தமிழகத்தில் மழையினால் பலியானோர் குடும்பங்களுக்கு உதவிக்தொகை ரூ.2 லட்சமாக உயர்வு

தமிழகத்தில் நடைபெறும் வெள்ள நிவாரணப் பணிகள் குறித்து 12 மாவட்ட கலெக்டர்களுடன் முதலமைச்சர் கருணாநிதி ஆய்வுக்கூட்டம் நடத்தினார்.

அதில் தங்களது கருத்துக்களை மாவட்ட கலெக்டர்கள் எடுத்து வைத்தார்கள். அதன் பிறகு முதலமைச்சர் கருணாநிதி பேசியதாவது

வெள்ள நிவாரணம் பணிகள் தொடர்பாக கலெக்டர்கள் இதுவரையில் செய்திருக்கும் துயர்துடைப்புப் பணிகளை நான் பாராட்டுகின்றேன். வருவாய்த்துறை, காவல்துறை, தீயணைப்புத்துறை, மின்வாரியம், மக்கள் நல்வாழ்வுத்துறை, பொதுப்பணித்துறை, நெடுஞ்சாலைத்துறை ஆகிய துறைகள் ஆற்றிய பணிகளையும் பாராட்டுகிறேன்.

எனினும் இன்னும் வேகமாகவும், நல்ல முறையிலும் தங்களுடைய பணிகளை மேற்கொண்டால்தான் இது போன்ற இயற்கை இடர்களிலிருந்து எதிர்காலத்தில் மக்களைக் காப்பாற்றவும், பயிர்களைக் காப்பாற்றவும் முடியும் என்பதை வலியுறுத்திக் கூறக் கடமைப்பட்டிருக்கிறேன். நீங்கள் செய்யும் பணிகளின் மூலமாக ஊக்கமும் வெளிப்பட வேண்டுமென்று விரும்புகிறேன்.

பாதிக்கப்பட்ட மக்களுக்கு உடனடியாக ஆறுதலும், நம்பிக்கையும் தரத்தக்க வகையில் உங்கள் பணிகளை நிறைவேற்றிட வேண்டும். புயல்-பெருமழை காரணமாக உயிரிழந்த ஒவ்வொரு குடும்பங்களுக்கும், கால்நடை இழந்தோர்க்கும் நிவாரண உதவியை உடனடியாக அதாவது 10.12.2009க்குள் வழங்கி முடிக்க வேண்டும்.

வெள்ளம் சூழ்ந்த வீடுகளுக்கும் வெள்ளம் நுழைந்த வீடுகளுக்கும் - பகுதியாகவோ அல்லது முழுமையாகவோ சேதமடைந்த வீடுகளுக்கும் வழங்கவேண்டிய நிவாரண உதவிகளை, ஒளிவு மறைவின்றி வெளிப்படையாக வழங்க வேண்டும்.

இதை சொல்வதற்கு காரணம் டிராப்ட் ஆகவோ, காசோலையாகவோ வழங்கலாமா என்று கருத்துக் கூட பேசப்பட்டாலும், நம்முடைய மாநிலத்தை பொறுத்தவரை பணமாகவே நேரில் ஒவ்வொருவரிடமும் வழங்குவதில்தான் பாதிக்கப்பட்டவர்களுக்கு திருப்தி அளிக்கும். அந்த நிதி உதவிகளை 15.12.2008க்குள் வழங்கி முடித்திட காலக்கெடு நிர்ணயிக்கப்பட்டுள்ளது.

பயிர்கள் சேதம் பற்றிய கணக்கெடுப்பை நடத்தி முடித்திடவும் அவற்றுக்கும் நிவாரண நிதி உதவி வழங்கிடவும் 31.12.2008க்குள் முடித்திட காலக்கெடு நிர்ணயிக்கப்பட்டுள்ளது.

நிவாரண உதவிகளை பாதிக்கப்படாதோர் தட்டிச் சென்றுவிடாமல் மிகுந்த முன்னெச்சரிக்கையோடு இருக்க வேண்டும். பாதிக்கப்படாதோர் ஓரிருவர் நிவாரண உதவிகளை தட்டிச்செல்ல முயன்றாலும்; பாதிக்கப்பட்டோர் எவரும் அந்த நிவாரண உதவிகளைப் பெறுவதிலிருந்து விடுபட்டுவிடாமல், கண்ணும் கருத்துமாகப் பார்த்துக் கொள்ளவேண்டும்.

பொதுவாக வெள்ளம் - வறட்சி ஏற்படும்போது நிலவிடும் சூழல்களை, அந்த நிலைமைகள் மாறியதற்கு பிறகு அவற்றை முற்றிலும் நாம் மறந்துவிடுவோம். அரசிலே உள்ள நாங்கள் மாத்திரமல்ல; அதிகார வர்க்கத்திலே உள்ளவர்களும் மறந்துவிடுவது இயல்பாக ஆகிவிட்ட ஒன்றாக உள்ளது. இந்த முறை அப்படி இல்லாமல்; வெள்ளத்தால் ஏற்பட்டுள்ள அனுபவங்களின் அடிப்படையில் நிரந்தரமான தீர்வுகளைப் பற்றி தொடர்புடைய துறைகளோடு கலந்தாலோசனை செய்து தேவையான திட்டங்களை உருவாக்கி செயல்படுவதற்கான முயற்சிகளை மேற்கொள்ள வேண்டுமென்று கேட்டுக் கொள்கிறேன்.
அந்த பணிகளைத் தொடங்கி செய்யத்தான் இப்போது அமைச்சர்களைக் கொண்ட ஒரு துணைக்குழு; உள்ளாட்சித்துறை அமைச்சர் ஸ்டாலின் தலைமையிலே அமைக்கப்பட்டு, அதன் பணிகளை ஆற்றி வருகிறது. அதை இன்னும் தீவிரப்படுத்தி, ஆழ்ந்து யோசித்து நம்முடைய அரசின் சார்பில் செய்ய வேண்டியவைகளை கூடுமான வரையில் பட்ஜெட் வெளியிடுவதற்கு முன்பாகவோ அல்லது சில்லறை பட்ஜெட் வந்த பிறகோ நாட்டுக்கு அறிவிக்கும் வகையில் ஆவன செய்திட வேண்டுமென்று அந்த குழுவினரை கேட்டுக் கொள்கிறேன்.

வருவாய் அலுவலர்களுக்கு அதிகாரம்

கால்நடை இழப்புக்கு நிவாரண உதவி வழங்கும் அதிகாரத்தை மாவட்ட ஆட்சியரிடமிருந்து கோட்ட வருவாய் அலுவலர்களுக்கு மாற்றிக் கொடுக்க இன்றைய கூடத்தில் முடிவு செய்யப்பட்டுள்ளது. ஆறுகள், குளங்கள், ஏரிகள் ஆகியவற்றில் தூர் வாரும் பணிகளை மாவட்ட கலெக்டர்களே மேற்பார்வையிட்டு தரத்தை உறுதி செய்திட வேண்டும் என்றும் இன்றைய கூட்டத்தில் முடிவெடுக்கப்பட்டுள்ளது. இந்த முடிவை நல்ல முறையிலே நிறைவேற்ற வேண்டும்.
உடைமைகள் முழுவதையும் இழந்து விட்ட குடும்பங்களுக்கு அந்த குடும்பங்களிலே எத்தனை பேர் இருந்தாலும் அத்தனை பேருக்கும் தலா ஒரு வேட்டி, ஒரு சேலை என்ற முறையில் வழங்க வேண்டும். பொங்கல் நேரத்திலே வழங்குவது என்பது ஒரு புறம் இருந்தாலும் கூட நான் முதலிலே கூறியதைப் போல, இந்த பாதிப்பை ஈடுகட்ட அவர்களுக்கு இந்த இலவச வேட்டி சேலைகளை உடனடியாக நாளைக்கே தொடங்கி வழங்கிட வேண்டும்.

இரண்டு இலட்சமாக அதிகரிப்பு

அம்மாதிரியான குடும்பங்களில் பள்ளிக்கு செல்லும் மாணவ, மாணவியருக்கு இலவசமாக பாடப்புத்தகங்கள், சீருடைகள் வழங்கவும் முடிவு செய்திருக்கிறோம். அவகைள் நேர்மையான முறையில் அவர்களுக்கு சென்று கிடைத்திட பணியாற்ற வேண்டும்.

இந்த பெருமழை காரணமாக உயரிரிழந்தோருக்கு தலா ஒரு லட்ச ரூபாய் வீதம் வழங்குவதென்று அறிவித்திருக்கிறோம். அது போதுமானதல்ல என்று எதிர்கட்சிகளின் சார்பில் பொதுவான சில கட்சிகளின் சார்பில் குரல் இன்றைக்கு ஓங்கி ஒலித்துக் கொண்டிருக்கின்றது.
எனவே இந்த கூட்டத்தில் எடுக்கின்ற முடிவாக அந்த தொகையை - இறந்தோர் குடும்பம் ஒவ்வொன்றுக்கும் தலா ஒரு லட்சம் ரூபாய் உதவித் தொகை என்பதை இரண்டு லட்ச ரூபாய் என்று உயர்த்தி அறிவிக்கப்படுகிறது. ஏற்கனவே ஒரு லட்சம் ரூபாய் கொடுக்கப்பட்டவர்களுக்கு மேலும் ஒரு லட்சம் ரூபாய் வழங்கப்படும்.

வெள்ளப்பாதிப்புகளையும், நிவாரணப் பணிகளையும் பார்வையிட மத்திய குழு வருகிறது. அந்த குழு வருகிற நேரத்தில் அவர்கள் பார்ப்பதற்காக மாத்திரமல்ல, பாதிக்கப்பட்ட மக்கள் கண்டு ஆறுதல் அடைவதற்காக நம்முடைய ஒவ்வொரு மாவட்டத்திலும் - அதிலும் குறிப்பாக பாதிக்கப்பட்ட மாவட்டங்களில், மாவட்ட ஆட்சி தலைவர்கள் முன்னின்றும் எல்லா அதிகாரிகளையும் வயல்களில் - எந்தெந்த இடங்கள் பாதிக்கப்பட்டிருக்கிறதோ அந்த இடங்களில் - ஆற்றுப் பகுதிகளில் - வாய்க்கால் பகுதிகளில் - சாலையோரங்களில் - அங்கெல்லாம் நின்று பணியாற்ற வேண்டும்.

ஒருமுறை நம்முடைய மதுராந்தகம் ஏரி தூர்வாரும் பணி நடைபெற்றுக் கொண்டிருந்த போது அப்போது பிரதமராக இருந்த இந்திரா காந்தியை அழைத்து வந்து பார்வ்வையிடச்செய்தபோது, அவர்கள் பிரமித்துப் போய்விட்டார்கள். அந்த ஏரி முழுவதும் - ஏதோ பூச்சிகள் பறப்பதைப் போல - பக்கத்திலே உள்ள வேடந்தாங்கலில் உள்ள பறவைகள் பறப்பதைப் போல அத்தனை மக்கள் அங்கே வேலை செய்து கொண்டிருந்த காட்சியைப் பார்த்து நாம் கேட்ட பணத்தை உடனடியாகக் கொடுத்தார்கள். இவ்வளவு பேர் வேலை செய்கிறார்களே என்று.

அந்த அளவுக்கு இதை டெல்லியிலே உள்ளவர்களை நம்ப வைப்பதற்காக அல்ல, நம்முடைய மக்களை ஆற்றுப்படுத்துவதற்காக, அமைதிப்படுத்துவதற்காக, அவர்களுடைய கண்ணீரைத் துடைப்பதற்கு, கவலைகளை மறப்பதற்கு - பரவாயில்லை, நம்முடைய அரசு, அதிகாரிகளும் நமக்காக இந்த அளவுக்கு கஷ்டப்படுகிறார்கள் என்கின்ற அந்த உணர்வை அவர்களுடைய உள்ளத்திலே பதிய வைக்க நம்முடைய அதிகாரிகள் பாடுபட வேண்டும்.

நாம் நம்முடைய கடமைகளைச் செய்கின்ற நேரத்தில் இயற்கையின் இது போன்ற தொல்லைகள் அடிக்கடி ஏற்படுகின்றன. கடந்த மாதம் வயல் வெளிகளைப் பார்த்தபோது பயிர் பச்சைகள் எல்லாம் செழித்துக் குலுங்கி நாம் ஒருவரையொருவர் பார்த்து மகிழ்ச்சியடைகின்ற அளவிற்கு இருந்ததும் - திடீரென்று ஏற்பட்ட இயற்கை சூழலின் மாற்றத்தால் இப்படி ஒருநிலை ஏற்பட்டதும் - எதிர்பார்க்கவில்லை - இருந்தாலும் எதிர்பாராதது நடந்தாலுங்கூட, அவைகளை எதிர்கொள்கின்ற திறன் நம்முடைய அரசுக்கு உண்டு.

அரசு என்றால் அமைச்சர்கள் மாத்திரமல்ல, உங்களைப்போன்ற அதிகாரிகளையும் கொண்டததுதான் அரசு. எனவே அப்படிப்பட்ட இந்த அரசுக்கு மேலும் மேலும் நல்ல பெயரும், திறமையான அரசு, மக்களிடம் அன்பும், அரவணைப்பும் உள்ள அரசு, ஏழைகளுக்காக இரக்கம் காட்டுகின்ற அரசு என்ற நிலைப்பாட்டை உறுதிப்படுத்துகின்ற ஒரு பொறுப்பினை நீங்கள் ஏற்றுக்கொள்ள வேண்டும்.
இவ்வாறு கருணாநிதி பேசினார்.

• CM sanctioned Rs. 500Cr more as flood compensation
• Lenavin Parvayil
• Black flag to Pranab: karunanadhi condemns
• Doctor’s opinion about Karunanadhi’s health condition
• Flood relief to every bit of land, says CM
• Flood relief to all victims : TN govt assures
• Flood compensation: CM warns TN parties
• Karunanidhi condemns Fonseka
• Cyclone may bring rain to TN, Pondicherry
• Flood compensation not reach proper person - Vijayakanth