

ஹாலிவுட் நட்சத்திரம் நிக்கோல் கிட்மேனோடு ரூபியானா அலி நடித்த குளிர்பான விளம்பரத்திற்கு, ஸ்லம் டாக் திரைப்படச் சம்பளத்தை விட அதிகப் பணம் கிடைத்திருப்பதாக ரூபியானாவின் தந்தை ரபீக் அலி தகவல் தெரிவித்துள்ளார்.

இது குறித்து அவர் மேலும் கூறுகையில், ”ஸ்லம்டாக் மில்லியனர் திரைப்படத் தயாரிப்பாளர்கள் தாங்கள் உறுதிகொடுத்த பல விஷயங்களை நிஜத்தில் நிறைவேற்றவில்லை. என் பெண்ணின் கல்விக்காக மாதா மாதம் அளிப்பதாகச் சொன்ன 21 பவுண்டை  அனுப்புவதைக் கூட நிறுத்தி விட்டனர்” என்றவர்,

”இந்த குளிர்பான விளம்பரம் மூலம் ஸ்லம்டாக் மில்லியனர் படச் சம்பளத்தைவிட அதிகப் பணம் கிடைத்ததில் மகிழ்ச்சியாக இருக்கிறது.  என் மகள் இன்னும் நிறைய சாதித்து பெரிய நடிகை ஆவாள். ஒரு நாள் நாங்களும் சொந்த வீடு வாங்குவோம்” என்று நம்பிக்கையுடன் கூறினார்.

காதலை உறுதி செய்யும் இருகோடுகள்!:
கணக்கு வாத்தியார் போடும் காதல் கணக்கு

மனம் ஒத்த தம்பதிகளுக்குக்கூட சில பல சந்தர்ப்ப சூழ்நிலைகள் காரணமாக, தன் ஜோடி மீது சந்தேகம் வரலாம். காலம்பூரா உடன் இருப்பாளா, இருப்பானா, கழட்டி விடுவாளா, விடுவானா என்றெல்லாம் எண்ணம் ஒடலாம். அடுத்ததாக, அவர்கள் மூச்சிரைக்க ஓடிபோய்ப் நிற்குமிடம் ஜோதிடர் வீடாக இருக்கும்.

காதலை, அன்பை அளக்க ஜோதிடமா? என்கிட்ட வாங்க, சின்னதாக ஒரு கணக்குபோட்டு காதல் தொடருமா, முறியுமான்னு 15 நிமிடத்தில் சொல்லிடறேன் என்கிறார் ஆக்ஸ்போர்டு பல்கலைக்கழக பேராசிரியர் ஜேம்ஸ் முர்ரே.

கணித நிபுணரான இவர் தலைமையிலான குழு தொடர் ஆராய்ச்சிக்குப் பிறகு, காதலைக் கணக்கிடும் ஒரு அளவுகோலை க் கண்டுப்பிடித்துள்ளது.

”மனித மனதை ஒரு கணித முறைக்குள் அடக்கி, அளக்க முடியும் என்பது ஜோதிடத்தைப் போலவே வியப்பைத் தருகிறது எனக்கு” என்கிறார் இந்த காதல் கணக்கு வாத்தியார்.

இந்த காதல் கணக்கைக் கண்டுபிடிக்க 700 ஜோடிகளிடம் இவர் செய்த சோதனையில், அவர்களுடைய விவாகரத்துக்கான அடிப்படை காரணத்தை 94 சதவிகிதம் துல்லியமாகக் கண்டுபிடித்து சொல்லியிருக்கிறார் ஜேம்ஸ் முர்ரே.

அப்படி என்னதான செய்கிறார் அவர்?  ஜோடிகளிடம் மிகமிக சாதாரணமாக பேசும் இவர், பணம், செக்ஸ், உறவினர்களிடம் பேணிவரும் உறவுமுறை ஆகியவை உள்ளிட்ட  சில விஷயங்களைப்பேசுகிறார். 15 நிமிடம் மட்டுமே எடுத்துக்கொண்டு இவருடைய மனக்கணக்குப்படி
(அதை நமக்கு சொல்லித் தருவாரா என்ன?), அவர்களுடைய வாழ்வு நீடுழி வாழுமா அல்லது இடையில் புட்டுக்குமா என்று புட்டு புட்டு வைக்கிறார்.

ஜோடிகளிடம் இவர் கேட்கும் கேள்விகளுக்கு அவர்கள் தரும் பதிலை வைத்து தரப்படும் ப்ளஸ் நான்கு அல்லது மைனஸ் நான்கு புள்ளிகளை வைத்தே கணித்துவிடுகிறார், காலம் முழுக்க ஒட்டிக் கொண்டிருப்பார்களா, வெட்டிக் கொள்வார்களா என்று.

இதில் இன்னொரு சங்கதி என்னவென்றால், கணக்கு வாத்தியார் கடைசியில் போடும் இருகோடுகள்தான். ஜோடிகளின் பதிலை வைத்து இவர் போட்டுக்கொண்டே வரும் இருகோடுகளும் சந்திக்கும் விதத்தை வைத்து, ஜோடிகளின் இணை ஆயுளுக்கும் தாக்குப்பிடிக்குமா, தொலைந்துவிடுமா என்று சொல்லிவிட முடியுமாம்.

காதல் கணக்குப்போடும் வழிமுறையை முழுமையாக கூறாவிட்டாலும் காலம் முழுக்க ஒற்றுமையாக, அன்பு கொண்ட ஜோடியாக வாழ ஒரு வழி சொல்கிறார் ஜேம்ஸ் முர்ரே.

”நிலையான அன்புடன் என்றென்றும் மனம் ஒத்த தம்பதிகளாக வாழவேண்டுமானால், பழைய சம்பிரதாயங்களை விட்டுவிடாமல் தொடர வேண்டும். திருமணம் மூலம் தனக்கு ஒரு நல்ல தோழமை கிடைத்ததாக முழுமையாக நம்பவேண்டும். இதை மட்டுமே எதிர்பார்த்தால் பிரிவு என்கிற சொல்லுக்கே இடமில்லை” என்கிறார்.

உங்க கணக்கு ரொம்ப சுலபமானதுதான் வாத்தியாரே. ஆனால், மனக்கணக்கை சரியாக போடத் தெரியாம தவிப்பவர்களை என்ன செய்வது?
-கிசே

டிரா‌வி‌ல் முடி‌ந்தது 2-வது டெ‌ஸ்‌ட் போட்டி 

கா‌ம்‌பீ‌ர், ல‌‌ஷ்ம‌ண் ஆ‌கியோ‌ரி‌‌ன் சத‌த்தா‌ல் நியூ‌ஸீலாந்து அ‌ணிக்கு எதிராக நேப்பியரில் நடந்து வ‌ந்த 2-வது டெஸ்ட் போட்டி டிரா‌வி‌ல் முடிவடை‌ந்தது.

இந்தியா-நியூ‌ஸீலாந்து கிரிக்கெட் அணிகள் இடையிலான 2-வது டெஸ்ட் போட்டி நேப்பியர் மெக்லீன் பார்க் மைதானத்தில் நடந்து வ‌ந்தது.

நியூ‌ஸீலாந்து அணி முதல் இன்னிங்சில் 9 விக்கெட்டுக்கு 619 ரன்கள் குவித்து ‘டிக்ளேர்’ செய்தது. அடுத்து ஆடிய இந்திய அணி முதல் இன்னிங்சில் 305 ரன்களுக்கு ஆட்டம் இழந்து ‘பாலோ-ஆன்’ ஆனது. இதனால் 314 ரன்கள் பின்தங்கிய நிலையில் தொடர்ந்து 2-வது இன்னிங்சை விளையாடிய இந்திய அணி 3-வது நாள் முடிவில் ஒரு விக்கெட்டுக்கு 47 ரன்கள் எடுத்திருந்தது. கம்பீர் 14 ரன்னுடனும், டிராவிட் 11 ரன்னுடனும் களத்தில் இருந்தனர்.

இந்த நிலையில் 4-வது நாள் ஆட்டம் நேற்று நடந்தது. கையை விட்டு நழுவிய போட்டியை ‘டிரா’ செய்யும் முடிவுடன் களம் இறங்கிய இந்திய பேட்ஸ்மேன்கள் ‌திராவிட்டும், காம்பீரும் தடுப்பாட்டத்தில் ஈடுபட்டனர்.

அணியின் எ‌ண்‌ணி‌க்கை 163 ரன்களை எட்டிய போது, டிராவிட் ஆட்டம் இழந்தார். வெட்டோரி பந்து வீச்சில் ஷாட் லெக் திசையில் நின்ற ஜேமி ஹாவ் கேட்ச் செய்ததாக நடுவர் இயான் கவுல்டு அவுட் கொடுத்தார். ‌திராவிட் 220 ப‌ந்‌தி‌ல் 62 ரன்கள் எடுத்தார். இத‌ி‌ல் ஒரு ‌சி‌க்ச‌ர், 6 பவுண்டரி அட‌‌‌ங்கு‌ம்.

அடுத்து சச்சின் டெண்டுல்கர் களம் இற‌ங்‌கினா‌ர்.

4-வது நாள் ஆட்டம் நேர முடிவில் இந்திய அணி 2-வது இன்னிங்சில் 2 விக்கெட்டுகள் இழப்புக்கு 252 ரன்கள் எடுத்திருந்தது.  கம்பீர் 102 ரன்களுடனும், டெண்டுல்கர் 58 ரன்களுடனும் ஆட்டமிழக்காமல் இரு‌ந்தன‌ர்.

கடை‌சி நாளான இ‌ன்று ‌ஆ‌ட்ட‌‌த்தை தொட‌ங்‌கிய இ‌ந்‌திய அ‌ணி, 8 ர‌ன் சே‌ர்‌ப்பத‌ற்கு‌ள் டெ‌‌ண்டு‌ல்க‌ர் ஆ‌ட்ட‌ம் இழ‌ந்தா‌ர். இவ‌ர் 131 ப‌ந்‌தி‌ல் 64 ர‌ன்க‌ள் எடு‌த்தா‌‌ர்.

‌பி‌ன்ன‌ர் வ‌ந்த ல‌‌‌ஷ்ம‌ண் அபாரமாக ‌விளையாடினா‌ர். மறுமுனை‌‌யி‌ல் இரு‌ந்த கா‌ம்‌பீ‌ர் 137 ர‌ன்க‌ள் கு‌வி‌த்‌திரு‌ந்த போது பா‌ட்டீ‌ல் ப‌ந்‌தி‌ல் ஆ‌ட்ட‌ம் இழ‌ந்தா‌ர்.

இதை‌த் தொட‌ர்‌ந்து கள‌ம் இ‌ற‌ங்‌கிய யுவரா‌ஜ் ‌சி‌ங் 63 ப‌ந்‌தி‌ல் 54 ர‌ன்க‌ள் எடு‌த்தா‌ர். மறுமுனை‌யி‌ல் ‌நி‌‌ன்ற ல‌‌ஷ்ம‌ண் (124) சத‌ம் அடி‌த்தா‌ர்.

இ‌ந்‌திய அ‌ணி 4 ‌வி‌க்கெ‌ட்டுகளை இழ‌ந்து 476 ர‌ன்க‌ள் கு‌வி‌த்‌திரு‌ந்தபோது ஆ‌ட்ட‌ம் டிரா‌ செ‌ய்வதாக நடுவ‌ர் அ‌றி‌‌வி‌த்தா‌ர்.

3வது டெ‌ஸ்‌ட் போ‌ட்டி ஏ‌ப்ர‌ல் 3ஆ‌ம் தே‌தி வெ‌லி‌ங்ட‌னி‌ல்‌ நடைபெ‌று‌கிறது.

பயம், பதற்றம் இல்லாமல் நடித்தேன்: அயன் பற்றி சூர்யா பேட்டி

எந்தப் படத்தில் நடித்தாலும் ஒருவித பயம், பதற்றம் இருக்கும். அயன் படத்தில் அந்த பயமோ பதற்றமோ இல்லாமல் நடித்தேன் என்கிறார் சூர்யா.

ஏப்ரல் 3இல் அயன் படம் வெளியாவதையொட்டி, நேற்று நிருபர்களைச் சந்தித்தார் சூர்யா. அப்போது அவர் கூறுகையில்,

”அயன் படத்தில் தொடக்கம் முதல் இறுதிவரை இடைவெளி இல்லாமல் வேகம் இருக்கும். சென்னையைச் சேர்ந்த ஒருவன் த்ரில்லான அனுபவத்திற்காக செய்யும் முயற்சிகள் அவனை எங்கே கொண்டுபோய் நிறுத்துகிறது என்பதுதான் கதை.

சினிமாவில் இது எனக்கு 12 ஆவது வருடம். அயன் 23ஆவது படம். வாரணம் ஆயிரம் படத்துக்கு பத்திரிகை உலகமும், பொதுமக்களும் பாராட்டிய பாராட்டு இதுவரையில் நான் பார்க்காதது. அதற்கு எனக்குத் தகுதி இருக்கிறதா எனத் தெரியவில்லை. ஏ.ஆர். ரகுமான், எல்லாப் புகழும் இறைவனுக்கே என்று சொல்வது போல், எனக்குக் கிடைத்த புகழெல்லாம் கடவுளுக்குச் சமர்ப்பிக்கிறேன்.

எந்தப் படத்தில் நடித்தாலும் ஒருவித பதற்றம், பயம் ஏற்படும். அயன் படத்தில் நடிக்கும்போது எனக்கு எந்தவித பயமோ, பதற்றமோ ஏற்படவில்லை. இதற்கு, இயக்குநர் கே.வி.ஆனந்த் தான் காரணம். அவர் என்னை தம்பி போல பார்த்துக்கொண்டார். ஹாரீஸ் ஜெயராஜ் இசையில் வழக்கம்போல் பாடல்கள் நல்ல ஹிட். சன் பிக்சர்ஸின் விளம்பரம் படத்தை பிரபலமாக்கி உள்ளது.

சினிமாவில் என்னைவிட அதிகப் புகழை ஜோதிகா பெற்றிருந்தார். அவரை மனைவியாக்கிக் கொண்டதன் மூலம் அவருடைய ரசிகர்களும் என்பக்கம் வந்திருக்கிறார்கள்.

நான் வீட்டில் இருக்கும்போது, தன்னை பற்றியும் குழந்தை தியா பற்றியுமே பேசச் சொல்கிறார் ஜோதிகா. வீட்டில் வைத்து சினிமா பற்றி பேசக்கூடாது என்பது ஜோதிகாவின் கட்டளை. நானும் பேசமாட்டேன்” என்றார் சூர்யா.

பேட்டியின்போது அயன் பட இயக்குநர் கே.வி.ஆனந்த் உடனிருந்தார்.

தி.மு.க., தலைவர் பதவியை கனவிலும் எண்ணியது இல்லை: வைகோ 
 
‌தி.மு.க., தலைவர் பதவியை நான் கனவிலும் எண்ணியது‌ம் இல்லை, கற்பனையிலும் கூடக் கருதியது‌ம் இல்லை எ‌ன்று ம.தி.மு.க., பொதுச் செயலாளர் வைகோ வைகோ கூறியுள்ளார்.
 
இது தொட‌ர்பாக அவ‌ர் வெளியிட்டுள்ள அறிக்கையில்,

‘அந்த நாள் ஞாபகம் வந்தது என்றும், கட்சி தலைமையைக் கைப்பற்றும் நோக்கத்தில், தான் பெயர் சொல்ல விரும்பாத, குட்டை மனப்பேராசை கொண்ட ஒருவன் செயல்பட்டது தெரிந்தது என்றும், கவிதைக் கடிதம் என்ற பெயரில் முதலமைச்சர் கருணாநிதி என்னை தாக்கி உள்ளார்.

கட்சியில் தலைமைப் பதவி என்பதை நான் கனவிலும் எண்ணியது இல்லை. கற்பனையிலும் கூடக் கருதியது இல்லை. என் மீது சுமத்தப்பட்ட கொடும்பழியால் வேதனையில் கொதித்த தி.மு.க. தோழர்கள் ஐவர், தீக்குளித்து மடிந்தார்கள்.

கடந்த 15 ஆண்டுகளில் மறுமலர்ச்சி தி.மு.கழகத்தை சிதைப்பதற்கும், அழிப்பதற்கும் அவர் எடுத்துக்கொண்ட பல முயற்சிகளும் பலன் அளிக்காமல் போனதால் கடைசியாக ம.தி.மு.க. சட்ட மன்ற உறுப்பினர்கள் இருவரைத் துரோகிகள் ஆக்கி தன்னோடு சேர்த்துக் கொண்ட பின் மறுமலர்ச்சி தி.மு.க.வை எவ்விதத்திலாவது நிர்மூலம் செய்து விட வேண்டும் என்று எண்ணி 15 ஆண்டுகளுக்கு முன்பு என் மீது சுமத்திய கொடும்பழியை நியாயப்படுத்த முனைந்து தான் கவிதையை நேற்று எழுதி இருக்கிறார்.

இப்போது என் மீது சுமத்தப்படும் நிந்தையும் பழியும், பெரிய பதவியில் இருப்பவர் என்னையும் எங்கள் இயக்கத்தையும் அழிப்பதற்காகவே ஏவி உள்ளார் என்பதைத் தமிழக மக்களுக்கு தெரிவிக்கிறேன்’ எ‌ன்று வைகோ கூ‌றியு‌ள்ளா‌ர். 
 

கூட்டணி மாறும்போது திட்டுவதுதான் ராமதாசின் வேலை: கருணாநிதி

தி.மு.க., கூட்டணிக்கு வரும்போது அ.தி.மு.க.,வையும், அ.தி.மு.க., கூட்டணிக்குச் செல்லும்போது தி.மு.க.வையும் திட்டுவது தான் பா.ம.க., ராமதாசின் வேலை என்று முதல்வர் கருணாநிதி கூறியுள்ளார்.

இது தொட‌ர்பாக அவ‌ர் வெளியிட்டுள்ள கேள்வி-பதில் அறிக்கை:

பா.ம.க. நிறுவனர் டாக்டர் ராமதாஸ் பொதுக்குழுவிலே பேசும்போது, 2006-ம் ஆண்டு சட்டமன்றத் தேர்தலில் 31 இடங்களில் இடம் கிடைத்து போட்டியிட்டதாகவும், 13 இடங்களில் திட்டமிட்டு அவர்களை நீங்கள்தான் தோற்கடித்து விட்டதைப் போலவும் பேசியிருக்கிறாரே?

தி.மு.க.வை விட்டு போகும்போதும் எங்களையும் - அ.தி.மு.க.வை விட்டு விலகும்போதும் மாறி, மாறி தாக்குவதும், குறை சொல்வதும் அவருடைய வாடிக்கை. தற்போது எங்களை விட்டு விலகும்போது 2006-ம் ஆண்டு சட்டமன்ற தேர்தலில் நாங்கள்தான் திட்டமிட்டு தோற்கடித்ததைப் போல பேசுகிறார்.

2001-ம் ஆண்டு அ.தி.மு.க.வை விட்டு விலகியபோது- 14.7.2001 அன்று தைலாபுரம் தோட்டத்தில் நடைபெற்ற பா.ம.க.வின் பொதுக்குழுவில் நிறைவேற்றிய முதல் தீர்மானத்திலே- ‘தேர்தல் கூட்டணி ஏற்பட்ட பிறகு, எந்த கூட்டணி தலைவரிடமும் கலந்து பேசாமல் - தோழமை கட்சிகளுக்கு வாய்ப்புள்ள 141 தொகுதிகளையும், தன்னிச்சையாக பத்திரிகைகளில் அறிவித்துவிட்டு - பா.ம.க.வுக்கு பிரகாசமான வெற்றி வாய்ப்புள்ள தொகுதிகளையும், கட்சி வேண்டிக்கொண்ட தொகுதிகளையும் கொடுக்காமல் தோற்கடிக்க வேண்டுமென்று - மிகக் கடினமான 27 தொகுதிகளை ஒதுக்கி, அவைகளிலும் பா.ம.க. தோற்க வேண்டுமென்று ஜெயலலிதா, அ.தி.மு.க. மாவட்டச்செயலாளர்களை அறிவுறுத்தினார்”- என்றெல்லாம் குறிப்பிட்டு அ.தி.மு.க.வை குற்றஞ் சாட்டியவர்தான் டாக்டர் ராமதாஸ்.

அந்த தீர்மானத்திலே அது மாத்திரமல்ல- அதுவரை கூட்டணித் தலைவியாக இருந்த ஜெயலலிதாவிற்கு எவ்வாறு நன்றி காட்டினார் என்பதையும் பாருங்கள்!

‘டாக்டர் அய்யாவிற்கு நன்றி கூடச் சொல்லாமல், பதவியேற்பு விழாவிற்கு முறையாக அழைக்காமல், நேரில் பார்த்து வாழ்த்து சொல்ல இரண்டு நாட்கள் டாக்டர் அய்யா காத்திருந்தும் உதாசீனப்படுத்தியதோடு மட்டுமல்லாமல், மந்திரிகள் பதவியேற்பு விழாவிற்கு டாக்டர் அய்யா ராஜ்பவனுக்கு சென்றபோது அங்கே கவர்னர் உட்கார சொல்லியும், ஜெயலலிதா உட்கார சொல்லாமல் அவமானப்படுத்தி, அவரைப் பார்க்க வேண்டும் என்று கேட்டபோது வீட்டுக்கு வரச் சொல்லாமல், கோட்டைக்கு வரச்சொல்லி ஒரு மணி நேரத்துக்கு மேல் காக்க வைத்த, ஜெயலலிதாவின் ஆணவம், அட்டூழியம், பழி வாங்கும் போக்கு, கர்வம், வக்கிரபுத்தி, அவமானப்படுத்துதல் ஆகிய குணங்களைக் கொண்டு, எங்கள் நிறுவனத் தலைவர், சுயமரியாதைத் தலைவர் டாக்டர் அய்யாவின் மனம் புண்படும்படியாக கொச்சைப்படுத்திய ஜெயலலிதாவை இந்த பொதுக்குழு வன்மையாகக் கண்டிக்கிறது’

ஜெயலலிதாவிற்கு அப்போது எத்தகைய புகழ் மாலைகள் சூட்டப்பட்டன என்பதை நினைத்து, இப்போது நம்மை நாமே தேற்றிக்கொள்ள வேண்டியதுதான்!
 
டாக்டர் ராமதாஸ் 27.3.2009 அன்று அளித்த பேட்டியில் அவர்களை போயஸ் தோட்டத்திற்குத் தள்ளிவிட்டது தி.மு.க.தான் என்று சொல்லியிருக்கிறாரே?

2001-ம் ஆண்டு, போயஸ் தோட்டம் அவர்களை தள்ளிவிட்டபோது என்ன சொன்னார்கள் தெரியுமா? ஜெயலலிதாவின் சூழ்ச்சி, நயவஞ்சக நடவடிக்கைகளை தாங்கிக் கொண்டு சுய மரியாதை, தன்மானம் கொண்ட பாட்டாளி மக்கள் கட்சி அ.தி.மு.க. கூட்டணியில் தொடர்ந்து நீடிப்பது சாத்தியப்படாது என்பதால் அந்த கூட்டணியில் இருந்து விலகியதாக தீர்மானமே நிறைவேற்றினார்கள். இப்போது அம்மையாரின் சூழ்ச்சி, நயவஞ்சக நடவடிக்கைகளை தாங்கிக் கொள்ளலாம் என்று நினைத்திருப்பார்களோ என்னவோ?

அதுமாத்திரமல்ல; 25.7.2001 அன்று டாக்டர் ராமதாஸ் அன்றைய பிரதமர் வாஜ்பாயை டெல்லியில் சந்தித்து தேசிய ஜனநாயக கூட்டணியில் இணைந்தபோது கொடுத்த ஆங்கில அறிக்கையில், ‘சூது நிறைந்த, அவசர புத்தியுள்ள, ஜெயலலிதாவின் நடவடிக்கை தான் பா.ம.க. மீண்டும் தேசிய ஜனநாயக கூட்டணியில் இணைந்ததற்கு காரணம்” என்று சாட்டிய அதே குற்றச்சாட்டைத்தான் தற்போது மீண்டும் சொல்லியிருக்கிறார்.

பா.ம.க.வின் முடிவுக்கு காரணம், அந்த கட்சியின் ஒவ்வொரு தொண்டனும் தி.மு.க.வால், அமைச்சர்களால், தொண்டர்களால் பெரிய அளவில் காயப்பட்டதுதான் என்று டாக்டர் ராமதாஸ் பேசியிருக்கிறாரே?

அவர் சொல்வது உண்மையென்றால், பா.ம.க. தொண்டர்களிடம் மன்னிப்பு கேட்டுக்கொள்ள நான் தயாராக உள்ளேன். பா.ம.க. சட்டமன்ற உறுப்பினர்கள் இருபதுக்கு மேற்பட்டவர்கள் இருக்கிறார்கள். அவர்களில் யாராவது ஒருவரிடம் நான் மரியாதைக் குறைவாக நடந்து கொண்டிருக்கிறேனா என்பதை அவர்களே கூறட்டும். ஆனால் தற்போது டாக்டர் போய்ச் சேர்ந்திருக்கின்ற அ.தி.மு.க. தலைவியைப் பற்றி, 2001-ம் ஆண்டு நடைபெற்ற பா.ம.க. பொதுக்குழுவிலே இதே டாக்டர் என்ன பேசினார் என்பதை பழைய ஏடுகளைப் புரட்டி அவரே பார்த்து தெரிந்து கொள்ளட்டும். அவருக்கு சிரமம் இல்லாமல் நானே அதனைத் தேடியெடுத்து இதோ தந்துள்ளேன். என் பேச்சில் அவருக்கு இன்னமும் நம்பிக்கை இருக்குமானால், படித்து அவரே தெரிந்து கொள்ளட்டும்.

இதோ டாக்டர் ராமதாசின் பேச்சு. ‘நான் அன்பு சகோதரி என்று மனதார அழைத்த ஜெயலலிதா என்னை கொச்சைப்படுத்தி, அவமானப்படுத்தியதை எல்லாம் இங்கு எடுத்து கூறினார். இது இங்குள்ள அனைவருக்கும் வருத்தத்தையும், வேதனையையும் ஏற்படுத்தியது. ஆனால் அந்த அம்மையார் அவமானப்படுத்தாத தலைவர்கள் யாராவது இருக்கிறார்களா? தமிழக அளவிலோ, இந்திய அளவிலோ யாரும் இல்லை. ராஜீவ்காந்தியை, நரசிம்மராவை, கவர்னர் சென்னா ரெட்டியை கேவலப்படுத்தினார். வாஜ்பாய், அத்வானியை அவமானப்படுத்தினார்.

தலைவாழை இலை போட்டு, தமிழ்நாட்டு உணவு வகைகளை எல்லாம் பரிமாறி விருந்து வைத்து, கூட்டு சேர்ந்துவிட்டு, 13 மாதத்தில் ஆட்சியைக் கவிழ்த்தார். இவரைச் சந்திக்க வந்த ஜார்ஜ் பெர்னாண்டஸ், ஜஸ்வந்த்சிங் ஆகியோரை அவமானப்படுத்தினார். தமிழகத்தில் இவருக்கு உயிர்பிச்சை கொடுத்து, வழிகாட்டிய எம்.ஜி.ஆருடன் இருந்த தலைவர்களை எல்லாம் அவமானப்படுத்தி வெளியேற்றினார்.

தமிழகத்தின் மூத்த தலைவரை, முன்னாள் முதலமைச்சர் கருணாநிதியை அசிங்கப்படுத்தி அண்டர்வேர் கூட போட முடியாதபடி கைது செய்ததை அறிந்து நாமெல்லாம் வேதனைப்பட்டோம்.

ஜெயலலிதாவின் இந்த கொடுங்கோன்மை தர்பாரை நாடே அறியும். இன்னும் 4 மாதத்தில் தேர்தலில் நின்று ஜெயிக்க முடியுமா என்ற நிலையிலும் கூட, ஆணவம், அகங்காரம் இருக்கிறது என்றால் இன்னும் அவர் என்ன செய்வார் என்று தமிழக மக்களே அஞ்சுகிறார்கள்.

காரியம் ஆக வேண்டுமானால் எதுவும் செய்வார், காரியம் முடிந்துவிட்டால் தூக்கிப்போட்டு விடுவார். 28 நாள் சிறையில் இருந்துவிட்டு வந்தவருடன், அசிங்கப்பட்டு, அவமானப்பட்டு, இப்படி ஒரு பெண்ணா என்று தமிழகமே வெறுத்தபோது, வாழப்பாடி மூலம் தூதுக்கு மேல் தூதுவிட்ட பிறகு -நாம் கூட்டு சேர்ந்ததால் புதுவை உள்பட 40 தொகுதியில் 30-ல் வெற்றி கிடைத்தது. அந்த அளவுக்கு அரசியலில் அவருக்கு நாம்தான் பிச்சை போட்டுள்ளோமே தவிர அவர் நமக்கு ஒன்றும் தரவில்லை”.

டாக்டர் ராமதாஸ், அ.தி.மு.க. கூட்டணியிலிருந்து விலகியபோது சாட்டியுள்ள இந்த குற்றச்சாட்டு அளவிற்கு நம்மீது கூறவில்லை என்பதை நினைத்து நாம் மன நிறைவு கொள்ளலாம்.

மத்திய ஆட்சியில் பா.ம.க. ஐந்தாண்டு காலமும் பங்கேற்று அமைச்சர் பதவியையும் அனுபவித்துவிட்டு- தற்போது இலங்கைப் பிரச்னையில் மத்திய அரசு உதாசீனப்படுத்திவிட்டதாகவும், தமிழர்களை மதிக்கவில்லை என்றும் டாக்டர் ராமதாஸ் சொல்லியிருக்கிறாரே?

இலங்கைப் பிரச்னையில் மத்திய அரசு எந்த அளவிற்கு செயல்பட்டது என்பதை அவருடைய புதல்வரே, அமைச்சராக இருந்த அளவில் நன்றாக உணர்வார். ஒரு சில நாட்களுக்கு முன்பு கூட பிரதமர் இலங்கைப் பிரச்னை பற்றிய பல செய்திகளை எனக்கு கடிதம் மூலமாக எழுதியிருப்பதை ஏடுகளிலேயே பார்த்தோம். எனவே மத்திய அரசை இந்த அளவிற்கு குற்றஞ்சாட்டக் கூடாது என்பதுதான் என் கருத்து.

இலங்கைத் தமிழர் பிரச்னையில் அ.தி.மு.க. ஒத்த கருத்துடையதா என்று டாக்டர் ராமதாசிடம் செய்தியாளர் கேட்டதற்கு, இருவரின் கருத்தும் ஒத்த கருத்து தான் என்று பதில் சொல்லியிருக்கிறாரே?

தமிழ் ஈழம் வேண்டும் என்பது டாக்டர் ராமதாசின் கருத்து. தனி மாகாணம் அமைய வேண்டும் என்பது ஜெயலலிதாவின் கருத்து.

பிரபாகரனை கைது செய்து தமிழகத்திற்கு அழைத்து வர வேண்டுமென்று ஜெயலலிதா தீர்மானம் நிறைவேற்றினார். பிரபாகரனை ஆதரிக்க வேண்டுமென்பது டாக்டர் ராமதாசின் கருத்து. ‘ராஜபக்சே விடுதலைப்புலிகளைத்தான் எதிர்த்து போரிடுகிறார்- இலங்கைத் தமிழர்களை அல்ல”- என்று சென்ற மாதம் அறிக்கை விட்டவர் ஜெயலலிதா. இப்படியிருக்க எவ்வாறு இருவரின் கருத்து ஒத்த கருத்தாக இருக்க முடியும்? எ‌ன்று கருணா‌நி‌தி கூ‌றியு‌ள்ளா‌ர்.

பட்டாளம் - திரை விமர்சனம்

நடிப்பு: நதியா, அருண், பாலாஜி, கிருபா
தயாரிப்பு: லிங்குசாமியின் திருப்பதி பிரதர்ஸ்
இயக்கம்: ரோஹன் கிருஷ்ணா
இசை: ஜாஸி கிப்ட்

பட்டாளம்… நல்ல தலைப்பு. பொருத்தமான தலைப்பு. ராணுவத்திற்கு சமமானது மாணவர்களின் பட்டாளம். சிலநேரம் ராணுவத்தை விட பலமடங்கு சக்தி காட்டி மாணவர் பட்டாளம் ஒரு நாட்டையே திருப்பிப்போடும்.

மாணவர் பட்டாளத்தின் உலகை காட்ட வந்திருக்கிறது பட்டாளம்.

நதியாதான் அழகான தலைமை ஆசிரியர். பள்ளியில் ப்ளஸ்டூ பயிலும் மாணவர்களில் 8 பேர் இரு அணிகளாகப் பிரிந்து மோதி க்கொள்கிறார்கள். வாய்ப்புக் கொடுத்தாலும் அவர்கள் திருந்துவதாக இல்லை. கடுகடுவென திரிகிறார்கள்.

இந்நிலையில், பள்ளிகளுக்கு இடையே விளையாட்டு போட்டிகள் நடக்கின்றன. மாணவர்கள் அங்கேயும் மோதிக்கொள்கிறார்கள். நதியா அவமானத்தால் தலைகுனிகிறார். போட்டியில் இருந்து விலகிவிட தீர்மானிக்கிறார். இதை அறிந்ததும் மாணவர்கள் இடையே ஒற்றுமை ஏற்படுகிறது. இந்த ஒற்றுமை அவர்கள் தொடர்ந்தார்களா, போட்டியில் வென்றார்களா என்பது க்ளைமாக்ஸ்.

மாணவர்கள் என்றாலே சுறுசுறுப்பு, வேகம், குறும்பு, குசும்பு எல்லாம் உண்டுதானே… பட்டாளத்திலும் உண்டு. ஒற்றுமையின்மையால் அவமானம் அடையும் மாணவர்கள், ஒற்றுமையை மீட்டெடுத்தால் வெற்றி பெறமுடியும் என உறுதியாகச் சொல்லியிருக்கிறார்கள்.

தலைமை ஆசிரியராக, மிடுக்காக வருகிறார் நதியா. மாணவர்கள் மீது கோபப்படுவதாகட்டும், மாணவர்களை கொடுமைப்படுத்தும் ஆசிரியரை டிஸ்மிஸ் செய்வதாக இருக்கட்டும் அன்பும், கண்டிப்பும் கலந்த ஆசிரியராக மிளிர்கிறார்.

மாணவர்கள் என்றால் படிப்பு மட்டுமல்ல காதலும்தான் என்பதை தவறவிடாமல், காதலையும் கலந்து பட்டாளத்தை உலவ விட்டிருக்கிறார் இயக்குநர் ரோஹன் கிருஷ்ணா.

லஜ்ஜாவதியே பாட்டு மூலம் இசை ரசிகர்களை தன் பக்கம் இழுத்த ஜாஸி கிப்ட்தான் இசை. பட்டாளத்திலும் பாடல்களில் பின்னியிருக்கிறார்.பத்திரிகையாளர் நெல்லைபாரதி இஸ்பகராராரா பாடல் மூலம் பாடலாசிரியராக கோலிவுட்டில் காலடி எடுத்து  வைத்திருக்கிறார்.

நாய் துரத்தி மாணவன் பலி: விமான பணிப்பெண் கைது

நாய் துரத்தியதால் பயந்து, நான்காவது மாடியில் இருந்து குதித்த ஆறாம் வகுப்பு பள்ளி மாணவன் ஒருவன் பரிதாபமாக இறந்தான். அவனுடைய விருப்பப்படி கண்கள் தானம் கொடுக்கப்பட்டன. இந்த வழக்கில் விமான பணிப்பெண் ஒருவர் கைது செய்யப்பட்டார்.

இது குறித்து காவல்துறை தரப்பில் கூறியதாவது:

மீனம்பாக்கம், இந்தியன் ஏர்லைன்ஸ் குடியிருப்பு, நான்காவது பிளாக்கில் வசித்து வருபவர் சீனிவாசன். இவர், இந்தியன் ஏர்லைன்ஸ் நிறுவனத்தில் ஏர் டிராபிக் மேற்பார்வையாளராக வேலை பார்த்து வருகிறார். இவரின் மனைவி அஞ்சனா. இவர்களின் மகன் ஆசிஷ் அரவிந்த் (11) மகள் ஷிவானி (4).

ஆசிஷ் அரவிந்த், கேந்திர வித்யாலயா மேல்நிலைப் பள்ளியில் ஆறாம் வகுப்பு படித்து வந்தான். தேர்வு முடிந்து முடிவுகள் வெளியிடப்பட்டன. இதில், தேர்ச்சி பெற்ற ஆசிஷ் அரவிந்த், அடுத்த பிளாக்கில் வசிக்கும் தனது மாமா சங்கர்ராவ் வீட்டிற்கு சென்று இனிப்பு வழங்கினான். பின், நான்காவது மாடியில் சிறுவன் ஒருவனுடன் விளையாடிக் கொண்டிருந்தான்.

அதே பிளாக்கில், விமான பணிப்பெண்களாக வேலை பார்க்கும் நமீதா நாயக் (25), அவரின் சகோதரி சமீதா நாயக் (22) வசித்து வந்தனர். அவர்கள் டாபர்மேன் நாய் ஒன்று வளர்த்து வருகின்றனர். இரவு நேரத்தில் அதை நான்காவது மாடியில் உலாவவிடுவது வழக்கம். நேற்று முன்தினம் நமீதா நாயக் வேலைக்கு சென்றிருந்தார். வீட்டில் இருந்த சமீதா நாயக் வழக்கம்போல் இரவில் நாயை மாடியில் உலாவ விட்டார். அப்போது, மாடியில் விளையாடிக் கொண்டிருந்த ஆஷிஷ் அரவிந்தை நாய் துரத்தியது. இதில், பயந்துபோன அச்சிறுவன் மாடியில் இருந்து குதித்தான்.

படுகாயமடைந்த ஆஷிஷ் அரவிந்த், உடனடியாக தனியார் மருத்துவமனை ஒன்றில் அனுமதிக்கப்பட்டான். அங்கு தீவிர சிகிச்சை பலனளிக்காமல் இறந்தான். இது குறித்து மீனம்பாக்கம் இன்ஸ்பெக்டர் முருகேசன் வழக்கு பதிந்து, சமீதா நாயக்கை கைது செய்யப்பட்டு விசாரணை நடைபெற்று வருகிறது.

நாய் துரத்தியதால் பரிதாபமாக உயிரிழந்த ஆஷிஷ் அரவிந்த், பள்ளியில் படிக்கும் போது கண்களை தானம் செய்ய பதிவு செய்திருந்தான். அவனின் விருப்பப்படி அவனுடைய கண்கள் நேற்று தானம் செய்யப்பட்டன.