திருமங்கலம்: துணை ராணுவம் கேட்கிறார் நரேஷ் குப்தா

திருமங்கலம்: திருமங்கலம் இடைத் தேர்தல் நியாயமாக நடக்கவேண்டுமானால் துணை ராணுவம் வேண்டும் என்று கூறியுள்ளார் தமிழகத் தேர்தல் ஆணையர் நரேஷ் குப்தா.

திருமங்கலம் இடைத் தேர்தல் வன்முறைச் சம்பவங்களைத் தொடர்ந்து செவ்வாய்க்கிழமை மதுரைக்கு வந்த நரேஷ் குப்தா, மாவட்ட ஆட்சியர், தென் மண்டல காவல்துறை தலைவர் ஆகியோருடன் ஆலோசனை நடத்தினார்.

பின்னர் அவர் செய்தியாளர்களிடம் கூறுகையில்,

”தொகுதியில் வன்முறைகள் அதிகம் நடந்துள்ளன. இது குறித்து மத்திய தேர்தல் ஆணையத்திற்கு அறிக்கை அளிக்கப்படும். தற்போது என்ன நடவடிக்கை எடுக்கவேண்டும் என அந்த அறிக்கையில் குறிப்பிடப்படும். திருமங்கலம் இடைத் தேர்தலுக்கு துணை ராணுவம் வேண்டும். ஆனால் இது குறித்து மத்திய தேர்தல் ஆணையம் முடிவு செய்யும்.

வாக்காளர்களுக்கு பணம் பட்டுவாடா, இலவச சாப்பாடு, திருமண மண்டபங்களை பிரசாரத்துக்குப் பயன்படுத்துதல் ஆகிய புகார்கள் வந்துள்ளன. தேர்தல் விதிமீறி நடக்கும் திருமண மண்டபங்களை சீலிட உத்தரவிடப்படும்.

ஜம்மு - காஷ்மீரில்கூட சுமுகமாகத் தேர்தல் நடத்தப்பட்டுள்ளது. திருமங்கலத்தில் பல தவறுகள் நடந்திருப்பது கவலையளிக்கிறது. திருமங்கலம் கறை படிந்துவிட்டது. எனவே, ஒவ்வொருவரும் தேர்தலில நியாயமாக நடந்துகொள்ள வேண்டும். ஜனவரி 2ஆம் தேதி மத்திய தேர்தல் துணை ஆணையர் திருமங்கலத்தில் விசாரணை  நடத்துவார்.

நான் மனசாட்சிப்படியும், நியாயப்படியும் நடக்கவில்லை எனில், தேர்தல் ஆணையம் என்னை மாற்றிவிடும். திருமங்கலத்தில் நடந்த  சம்பவங்கள் துரதிருஷ்டவசமானது.

வாக்குப்பதிவில் மத்திய அரசு ஊழியர்களே ஈடுபடுவர். மைக்ரோ  அப்சர்வர் என்ற புதியமுறையும் செயல்படுத்தப்பட உள்ளது. அதன்படி ஒவ்வொரு வாக்குச் சாவடியிலும் ஒரு பார்வையாளர் இருப்பார். அவர் தேர்தல் அதிகாரியிடம் அறிக்கை தாக்கல் செய்வார்” என்றார்.
 

வங்க தேசம்: பிரதமராகிறார் ஹசீனா

டாக்கா: வங்க தேச பொதுத் தேர்தலில் அவாமி லீக் கட்சி கூட்டணி பெரும் வெற்றி பெற்றுள்ளது. அக்கட்சியின் தலைவர் ஷேக் ஹசீனா பிரதமராகிறார்.

மொத்தமுள்ள 300 இடங்களில் 299 இடங்களுக்கு தேர்தல் நடைபெற்றது. இதில் 298 தொகுதிகளுக்கான அதிகாரபூர்வமற்ற முடிவுகள் அறிவி்க்கபட்டன. இவற்றில் அவாமி லீக் கட்சி கூட்டணி 263 தொகுதிகளில் வெற்றி பெற்றது. எதிர்த்து போட்டியிட்ட கலிதா ஜியாவின் தலைமையிலான வங்க தேச தேசிய கட்சி கூட்டணி 31 இடங்களில் மட்டுமே வெற்றியைப் பெற்றது. ஐந்து தொகுதிகளில் சுயேச்சைகள் வென்றனர். நான்கு தொகுதிகளின் முடிவுகள் நிறுத்திவைக்கப்பட்டுள்ளன.

2001ஆம் நடந்த தேர்தலில் கலிதா ஜியாவின் கட்சி அமோக வெற்றி பெற்றது. ஷேக் ஹசீனா கட்சி படுதோல்வி கண்டது குறிப்பிடத்தக்கது. இந்தத் தேர்தலில் வெற்றி, தோல்வி அப்படியே தடம்புரண்டு விட்டது.

வெற்றி குறித்து அதிகாரபூர்வமான தகவல் வரும்வரை பேரணிகள், வெற்றி கொண்டாட்டங்கள் வேண்டாம் என்று தனது தொண்டர்களுக்கு ஹசீனா அறிவுறுத்தியுள்ளார். அத்துடன், எதிர்க்கட்சியினர் தங்கள் தோல்வியை ஒப்புக்கொண்டு, மக்கள் அளித்த தீர்ப்பை ஏற்க வேண்டும் என்றும் கேட்டுக் கொண்டுள்ளார்.

அதேசமயம், இந்தத் தேர்தலில் மோசடி நிகழ்ந்துள்ளதாக கலிதா ஜியாவின் வங்கதேச தேசிய கட்சி குற்றம் சாட்டியுள்ளது. பல்வேறு முறைகேடுகள் நடந்துள்ளதாகவும், வாக்குப்பதிவும்போது தங்கள் கட்சித் தொண்டர்கள் விரட்டியடிக்கப்பட்டதாகவும், தேர்தல் ஏஜேண்ட் மற்றும் அதிகாரிகள் தங்கள் கடமையை செய்ய முடியாமல் தடுக்கப்பட்டனர் என்றும் அக்கட்சியின் செய்தித் தொடர்பாளர் ரிஸ்வி அகமது தெரிவித்தார்.

நடந்து முடிந்த இந்தத் தேர்தலில் 80 சதவிகித வாக்குகள் பதிவானதாக தேர்தல் ஆணைய அதிகாரிகள் கூறினர்.

வங்க தேசத்தில், 7 ஆண்டு இடைவெளிக்குப் பிறகு ஜனநாயக முறைப்படி தேர்தல் நடத்தப்பட்டு,  மக்களால் தேர்ந்தெடுக்கப்பட்ட புதிய அரசு அமையவுள்ளது.

அரசு ஊழியர்களுக்கு பொங்கல் போனஸ்: கருணா‌நி‌தி அறிவிப்பு
 
சென்னை: ‘சி’ மற்றும் ‘டி’ பிரிவு அலுவலர்கள் அனைவருக்கும் 30 நாட்கள் ஊதியத்திற்கு இணையாக ரூ.2500 உச்சவரம்புக்குட்பட்டு போனஸ் வழங்கிடவும், ‘ஏ’ மற்றும் ‘பி’ பிரிவு அலுவலர்களுக்கு ரூ.1000 சிறப்பு போனஸ் வழங்கிடவும், ஓய்வூதியம் மற்றும் குடும்ப ஓய்வூதியம் பெறுபவர்களுக்கு ரூ.300 வழங்கிடவும் முதல்வர் கருணாநிதி ஆணையிட்டுள்ளார்.

இது தொட‌ர்பாக தமிழக அரசு செவ்வாய்க்கிழமை வெளியிட்ட செய்திக்குறிப்பில்,

‘2007-2008 ஆம் ஆண்டிற்கு ‘சி’ மற்றும் ‘டி’ பிரிவு அலுவலர்கள் அனைவருக்கும் 30 நாட்கள் ஊதியத்திற்கு இணையாக ரூ.2,500 உச்ச வரம்புக்குட்பட்டு போனஸ் வழங்கிடவும், ‘ஏ மற்றும் பி’ பிரிவு அலுவலர்களுக்கு ரூ.1000 சிறப்பு போனஸ் வழங்கிடவும், ஓய்வூதியம் மற்றும் குடும்ப ஓய்வூதியம் பெறுபவர்களுக்கு ரூ.300 வழங்கிடவும் முதல்வர் கருணாநிதி ஆணையிட்டுள்ளார்.

ஒரு நிதியாண்டில் குறைந்தபட்சம் 240 நாட்கள் அல்லது அதற்கு மேலாக பணிபுரிந்த சில்லரைச் செலவினத்தின் கீழ் மாத அடிப்படையில் நிர்ணயிக்கப்பட்ட ஊதியம் பெறும் முழு நேர மற்றும் பகுதிநேரப் பணியாளர்கள், தொகுப்பூதியம் பெறும் பணியாளர்கள், தொகுப்பூதியம் பெற்று வந்த சத்துணவுத் திட்டப்பணியாளர்கள், ஒருங்கிணைந்த குழந்தைகள் வளர்ச்சி பணிகள் திட்டத்தில் பணிபுரியும் பணியாளர்கள் வரையறுக்கப்படாத ஊதிய விகிதத்தில் பணியாளர்கள் மற்றும் கிராம உதவியாளர்கள், ஒப்பந்தப் பணியாளர்கள், ஒப்பந்த அடிப்படையிலான தற்காலிக உதவியாளர்கள் மற்றும் குறைந்தது 240 நாட்கள் அல்லது அதற்கு மேலும் தினக்கூலி பெற்று பின்னர் நிரந்தரப் பணியாளர்களாகவும் பணியாற்றியவர்களுக்கு சிறப்பு மிகை ஊதியம் ரூ.1000 வழங்கப்படும்.

உள்ளாட்சி நிறுவனங்கள் மற்றும் அரசு உதவி பெறும் கல்வி நிறுவனங்கள் ஆகியவற்றில் பணிபுரியும் அலுவலர்கள் மற்றும் ஆசிரியர்கள், பல்கலைக்கழக மானியக்குழு, அனைத்திந்திய தொழில் கல்விக்குழு, இந்திய வேளாண் ஆராய்ச்சிக்கழகத்தின் ஊதிய விகிதங்களின் கீழ் வரும் அனைவருக்கும் இந்த போனஸ் வழங்கப்படும். இதனால் அரசுக்கு இந்த ஆண்டில் சுமார் ரூ.253 கோடி செலவாகும்’ எ‌ன்று கூறப்பட்டுள்ளது.

Artist: Arya, Pooja
Direction: Bala
Production: P.L. Thenappan
Banner: Sri Raj Lakshmi Films (P) LTD
Music: Ilayaraja

[Show as slideshow]

Artist: Sanjeev, Riya
Direction: Anita Udheep
Production: Anita Udheep
Music: Sasi

கூவத்தில் குழந்தைகள் குளிக்கவேண்டும்: முதல்வர் கருணாநிதி ஆசை

சென்னை: கூவம் நதியில் நம்முடைய வீட்டுப் பிள்ளைகள் குதித்து, நீந்தி விளையாடுவதைப் பார்க்கிற வரையில், எனக்கு நிச்சயமாக நிம்மதி இருக்காது என்று முதல்வர் கருணாநிதி கூறினார்.

சென்னை தியாகராய நகர் கோபதி நாராயண சாலை (ஜி.என்.செட்டி ரோடு)-திருமலை சாலை சந்திப்பில் ரூ.161.5 கோடி செலவில் புதிய மேம்பாலம் கட்டப்பட்டுள்ளது. இதை திறந்து வைத்து அவர் பேசுகையில்,

”சென்னை மாநகரத்தைக் காண்போர் அனைவருமே கவலையோடு தெரிவித்துக் கொண்டிருக்கின்ற ஒரு செய்தி போக்குவரத்து நெரிசல். ‘என்ன, காலையிலே பத்து மணிக்கு வருவதாகச் சொன்னீர்கள்; 12 மணி வரையிலே வரவில்லையே’ என்று கேட்டால், ‘என்ன செய்ய, போக்குவரத்தில் நெரிசல் அப்படி’ என்று சமாதானம் சொல்லுகின்ற நிலை இன்னமும் சென்னை மாநகரத்திலே இருப்பதை நம்மால் காண முடிகிறது.

அந்த நெரிசலைப் போக்குவதற்கு வழி என்ன என்று சிந்திக்கின்ற ஒரு ஆட்சி, சிந்திக்கின்ற ஒரு மாநகராட்சி மன்றம் சென்னையிலே இருக்கின்ற காரணத்தால், அந்த ஆட்சியை நடத்துகின்ற தி.மு.க. இருக்கின்ற காரணத்தால், அந்த இயக்கத்திற்குத் துணையாக காங்கிரஸ் போன்ற இயக்கங்கள் விளங்குகிற காரணத்தால்,

அவர்களுடைய துணையோடும், நேர்மையான, நாணயமான, ஊக்கம் மிகுந்த, உற்சாகம் மிகுந்த அதிகாரிகளுடைய துணையாலும், நாம் பாலங்களை, மேம்பாலங்களை அதிகமாக உருவாக்கினால், போக்குவரத்து நெரிசலை ஓரளவிற்குச் சமாளிக்கமுடியும் என்ற முடிவிற்கு வந்தோம்.

அந்த முடிவின்படிதான் இன்றைக்கு இதுவரையிலே இங்கே எடுத்துச் சொல்லப்பட்டதே 76 பாலங்கள் என்றும், அவற்றிலே சிறிய பாலங்களுடைய கணக்கு 26 என்றும், மேம்பாலங்களுடைய கணக்கு 10க்கும் மேற்பட்டவை என்றும் எடுத்துக்காட்டப்பட்டது.

அந்தப் பாலங்கள் எல்லாம், கழகம் ஆட்சிப் பொறுப்புக்கு வந்தபிறகு உருவானவை என்பதை யாரும் மறந்திருக்க முடியாது.

அப்படி உருவான பாலங்களைப் பாராட்டுவதற்குப் பதிலாக, இந்தப் பாலங்களெல்லாம் ஊழல் நிறைந்தவை என்று சொல்லி, பாலங்களைக் கட்டிமுடித்த மறுநாளே அதைக் கட்டுவதற்கு முற்பட்ட ஸ்டாலினையும், அதற்குத் துணைபுரிந்த அரசின் தலைவராக அன்றைக்கு முதல்வராக இருந்த என்னையும், என்னைச் சார்ந்தவர்களையும் கைது செய்தனர்.

மீண்டும் நாம் மக்களுடைய ஆதரவைப் பெற்று ஆட்சிக்கு வந்தவுடன், ஸ்டாலின் அப்பொழுது மேயராக இருந்தபோது கட்டிய பாலங்களைவிட இன்னும் அதிகமாகப் பாலங்களை சென்னை மாநகரத்திலே கட்டுகிற நிலைமை ஏற்பட்டு, அந்தப் பாலங்களைக் கட்டிக் கொண்டிருக்கிறார்.

இன்று காலை ஸ்டாலின் ஒரு காலண்டர் தயாரித்து, அதில் 10, 15 படங்கள் நிறைந்த ஒரு தொகுப்பைக் காட்டினார். அந்தத் தொகுப்பில் என்னை மிக மிகக் கவர்ந்த ஒரு படம்; ஒரு கோபுரம், அந்தக் கோபுரத்தைச் சுற்றி மதில் சுவர். அந்த மதில் சுவருக்கு அப்பால் ஒரு அருமையான பளிங்கு கற்கள் பதிக்கப்பட்ட சாலை. ‘இது எந்த ஊர்’ என்று கேட்டேன். ‘இது மதுரை மீனாட்சி அம்மன் கோவில்’ என்று ஸ்டாலின் சொன்னார்.

‘மதுரை மீனாட்சி அம்மன் கோவில் பிரகாரத்தை முன்பு சுற்றும்போது, சாலையெல்லாம் வெறும் மண் சாலையாக அல்லவா இருக்கும். இப்போது வந்துள்ள நம்முடைய மாநகராட்சி மேயருடைய பணி இது’ என்று சொன்னார். கண்ணாடியைப் போல இருக்கிறது, கோவிலைச் சுற்றியுள்ள அந்தச் சாலை.

நம்முடைய கொள்கைகள் வேறு இருந்தாலும்கூட, நம்முடைய நகராட்சி நிர்வாகத்திலே ஒவ்வொரு நகரமும், ஒவ்வொரு பகுதியும், தூய்மையாக இருக்கவேண்டும், எடுப்பாக இருக்கவேண்டும், சுற்றுலாப் பயணிகளைச் சுண்டியிழுக்க வேண்டும். அப்படிப்பட்ட முறையில் நம்முடைய நகரங்களும், நம்முடைய சாலைகளும், நம்முடைய ஊர்களும், நம்முடைய ஊர் நிர்வாகமும் இருக்க வேண்டும் என்பதற்காகத்தான் நாம் பணியாற்றி வருகிறோம்.

கிராமங்கள் நகரங்களாகவும், நகரங்கள் மாநகரங்களாகவும் மாறினால்தான், நாம் ஆட்சி நடத்துகிறோம் என்பதற்குப் பொருள். இல்லாவிட்டால், எல்லோரையும் போல நாமும் வந்தோம் அவர்களைப் போல நாமும் முடிந்தவரையிலே ஆட்சி நடத்தினோம், அதிகாரிகள் சொன்னதைக் கேட்டோம். நாம் நினைத்து எந்தத் திட்டத்தையும் நிறைவேற்றவில்லை,

மக்களுக்கென்று எந்த காரியத்தையும் செய்யவில்லை; மாற்றார் பார்த்துப் பாராட்டுகின்ற அளவிற்கு, மற்ற நாட்டுக்காரர்கள் பார்த்து வியக்கின்ற அளவிற்கு, எந்தக் காரியத்தையும் செய்யவில்லையென்றால், நாம் பதவிக்கு வருவதற்கும், ஏற்கனவே இருந்தவர்கள் பதவியிலே இருந்ததற்கும், எந்தவித வேறுபாடும் கிடையாது.

நீங்கள் எண்ணிப் பார்க்க வேண்டும்; நம்முடைய சென்னை ஒரு பத்து ஆண்டுகளுக்கு முன்பு எப்படியிருந்தது? பதினைந்து ஆண்டுகளுக்கு முன்பு எப்படியிருந்தது? சாலைகள் ஒழுங்காக இருந்ததுண்டா?. இன்றைக்கு எவ்வளவு நேர்த்தியாக சென்னை மாறியிருக்கிறது. ஆனால், என்னைப் பொறுத்தவரையில் இந்த மாற்றம் போதாது.

இன்னும் நிறைய மாற்றங்கள் தேவை. அதைத்தான் ஸ்டாலின் பேசும்போது குறிப்பிட்டார். இன்னமும் என் தந்தைக்குப் பூரண திருப்தியில்லை என்று சொன்னார், உண்மைதான்.

கூவம் திருந்துகிற வரையில் எனக்குத் திருப்தி இருக்காது. கூவத்திலே தெளிந்த நீரோடைபோல, பளிங்கு போல தண்ணீர் செல்கிற வரையில், அங்கே நம்முடைய வீட்டுப் பிள்ளைகள் குதித்து, நீந்தி விளையாடுவதைப் பார்க்கிற வரையில், எனக்கு நிச்சயமாக நிம்மதி இருக்காது, மகிழ்ச்சி இருக்காது.

ஏனென்றால், நான் கேள்விப்பட்டிருக்கிறேன்; நான் பார்த்ததில்லை. நம்முடைய தந்தையர் காலத்திலே சொல்லியிருக்கிறார்கள்.- ‘பச்சையப்ப முதலியார் கூவத்திற்கு வந்து குளித்துவிட்டுச் செல்வார்’ என்று. ஆனால், நீங்கள் பச்சையப்பர்களாக ஆகாமுடியாவிட்டாலும், தமிழின்பால், அறிவின்பால், கல்வியின்பால், இச்சையப்பர்களாக ஆகவேண்டும்.

இன்றையதினம் இங்கே திறந்து வைக்கப்பட்டிருக்கின்ற இந்தப் பாலத்திற்கு என்ன பெயர் வைக்கலாம் என்று யோசித்தேன். அருகில் அண்ணா மேம்பாலம் இருக்கிறது. கலைவாணர் என்.எஸ்.கேவினுடைய சிலையை இங்கே அமைத்தவர் அண்ணா.

அந்த நினைவாகவும், என் தலைமையிலே நடைபெற்ற அந்த விழாவில், அண்ணாவின் வாழ்க்கையில் கடைசி நிகழ்ச்சியாக கலைவாணருடைய சிலையை இந்தச் சாலையிலேதான் திறந்து வைத்தார் என்பதற்காகவும், அந்தச் சாலையை இணைக்கின்ற இந்தப் பாலத்திற்கு ‘கலைவாணர் மேம்பாலம்’ என்ற பெயரைச் சூட்டுகிறேன்” என்றார் கருணாநிதி.

கூவம் பிரச்னைக்கு தீர்வு காண்போம்-மு.க.ஸ்டாலின்:

உள்ளாட்சித் துறை அமைச்சர் மு.க.ஸ்டாலின் பேசுகையில்,

”நான் சென்னை மேயராக பணியாற்றிய காலத்தில் போக்குவரத்து நெரிசலை தீர்க்க திட்டங்கள் தீட்டப்பட்டன. பல பாலங்கள் கட்டப்பட்டன. ஆனால் கடந்த ஆட்சியில் சென்னையில் ஒரு பாலம் கூட கட்டப்படவில்லை.

14 மேம்பாலங்களை ஒரேநேரத்தில் கட்டினால் மக்களுக்கு சிரமம் ஏற்படும் என்பதற்காக 9 பாலங்கள் குறித்த காலத்திற்குள் கட்டி முடித்தோம். இன்னும் சொல்லப் போனால் மதிப்பீட்டு தொகையை விட குறைத்து மாநகராட்சிக்கு ரூ.30 கோடி மிச்சப்படுத்தி கொடுத்தோம்.

திட்டமிடப்பட்ட பெரம்பூர் மேம்பாலத்தை தொழில்நுட்ப பிரச்னை காரணமாகக் கட்டவில்லை. இதற்கிடையே ஆட்சி மாற்றம் ஏற்பட்டது. அந்த ஆட்சியாளர்கள் நினைத்திருந்தால் அதை கட்டி முடித்திருக்கலாம். ஆனால் அவர்கள் அதைச் செய்யவில்லை. இந் நிலையில், 2006ம் ஆண்டு தி.மு.க. மீண்டும் ஆட்சிக்கு வந்ததும் ஐ.ஐ.டி., அண்ணா பல்கலைக்கழக கட்டட நிபுணர்களுடன் கலந்து பேசினோம். தற்போது பாலம் கட்டும் வேலைகள் நடந்து வருகிறது.

கூவம் ஆற்றை தூய்மைப்படுத்தும் திட்டத்தை எங்கள் ஆட்சியிலேயே செய்து முடிப்போம். இந்தத் திட்டத்திற்கு உலக வங்கியை மட்டுமன்றி சத்யசாய் அறக்கட்டளையையும் அணுக உள்ளோம். இதற்காக நானும், பொதுப்பணித்துறை அமைச்சர் துரைமுருகனும் விரைவில் சத்யசாய் அறக்கட்டளை நிர்வாகிகளை சந்திக்க உள்ளோம். தி.மு.க. ஆட்சி காலத்திலேயே கூவம் பிரச்னைக்கு தீர்வு காண்போம்” என்றார்.

பொங்கல் சிறப்பு ரயில்கள்: தெற்கு ரயில்வே ஏற்பாடு
 
சென்னை: பொங்கல் பண்டிகையை முன்னிட்டு சிறப்பு ரயில்களை தெற்கு ரயில்வே இயக்குகிறது.

இது தொட‌ர்பாக தெ‌ற்கு ர‌யி‌ல்வே வெ‌ளி‌யி‌ட்டு‌ள்ள செ‌ய்‌தி‌க் கு‌றி‌ப்‌பி‌ல்,
 
‘நாகர்கோவிலில் இருந்து, சென்னை சென்‌ட்ரலுக்கு, ஜனவ‌ரி 4 மற்றும் ஜனவ‌ரி 11 ஆகிய தேதிகளில் மாலை 4.30 மணிக்கு, புறப்படும் சிறப்பு ரயில் மறுநாள் காலை 8.45 மணிக்கு சென்னை சென்‌ட்ரல் நிலையத்தை அடையும்.

அதுபோல், ஜனவ‌ரி 5 மற்றும் ஜனவ‌ரி 12 ஆகிய தேதிகளில், சென்னை சென்‌ட்ரல் நிலையத்தில் இருந்து பகல் 12.30 மணிக்கு சிறப்பு ரயில்கள் நாகர்கோவிலுக்கு புறப்பட்டு செல்கின்றன.

இந்த ரயில்கள், வள்‌‌ளியூர், நெல்லை, மணியாச்சி, கோவில்பட்டி, சாத்தூர், விருதுநகர், மதுரை, திண்டுக்கல், கரூர், ஈரோடு, சேலம், ஜோலார்பேட்டை, காட்பாடி மற்றும் அரக்கோணம் மற்றும் பெரம்பூர் ஆகிய இடங்களில் நிற்கும்.

நாகர்கோவிலில் இருந்து, சென்னை எழும்பூருக்கு ஜன.5, 12, 19 மற்றும் 26 ஆகிய தேதிகளில் இரவு 7.40 மணிக்கு புறப்படும் சிறப்பு ரயில்கள், மறுநாள் காலை 8.50 மணிக்கு சென்னை எழும்பூரை வந்தடையும்.

இதுபோல், சென்னை எழும்பூர் நிலையத்தில் இருந்து, ஜன.6, 13, 20 மற்றும் 27 ஆகிய தேதிகளில் பிற்பகல் 3.40 மணிக்கு புறப்படும் சிறப்பு ரயில்கள், நாகர்கோவிலை மறுநாள் காலை 5.30 மணிக்கு சென்றடையும்.

இந்த ரயில்கள், வள்‌‌ளியூர், நெல்லை, மணியாச்சி, கோவில்பட்டி, சாத்தூர், விருதுநகர், மதுரை, கொடைக்கானல் ரோடு, திண்டுக்கல், திருச்சி, விருத்தாச்சலம், விழுப்புரம், திண்டிவனம், மேல்மருவத்தூர், செங்கல்பட்டு, தாம்பரம் மற்றும் மாம்பலம் ஆகிய இடங்களில் நிற்கும்’ எ‌ன்று கூறப்பட்டுள்ளது.

பேண்டலூன்ஸ் பெமினா மிஸ் இந்தியா - 2009 அழகிப் போட்டி

ஹைதராபாத்தில் நடந்த பேண்டலூன்ஸ் பெமினா மிஸ் தென்இந்தியா - 2009 அழகிப் போட்டியில் ஃபயத் பாண்டே இவ்வாண்டின் அழகியாக முடிசூட்டப்பட்டார் (நடுவில் இருப்பவர்). இரண்டாவதாக ராகினி திவேதியும் (​இடது), மூன்றாவது அழகியாக சாரா ஷாவும் (வலது) தேர்ந்தெடுக்கப்பட்டனர்.

தமிழ் சினிமா - 2008

இந்த ஆண்டு 26 கதாநாயகன்கள், 36 கதாநாயகிகள் அறிமுகமாகியுள்ளனர். இதுவரை இல்லாத அளவுக்கு 62 புதுமுகங்கள் தமிழ்த் திரையுலகில் அறிமுகமாகியுள்ளனர்.

அதிக திரைப்படங்களில் பரத் நடித்துள்ளார். இவருடைய நடிப்பில் பழனி, நேபாளி, முனியாண்டி விலங்கியல் மூன்றாமாண்டு, சேவல் ஆகிய 4 திரைப்படங்கள் வெளியாகின.

அதிக திரைப்படங்களில் நடித்த நடிகை நயன்தாரா. அவர் நடித்த யாரடி நீ மோகினி, சத்யம், குசேலன், ஏகன் ஆகிய 4 திரைப்படங்கள் வெளிவந்தன.

2008 ஆண்டில் டப்பிங் திரைப்படங்கள் இல்லாமல் 108 நேரிடையான தமிழ்த் திரைப்படங்கள் வெளியாகி உள்ளன. ஆங்கிலத் திரைப்படங்கள் 60 வெளியாகின.

இந்த வருடம் வெற்றியை ருசி பார்த்த திரைப்படங்கள் 18. அவை:

1. பொல்லாதவன் - தனுஷ்,  2. அஞ்சாதே - நரேன் 3.யாரடி நீ மோகினி - தனுஷ் 4.சந்தோஷ் சுப்ரமணியம் - ஜெயம் ரவி 5.தசாவதாரம் - கமல்ஹாசன் 6.சுப்ரமணியபுரம்  7.ஜெயம் கொண்டான்  8.சரோஜா 9.காதலில் விழுந்தேன் 10.தெனாவட்டு - ஜீவா 11.குருவி - விஜய் 12.வாரணம் ஆயிரம் - சூர்யா 13.திண்டுகல் சாரதி - கர்ணாஸ் 14.பொம்மலாட்டம் - பாரதிராஜா 15.நாயகன் - ரித்தீஷ் 16.சிலம்பாட்டம் - சிம்பு 17.பூ 18.அபியும் நானும்

2008 ஆண்டு மண வாழ்க்கையைத் தொடங்கிய திரையுலக நட்சத்திரங்கள்:

1.நடிகர் செந்தில் மகன் மணிகண்ட பிரபு திருமணம் (பிப்.,3)

2.விந்தியா - கோபி (பிப்.,16)

3. விஷாலின் அண்ணன் தயாரிப்பாளர் விக்ரம் கிருஷ்ணா - நடிகை ஸ்ரேயா ரெட்டி

4. ரூபஸ்ரீ - தினேஷ் (மார்ச் 9). பின்னர் தினேஷ் தற்கொலை செய்துகொண்டார்.

5.இயக்குநர் ஏ.ஆர்.புவனராஜா - தனலட்சுமி

6.ஜில்லுன்னு ஒரு காதல் இயக்குநர் கிருஷ்ணா-பூர்ணிமா (மார்ச் 24)

7.இசை அமைப்பாளர் டி.இமான் - மோனிகா (ஏப்.,24)

8. கனிகா -  ஷியாம் (நடிகை ஜெயஸ்ரீ தம்பி) (ஜூன் 16)

9.இயக்குநர் திருமலை- நதியா (ஜூன் 16)
10. கோபிகா - டாக்டர் அஜிலைஸ் (ஜூலை 24)

11. சிபி - ரேவதி (செப்., 14)

புத்தாண்டை வரவேற்க சென்னை ஓட்டல்கள் தயார்

சென்னை: ஆங்கிலப் புத்தாண்டை வரவேற்க சென்னை நட்சத்திர ஓட்டல்கள் தயாராகி விட்டன. ஐரோப்பிய நடனம், குத்தாட்டம், கானா மற்றும் பாலிவுட் பாடகர்களின் கலை நிகழ்ச்சி என பலவிதமான நிகழ்ச்சிகளுக்கு ஏற்பாடுகள் செய்யப்பட்டுள்ளன. விடிய விடிய நடனங்கள் மற்றும் மது விருந்துகளும் நடக்கவிருக்கின்றன. போட்டிகள், பரிசுகள் என வாடிக்கையாளர்களை கவர்ந்திழுக்கும் திட்டங்களும் தயார்.

கடந்த ஆண்டு சென்னை ராதாகிருஷ்ணன் சாலையில் உள்ள சவேரா ஓட்டலில் மேடை சரிந்து 3 பேர் பலியானார்கள். இதைத்தொடர்ந்து இவ்வருடக் கொண்டாட்டத்திற்குக் கடுமையான கட்டுப்பாடுகளை விதித்துள்ளது சென்னை மாநகர காவல்துறை.

புத்தாண்டை கொண்டாடுகிறோம் என்கிற பேரில் கலாச்சாரம் சீரழியாமல் பார்த்துக் கொள்ளவும் அறிவுரை கூறப்பட்டுள்ளது. எனவே, அந்த ஜாக்கிரதை உணர்வோடு புத்தாண்டை வரவேற்க நட்சத்திர ஓட்டல்கள் தயாராகிவிட்டன.

சென்னை பார்க் ஷெராட்டனில் கடந்த ஆண்டை போலவே ஐரோப்பிய நடனம் நடைபெறுகிறது. பாலிவுட் பாடகர் ஸ்ருதி உள்ளிட்ட பல பிரபலங்களின் கலைநிகழ்ச்சிகள் நடக்கவுள்ளன. ஜோடியாகச் சென்றால் 9 ஆயிரம் ரூபாய். தனியாகச் சென்றால் 5,200 ரூபாய். மது வகைக்கு அளவு கிடையாது. பபே உணவு. மற்றொரு அரங்கில் ஜோடிக்கு 7,500 ரூபாய். தனியாகச் சென்றால் 4,500 ரூபாய். மதுவகைகள் மற்றும் உணவுக்கு அளவில்லை.

சென்னை நுங்கம்பாக்கத்தில் உள்ள தி பார்க் நட்சத்திர ஓட்டலில் டிஸ்கோ நடனம், இசை நிகழ்ச்சிகள் நடைபெற உள்ளன. ஜோடியாகச் செல்பவர்களுக்கு 5,000 - 6000 ஆயிரம் ரூபாய். தனியாகச் செல்பவர்களுக்கு 5,500 ரூபாய் முதல் 7000 ரூபாய் வரை கட்டணமாகும். இங்கும் மது வகைகள் மற்றும் உணவுக்கு அளவு கிடையாது.

திநகர் ரெசிடன்சி டவரில் உள்ள மூன்று அரங்குகளில் புத்தாண்டுக் கொண்டாட்டங்கள் ஏற்பாடு செய்யப்பட்டுள்ளன. ஜோடிக்கு 2,700, 3,200, 4000 என கட்டணங்கள் நிர்ணயிக்கப்பட்டுள்ளன.

இவை மட்டுமல்லாமல் சென்னையில் உள்ள பெரும்பாலான நட்சரத்திர ஓட்டல்களில் புத்தாண்டுக் கொண்டாட்டங்களுக்கு ஏற்பாடு செய்யப்பட்டுள்ளது.