தொலை நோக்கற்ற, ஆரோக்கியமற்ற பட்ஜெட்: ஜெயலலிதா

சென்னை: தமிழக பட்ஜெட் ஒரு தொலைநோக்கற்ற, ஆரோக்கியமற்ற பட்ஜெட் என ஜெயலலிதா கருத்து கூறியுள்ளார்.

தமிழக பட்ஜெட் குறித்து ஜெயலலிதா மற்றும் பிரபலங்களின கருத்துகள் வருமாறு:

அ.தி.மு.க., பொதுச் செயலர் ஜெயலலிதா: ஒட்டுமொத்த வருவாய் வரவுகள் குறைந்து, வருவாய் செலவினங்கள் அதிகரித்துள்ளன. 1,000 கோடி ரூபாய் அளவுக்கு வருவாய் பற்றாக் குறை, 11 ஆயிரம் கோடி ரூபாய் மொத்த நிதிப் பற்றாக்குறை எனக் கணக்கிடப்பட்டுள்ளது.கரும்பு ஒரு டன்னுக்கு 2,000 ரூபாய் வழங்குவது, இலவச தரிசு நிலம் வழங்கும் திட்டம், ரேஷன் பொருள் கடத்துவோர் மீது நடவடிக்கை, சமச்சீர் கல்வி, மின் பற்றாக்குறையைப் போக்க உருப்படியான நடவடிக்கை ஆகியன குறித்து பட்ஜெட்டில் அறிவிப்பு இல்லை.பஸ் கட்டணம் உயரவில்லை என்று கூறினாலும், சாதாரண கட் டண பஸ்கள் நிறுத்தப்பட்டுள்ளன. தொலை நோக்கில்லாத, ஆரோக்கியமற்ற பட்ஜெட்.

தமிழக காங்., தலைவர் தங்கபாலு: ஒரு லட்சத்து 35 ஆயிரம் கான்கிரீட் வீடுகள், 3,500 புதிய பஸ்கள், சென்னை மெட்ரோ ரயில் திட்டம், மதுரை ராஜாஜி மருத்துவமனை 150 கோடி ரூபாயில் விரிவாக்கம், வயது முதிர்ந்தோருக்கான ஆய்வு மையம், சென்னையில் வெள்ளப் பாதிப்பைத் தடுக்க 1,448 கோடி ரூபாய் திட்டம் மற்றும் சென்னையில் சர்வதேசத் தரத்திலான நவீன நூலகம் ஆகியன, மக்களின் வளர்ச்சிக்கு வழிகாணும் சிறப்பான பட்ஜெட்.

மார்க்சிஸ்ட் கம்யூனிஸ்ட்: தொழில், விவசாயம், தீண்டாமை ஒழிப்பு, வேலைவாய்ப்பு போல அடிப்படையான அம்சங்களுக்குத் தீர்வு காணாமல், மாநில அரசின் நிதிநிலை அறிக்கை ஆளுங்கட்சியின் தேர்தல் அறிக்கையாக அமைந்துள்ளது.

தே.மு.தி.க., தலைவர் விஜயகாந்த்:பொருளாதார தேக்க நிலையைப் போக்குவதற்கான எந்த நடவடிக்கையும் இல்லை. விவசாயிகளுக்கு வட்டியில்லா கடன் வழங்கப்படும் என்றாலும், அதற்காக வெறும் 140 கோடி ரூபாய் மட்டுமே ஒதுக்கீடு செய்யப்பட்டுள்ளது. விவசாயிகளின் விளைப் பொருட்களுக்கு உத்தரவாதமான விலை கொடுப்பதைப் பற்றி எத்தகைய குறிப்பும் இல்லை.தகவல் தொழில்நுட்பத் துறை மற்றும் பின்னலாடை போன்ற ஏற்றுமதி தொழிலில் இருக்கின்ற வேலைகளும் பறிபோகின்றன.

தேர்தலை மனதில் வைத்துக்கொண்டு, ஏற்கனவே நடைமுறையில் உள்ள இலவசத் திட்டங்களின் பட்டியல் தான் இந்த நிதிநிலை அறிக்கையை ஆக்கிரமித்துக் கொண்டுள்ளது. பள்ளிக்கணக்கு புள்ளிக்கு உதவாது என்பது போல இந்த பட்ஜெட் கணக்கும் வாழ்க்கைக்கு உதவாது.

பா.ம.க., நிறுவனர் ராமதாஸ்:மக்களின் வறுமை நிலைக்குக் காரணமான மதுவை முற்றிலுமாக ஒழிப்பதற்கான வழிமுறைகள் பற்றியோ, முழு மதுவிலக்கை அமல்படுத்துவோம் என்ற வாக்குறுதியை நிறைவேற்றுவதற்கான தொடர் அறிவிப்புகளோ இந்த நிதிநிலை அறிக்கையில் இடம்பெறவில்லை.சமச்சீர் கல்வி முறையைச் செயல்படுத்துவதற்கு எந்தக் காலக்கெடுவும் அறிவிக்கப்படவில்லை. உழவர்கள் உற்பத்தி செய்யும் பொருட்களுக்கு நியாயமான விலை கிடைப்பதற்காக மாநிலம் அளவிலான விலை நிர்ணயக்குழு அமைப்பது குறித்து அரசு எதுவும் தெரிவிக்கவில்லை. இவையெல்லாம் ஏமாற்றம் அளிப்பதாக உள்ளது.

ச.ம.க., தலைவர் சரத்குமார்:கரும்பு விவசாயிகளுக்கு டன் ஒன்றுக்கு 2,000 ரூபாய் வழங்க வேண்டும் என்ற விவசாயிகளின் கோரிக்கைக்கு இந்தப் பட்ஜெட்டில் ஒதுக்கீடு செய்யாதது வருத்தமளிக்கிறது.சிறு தொழில்களுக்கு ஊக்கம் அளிக்கும் வகையில் திட்டங்களோ, வேலை வாய்ப்பிற்காக பதிவு செய்து காத்திருக்கும் 50 லட்சம் பேருக்கு வேலை வாய்ப்புக்கான புதிய திட்டங்களோ மற்றும் அதற்கான நிதி ஒதுக்கீடுகளோ சொல்லப்படவில்லை.தமிழகத்தில் பொருளாதார வளர்ச்சிக்கான புதிய திட்டங்களோ, அறிவுப்புகளோ இல்லை. சமச்சீர் கல்வி திட்டத்தை நடைமுறைப்படுத்துவதற்கான அறிவிப்பும் இல்லை.

மூவேந்தர் முன்னணி கழக நிறுவனர் டாக்டர் சேதுராமன்: தமிழக பட்ஜெட்டில் சேது சமுத்திரத் திட்ட வளர்ச்சி குறித்து கூறப்படவில்லை. பற்றாக்குறை 3 சதவீதம் நிலவுகிறது என்ற அறிவிப்பு நிர்வாகத் திறமையின்மையைக் காட்டுகிறது.
ஒட்டுமொத்த தென்பகுதி மக்களைப் பற்றி இந்தப் பட்ஜெட்டில் சிந்திக்கவில்லை.

தமிழ்நாடு ஆசிரியர் கூட்டணி: விவசாயிகளுக்கு இலவச மின்சாரம், 2,500 நடுநிலைப் பள்ளிகளுக்கு கணினி, மேல்நிலைப் பள்ளிகளின் மேம்பாட்டிற்காக 200 கோடி ரூபாய் ஒதுக்கீடு, புதிதாக 100 உயர்நிலைப் பள்ளிகள், 100 மேல்நிலைப் பள்ளிகள் உள்ளிட்ட அறிவிப்புகள் வரவேற்கக் கூடியது.மொத்த வருவாயில் கல்விக்காக 18 சதவீதம் ஒதுக்கீடு செய்தது குறைவு; 25 சதவீதம் ஒதுக்கப்பட்டிருக்க வேண்டும்.

தமிழ்நாடு ஓய்வுபெற்ற அரசு ஊழியர் சங்கம்: ஆறாவது ஊதியக்குழுவின் பரிந்துரை பரிசீலனையில் உள்ள நிலையில் இடைக்கால நிலுவைத் தொகை, மருத்துவ ஈட்டுத்தொகை வழங்கப்படும் என்ற அறிவிப்பு வரவேற்கக் கூடியது. புதிய திருத்திய ஊதிய மாற்றங்கள் விரைவில் அமல்படுத்தப்படும் என காலவரையறை நிர்ணயிக்காதது ஏமாற்றமளிக்கிறது.

தமிழ்நாடு அரசு ஊழியர் சங்கம்: காலிப் பணியிடங்களை நிரப்ப வேண்டும். தொகுப்பூதியம் பெறும் அனைவருக்கும் வரையறுக்கப்பட்ட ஊதியமும், ஓய்வூதியமும் வழங்க வேண்டும். புதிய மருத்துவக் காப்பீட் டுத் திட்டத்தை அரசே ஏற்றுநடத்த வேண்டும்.தமிழ்நாடு வக்பு வாரியம்: உலமாக்கள் மற்றும் பள்ளிவாசல் பணியாளர்கள் நல வாரியம் அமைக்க வேண்டும் என்ற கோரிக்கையை ஏற்று, தமிழக அரசின் நிதிநிலை அறிக்கையில் அறிவித்து உத்தரவிட்ட முதல்வருக்கு நன்றியைத் தெரிவித்துக் கொள்கிறோம்.

தமிழ் வர்த்தக சபை: குடிநீர் திட்டம், காப்பீடு வசதி, ஆறு லட்சம் காஸ் இணைப்புகள், மகளிர் சுய உதவிக் குழுக்களுக்கான திட்டங்கள் வரவேற்கக் கூடியவை. போலீசாருக்கு 2,855 கோடி ரூபாய் ஒதுக்கீடு செய்தது தற்போதைய பயங்கரவாத நிகழ்வுகளைத் தடுத்து, கட்டுப்படுத்த உதவும். மேம்பாலங்கள், மெட்ரோ ரயில் உள்ளிட்ட திட்டங்கள் எதிர்காலத்தை மேம்படுத்தும்.

தமிழ்நாடு தொழில் வர்த்தக சங்கம்: வரி குறைப்பு, வரி விலக்கு, வரிச் சீரமைப்பு ஆகியன இந்தப் பட்ஜெட்டில் அமல்படுத்தப் பட்டுள்ளன. மதிப்புக்கூட்டு வரிச் சட்டத்தில் உள்ள பல்வேறு நடைமுறைச் சிக்கல்களை தீர்த்து வரிச் சட்டத்தை எளிமைப்படுத்தும் முயற்சி பாராட்டுக்குரியது. அனைத்து துறையிலும் தமிழகத்தை முன்னேற்றப் பாதையில் அழைத்துச் செல்லும் திட்டங்களை உள்ளடக்கிய பட்ஜெட் இது.

தமிழ்நாடு தலைமைச் செயலக சங்கம்: அகதிகள் முகாம் மேம்பாட்டிற்கு ஐந்து கோடி ரூபாய், வெள்ளம் பாதித்த 12 மாவட்டங்களில் நிலவரி ரத்து, புதிய சட்டசபை வளாகத்திற் காக 200 கோடி ரூபாய் நிதி ஒதுக்கீடு மற்றும் அரசு ஊழியர், ஆசிரியர், பென்சன்தாரர்களுக்கு 4,247 கோடி ரூபாய் இடைக்கால நிவாரணம் உள்ளிட்ட அறிவிப்புகள் வரவேற்கக் கூடியது.தமிழ்நாடு டாஸ்மாக் பணியாளர் சங்கம்: ஆண்டுக்கு 12 ஆயிரம் கோடி ரூபாய் லாபம் ஈட்டித் தரும் டாஸ்மாக் பணியாளர்கள் பணி நிரந்தரம், எட்டு மணி நேர வேலை, வார விடுமுறை குறித்து பட்ஜெட்டில் கூறாதது ஏமாற்றமளிக்கிறது.

• MP election: TN Congress candidates announced
• Minister Anbazhagan submitted TN budget
• Leaders greetings on Republic Day
• No one can weaken Congress, says KV Thangabalu
• TNCC aims to set Kamarajar rule here: KV Thangabalu
• Virudhagiri: Vijaykanth starts direction
• Punch Balu fires
• Defeated in Salem, KV Thangabalu clarifies
• Vijaykanth charges DMK,ADMK both
• Vijaykanth releases candidates list for MP election