நடிகர் வடிவேலு தாக்குதல் விவகாரம்: தே.மு.தி.க. வினர் 13 பேர் சரண்

சென்னை: நடிகர் வடிவேலு அலுவலகத்தை தாக்கிய வழக்கில் தே.மு.தி.க. வினர் 13 பேர் சைதாப்பேட்டை நீதிமன்றத்தில் நேற்று சரண் அடைந்தனர்.

சென்னை சாலிகிராமத்தில் உள்ள நடிகர் வடிவேலுவின் அலுவலகம் கடந்த ஆண்டு செப்டம்பர் மாததம் 12ஆம் தேதி தாக்கப்பட்டது. அன்று தனது பிறந்தநாளைக் கொண்டாடிவிட்டு வீட்டுக்கு வந்தார் வடிவேலு. அவருடைய வீட்டுமுன் நிறைய கார்கள் நிற்பதைக் கண்டவர் அவற்றை அப்புறப்படுத்த கூறியுள்ளார்.

இதனால் அவரது வீட்டையும் அலுவலகத்தையும் ஒரு கும்பல் அடித்து நொறுக்கியது. நடிகர் வடிவேலு மற்றும் உதவியாளர் மாரிமுத்து கொடுத்த புகாரின்பேரில் காவல்துறையினர் வழக்கு பதிவு செய்தனர்.

இந்த வழக்கில் தே.மு.தி.க.வைச் சேர்ந்த சதீஷ்குமார், ராதாகிருஷ்ணன், சரவணன், கிருஷ்ணன், சையத் அலி, தட்சிணாமூர்த்தி, தயாளன், கங்காதரன், வெங்கடேசன், அன்புராஜ், முருகன், மாரி ஆகியோர் கைது செய்யப்பட்டனர். பின்னர் அவர்கள் ஜாமீனில் வெளியே விடப்பட்டனர்.

இந்த வழக்கு விசாரணை கடந்த வாரம் வந்தபோது நடிகர் வடிவேலு மற்றும் உதவியாளர் மாரிமுத்து சாட்சியம் அளித்தனர். ஆனால் குற்றம் சாட்டப்பட்ட யாரும் நீதிமன்றத்தில் ஆஜராகவில்லை.

இதைத் தொடர்ந்து தே.மு.தி.க. வைச்சேர்ந்த 13 பேருக்கும் பிடிவாரண்டு பிறப்பித்தார் நீதிபதி.
 
இந்த வழக்கில் சம்மன் வந்தால் மட்டுமே நேரில் ஆஜராகவேண்டும் என்று வடிவேலுக்கு உத்ரவிட்டார் நீதிபதி.
 
இந்நிலையில் இந்த வழக்கின் விசாரணை நேற்று நடந்தது. அப்போது பிடிவாரண்டு பிறப்பிக்கப்பட்ட விஜயகாந்தின் மேலாளர் சதீஷ்குமார் உள்பட 13 தே.மு.தி.க. வினரும் நீதிமன்றத்தில் சரண் அடைந்தனர். தங்கள் மீதான பிடிவாரண்டு உத்தரவை ரத்து செய்யவேண்டும் என்று கோரி அவர்கள் மனு தாக்கல் செய்தனர்.

இதை ஏற்றுக்கொண்ட நீதிபதி பெஞ்சமின் ஜோசப், 13 பேரின் பிடிவாரண்டையும் ரத்து செய்து, விசாரணையை அடுத்த மாதம் 6 ஆம் தேதிக்கு தள்ளி வைத்தார்.

குடியரசுத் தலைவரின் பாதுகாப்பு வாகனங்கள் மீது நக்சலைட்டுகள் தாக்குதல்: 4 பேர் பலி

ஜக்தல்பூர்: குடியரசுத் தலைவர் பிரதீபா பாட்டீலின் பாதுகாப்பு அணிவகுப்பில் நக்சலைட்டுகள் நடத்திய தாக்குதலில், காவல்துறை ஜீப் வெடித்து சிதறி யது. இந்த அசம்பாவித சம்பவத்தில் காவல்துறை அதிகாரி உள்பட 4 பேர் இறந்தனர்.

குடியரசுத் தலைவர் பிரதீபா பாட்டீல் சட்டீஷ்கர் மாநிலத்தில் சுற்றுப்பயணம் செய்துவருகிறார். நேற்று காலை 11 மணி அளவில் அவர், பஸ்தர் மாவட்டம், ஜக்தல்பூர் அருகே இந்திராவதி ஆற்றில் உள்ள ‘சித்ர கோதே’ நீர்வீழ்ச்சிக்கு காரில் சென்று கொண்டிருந்தார்.

அப்போது அவருடைய காருக்கு பாதுகாப்பாக முன்னதாக சென்றுக்கொண்டிருந்த வாகனங்கள்மீது நக்சலைட்டுகள் திடீரென தாக்குதல் நடத்தினர். அங்கு மறைந்திருந்த நக்லைட்டுகள் காவல்துறை வாகனங்கள்மீது வெடிகுண்டுகள் வீசினர். ஆங்காங்கே புதைத்து வைக்கப்பட்டிருந்த கண்ணி வெடிகளும் வெடித்தன.

இதில் ஜீப் ஒன்று, வெடித்து சிதறி, பலத்த சேதம் அடைந்தது. அதில் இருந்த மத்திய காவல் துணை கமாண்டர் மகா பத்ரா, ஓட்டுநர் மற்றும் 2 காவல்துறையினர் உடல் சிதறி இறந்தனர். மேலும் 4 பேர் காயமடைந்தனர்.

இந்த சம்பவத்தில் குடியரசுத் தலைவர் பிரதீபா பாட்டீல் உயிர் தப்பினார். அவருக்கு எந்த பாதிப்பும் ஏற்படவில்லை. தனது கார் பயணத்தை தொடர்ந்த அவர் ‘சித்ர கோதே’ நீர்வீழ்ச்சிக்கு சென்று கண்டுகளித்தார். பின்னர் அவர் ஹெலிகாப்டர் மூலம் ராய்ப்பூர் சென்றார்.

அடுத்த ஆட்சி தே.மு.தி.க. தான்!: அடித்துச் சொல்கிறார் விஜயகாந்த்

மதுரை: அடுத்து தே.மு.தி.க. தான் ஆட்சி அமைக்கும் என்பதை அடித்துச் சொல்வேன். நான் நானாகத்தான் இருக்கிறேன். தெய்வமும், மக்களும் எனக்குத் துணையாக உள்ளனர். பல கட்சிகள் கூட்டணிக்காக வருகிறார்கள். தே.மு.தி.க. வின் வளர்ச்சியைப் பார்த்து வருகிறார்கள் என்று தே.மு.தி.க. தலைவர் விஜயகாந்த் கூறியுள்ளார்.

பல்வேறு கட்சிகளைச் சேர்ந்தவர்கள் தே.மு.தி.க. வில் இணையும் விழா, தேமுதிக மதுரை தலைமைக் கழக அலுவலக வளாகத்தில் நடந்தது.  அப்போதுவிஜயகாந்த் பேசுகையில்,

”தமிழகத்தில் ஜனநாயக ஆட்சி நடக்கிறது என்று முதல்வர் கூறுகிறார். ஆனால் மதுரையில் அவரது மகன் சர்வாதிகாரம் செய்து வருகிறார்.

முதல்வர் அவரா, அல்லது அவரது மகனா? மதுரையில் தனியாட்சி நடந்து வருகிறது. நேரு, படேல் உள்ளிட்டோர் பாடுபட்டு வாங்கிக் கொடுத்த சுதந்திரம் மதுரையில் இல்லை.

ஒரு திரைப்படத்தைத் திரையிடக் கூடாது என்று தியேட்டர் உரிமையாளர்களை மிரட்டுவது ஜனநாயகத்தின் குரல் வளையை நெரிப்பது போலாகும்.

காதலில் விழுந்தேன் படத்தை போடுகிறீர்களா, சரி போட்டுக் கொள்ளுங்கள், ஆனால் மவனே அடுத்தடுத்து டார்ச்சர் கொடுப்போம் என்று பயமுறுத்துகிறார்கள். இதைப் பார்த்து பயந்து போன தியேட்டர் உரிமையாளர்கள் எதற்கு வம்பு என்று படத்தை திரையிட தயங்குகின்றனர்.

எனது கல்யாண மண்டபத்தை இடித்து விட்டு பாலம் கட்டப் போவதாக கூறினார்கள். ஆனால் பாலம் கட்டுவதற்கான ஒரு நடைமுறையும் இதுவரை மேற்கொள்ளப்படவில்லை.

விஜயகாந்த் ஆட்சிக்கு வந்தால் என்ன செய்ய முடியும்? இது எல்லோருடைய கேள்வி. 5 முறை முதல்வராக இருந்த கருணாநிதியால் விலைவாசி குறையவில்லை.

தமிழக காங்கிரஸ் தலைவர் தங்கபாலு தமிழக அமைச்சரவையில் இடம் கேட்பேன் என்றால் புதுச்சேரியில் தி.மு.க. வுக்கு இடம் கேட்பேன் என்கிறார் கருணாநிதி.

ரேஷன் கடைகளில் 50 ரூபாய்க்கு மளிகைப் பொருட்களை தரப் போவதாக கூறுகிறார்கள். நான் அதற்கு முன்பே ரேஷன் பொருட்களை பாக்கெட்டில் போட்டு வீட்டுக்கே தருவோம் என்றேன்.

50 ரூபாய் மளிகைப் பொருட்களை வாங்கினால்தான் ஒரு ரூபாய் அரிசியைத் தருகிறார்கள். அப்படியானால் ஒரு கிலோ அரிசி விலை 51 ரூபாயா?

எல்லாத் துறைகளிலும் லஞ்சம் தலைவிரித்தாடுகிறது. தமிழகத்தில் அரசு பஸ் விபத்துக்கள் அதிகம். காரணம், டிரைவிங் தெரியாமலேயே பலர் லஞ்சம் கொடுத்து டிரைவர் வேலை வாங்குகிறார்கள்.

நான் தேர்தலில் வெற்றி பெற்றால் பசு மாடு தருவேன் என்றேன். இலவசமாக அல்ல, பாலை விற்று அதை வைத்து பணத்தைக் கட்டுங்கள் என்கிறேன். பெண் குழந்தை பிறந்தால் 10 ஆயிரம் ரூபாய், அந்தக் குழந்தையின் பெயரில் வங்கியில் டெபாசிட் செய்வேன் என்றேன். அந்தக் குழந்தையின் திருமணத்தின்போது 1 லட்சம் ரூபாய் கிடைக்கும் என்பதால்தான் அப்படிச் சொன்னேன்.

அடுத்து தே.மு.தி.க. தான் ஆட்சி அமைக்கும் என்பதை அடித்துச் சொல்வேன். நான் நானாகத்தான் இருக்கிறேன். தெய்வமும், மக்களும் எனக்குத் துணையாக உள்ளனர். பல கட்சிகள் கூட்டணிக்காக வருகிறார்கள். தே.மு.தி.க. வின் வளர்ச்சியைப் பார்த்து வருகிறார்கள்.

தே.மு.தி.க. தொடங்கி 4 ஆண்டுகளிலேயே 20 சதவீத ஓட்டுக்கள் கிடைக்கும் என்று கருத்துக் கணிப்பு கூறியதைப் பார்த்து பலருக்கும் வயிற்றில் புளியைக் கரைக்கிறது.

தே.மு.தி.க. சொன்ன தேர்தல் அறிக்கையைத்தான் தற்போது தி.மு.க. அரசு நிறைவேற்றி வருகிறது. இன்று கட்சியில் சேர்ந்துள்ள 5 ஆயிரம் பேரும், 50 ஆயிரம் ஓட்டுக்களாக மாற்றித் தர வேண்டும்” என்று பேசினார்.

பொது இடங்களில் புகை பிடித்தால் உடனடி அபராத‌ம்: காவ‌ல்துறை ஆணைய‌ர் அறிவிப்பு 
 
செ‌ன்னை: மகா‌த்மா கா‌ந்‌தி‌ ‌பிற‌ந்தநாளான அ‌க்டோப‌ர் 2ஆ‌ம் தேதி முத‌ல் பொது இட‌ங்க‌ளி‌ல் புகை‌ப்‌பிடி‌த்தா‌ல் ரூ.100 முத‌ல் ரூ.500 வரை உடனடி அபராத‌ம் ‌வி‌தி‌க்க‌ப்படு‌ம் என‌்று செ‌ன்னை மாநகர காவ‌ல்துறை ஆணைய‌ர் சேக‌ர் கூறினார்.
 
செ‌ன்னை‌யி‌ல் நேற்று அவ‌ர் செ‌ய்‌தியாள‌ர்களு‌க்கு அ‌ளி‌த்த பே‌ட்டி‌‌யி‌ல்,

”கா‌ந்‌தி ஜெய‌ந்‌தியான அக்டோபர் 2ஆ‌ம் தேதி முதல் பொது இடங்களில் புகை பிடிப்பவர்கள் மீது மத்திய, மாநில சட்டப்பிரிவுகளின் கீழ் நடவடிக்கை எடுக்க வேண்டும் என அறிவுறுத்தப்பட்டுள்ளது.

அதன்படி சுகாதார மையங்கள், கலையரங்குகள், உணவகங்கள், வணிக வளாகங்கள், கருத்தரங்கு மற்றும் கலந்தாய்வு கூடங்கள், மரு‌த்துவமனை வளாகம், சினிமா தியேட்டர்கள், பொழுது போக்கு பூங்காக்கள், பொது அலுவலகங்கள், உணவு விடுதிகள், பள்ளி- கல்லூரி வளாகங்கள், நீதிமன்ற வளாகங்கள், பூங்காக்கள்.

பேரு‌ந்து நிலையங்கள், பேரு‌ந்து நிறுத்தங்கள், கடை வீதிகள், நூலகங்கள், விளையாட்டு அரங்கங்கள், உள்ளாட்சி அலுவலகங்கள், கூட்டுறவு மையங்கள், அனைத்து மத்திய, மாநில அரசு அலுவலகங்கள், அனைத்து மதக் கோவில்கள், பொது மக்கள் அதிகமாக கூடும் அனைத்து இடங்களிலும் புகை பிடிக்க தடை செய்யப்பட்ட இடங்களாகும். மேற்கண்ட இடங்களில் யாராவது புகை பிடித்தால் உடனடியாக அவர்கள் மீது சட்ட ரீதியாக நடவடிக்கை எடு‌த்து ரூ.100 முத‌ல் ரூ.500 வரை அபராத‌ம் ‌வி‌தி‌க்க‌ப்படு‌ம்” என்றவர்,

நடிகர் வடிவேலு கொடுத்த புகாரின் பேரில் வழக்கு விசாரணை நேர்மையாக நட‌ந்து வரு‌கிறது எ‌ன்று‌ம் விசாரணை தகவலின் அடிப்படையில் குற்றவாளிகள் கைது செய்யப்படுவார்கள் எ‌ன்று‌ம், தீவிரவாதிகள் அச்சுறுத்தல் இருப்பதாக மத்திய உள்துறை அமை‌ச்சக‌ம் எ‌ச்ச‌ரி‌க்கை ‌விடு‌த்ததைத் தொட‌‌ர்‌ந்து சென்னையில் தீவிர பாதுகாப்பு ஏற்பாடுகள் செய்யப்பட்டுள்ளது எ‌ன்று தெ‌ரி‌வி‌த்த காவ‌ல்துறை ஆணைய‌ர் சேக‌ர், ”பொது மக்கள் தங்களது பாதுகாப்பு குறித்து எப்பொழுதும் விழிப்புடன் இருக்க வேண்டும் என்பதற்காக ‘மக்கள் சேவையில் சென்னை காவல்’ என்ற விழிப்புணர்வு வாசக‌‌ங்‌க‌ள் அச்சிடப்பட்டுள்ளது” எ‌ன்றா‌ர்.

ஓரின சேர்க்கை விவகாரம்: அன்புமணி கருத்துக்கு மத்திய அரசு எதிர்ப்பு

டெல்லி: ஒரின சேர்க்கையில் ஈடுபடுவது குற்றம் என்ற சட்டப்பிரிவை நீக்கக்கோரி, ஒரின சேர்க்கையாளர்கள் டெல்லி உயர்நீதிமன்றத்தில் பொதுநலன் மனு தாக்கல் செய்திருந்தனர்.

இதற்கு மத்திய உள்துறை அமைச்சகம் தாக்கல் செய்திருந்த பதில் மனுவில், ஓரின சேர்க்கையை அனுமதிக்க முடியாது என்று கூறப்பட்டிருந்தது.

ஆனால் மத்திய சுகாதாரத்துறை அமைச்சர் மருத்துவர் அன்புமணியோ, பரஸ்பர ஒப்புதலுடன் ஓரின சேர்க்கையில் ஈடுபடுவதற்கு ஆயுள் தண்டனை விதிக்கும் சட்டப்பிரிவை நீக்கலாம் என்று யோசனை தெரிவித்தார்.

இதையடுத்து, இவ்விவகாரத்தில் அரசு இரட்டை வேடம் போடுவதாக டெல்லி உயர்நீதிமன்றம் குற்றம் சாட்டியது.

இந்நிலையில் இம்மனு தலைமை நீதிபதி ஏ.பி. ஷா, நீதிபதி எஸ். முரளி ஆகியோர் அடங்கிய பெஞ்ச் முன்பு நேற்று விசாரணைக்கு வந்தது. அப்போது மத்திய அரசு  சார்பில் ஆஜரான கூடுதல் சொலிசிட்டர் ஜெனரல் பி.பி. மல்ஹோத்ரா, ‘மத்திய அமைச்சர் அன்புமணி தெரிவித்த கருத்தை பரிசீலிக்க வேண்டாம்” என்று கேட்டுக்கொண்டார்.

ரஜினி அரசியலுக்கு வர ரசிகர்கள் வலியுறுத்தல்:
சத்தியநாராயணா வீடு முற்றுகை

சென்னை: ரஜினிகாந்த் ரசிகர்கள், அவருடைய மன்ற பொறுப்பாளரான சத்யநாராயணா வீட்டை முற்றுகை இட்டனர். உடனடியாக அரசியல் கட்சி தொடங்க வேண்டும் என்று அவர்கள் வற்புறுத்தினர்.

ரஜினி அரசியலில் இறங்கவேண்டும் என்பது அவரது ரசிகர்களின் ஆசை. ஆனால் ரஜினியோ அதுகுறித்து எந்த பதிலையும் சொல்வதில்லை. சமீபகாலமாக அவருடைய ரசிகர்களின் அரசியல் ஆசை அதிகரித்து வருகிறது.

‘தலைவா மவுனம் கலைத்துவிடு. தமிழகத்தை தலைமை ஏற்று நடத்தி விடு’ என்ற வாசகங்கள் அடங்கிய சுவரொட்டிகளை தமிழகம் முழுக்க காணமுடிகிறது.

ரஜினி ரசிகர்கள் அனைவரும் ஒன்றுகூடி அவரை அரசியலுக்கு வரச்சொல்லி அழைப்பு விடுப்பது என்று முடிவெடுத்தனர்.

ரசிகர் மன்ற பொறுப்பாளர் சத்தியநாராயணா, ரசிகர்களைக் கட்டுப்படுத்தி வைத்திருந்தார். ரசிகர்களின் நெருக்கடி அதிகரிக்கவே மாவட்ட நிர்வாகிகளையும் ரஜினியையும் சந்தித்துப் பேசவைப்பதாக அவர் கூறியதாகத் தெரிகிறது.

எந்திரன் படப்பிடிப்பு முடிந்து ரஜினி சென்னை திரும்பியதைத் தொடர்ந்து, அவரை சந்திக்கும் கோரிக்கையும் வலுப்பெற்று வருகிறது.

இந்நிலையில் சென்னை கோபாலபுரத்தில் உள்ள சத்தியநாராயணா வீட்டை நேற்று ரஜினி ரசிகர்கள் முற்றுகை இட்டனர்.

”தலைவரை சந்திக்க ஏற்பாடு செய்யுங்கள். அவரிடம் நாங்கள் பேசிக் கொள்கிறோம். அவரை அரசியலுக்கு கொண்டுவருவது எங்கள் பொறுப்பு” என்று அவர்கள் வற்புறுத்தினர். இரண்டு நாட்களில் சந்திப்புக்கு ஏற்பாடு செய்கிறேன் என்று சத்தியநாராயணா கூறியதும் அவர்கள் அங்கிருந்து கலைந்து சென்றனர்.

ரஜினி தனது ரசிகர்களுக்காகவாவது அரசியலில் இறங்கவேண்டும் அல்லது ரசிகர்களை ஒன்றிணைக்கும் ஒரு சமூக சேவை அமைப்பொன்றையாவது தொடங்க வேண்டும் என்பது ரசிகர்களின் விருப்பமாகும்.

திரைப்பட இயக்குநர் சங்கத் தலைவராகச் செயல்பட பாரதிராஜாவுக்குத் தடை

சென்னை: தமிழ்நாடு திரைப்பட இயக்குநர்கள் சங்கத் தலைவராகச் செயல்பட பாரதிராஜாவுக்கு சென்னை சிட்டி சிவில் நீதிமன்றம் தடைவிதித்துள்ளது.

தமிழ்நாடு திரைப்பட இயக்குநர்கள் சங்கத் தலைவராக பாரதிராஜா கடந்த ஜூன் 8ஆம் தேதி நடந்த தேர்தல் மூலம் தேர்ந்தெடுக்கப்பட்டார்.

இத்தேர்தலை எதிர்த்து இயக்குநர் ஆர்.சி. சக்தி, சென்னை சிட்டி சிவில் நீதிமன்றத்தில் வழக்கு தொடுத்தார். இந்த மனு நிலுவையில்

உள்ள நிலையில் சங்கத்தின் மற்ற உறுப்பினர்களுக்கான தேர்தலை அக்டோபர் 12ஆம் தேதி நடத்தப்போவதாக கடந்த 16ஆம் தேதி சங்கம் அறிவித்தது.

இதை எதிர்த்தும், சங்கத்தின் தேர்தலை நடத்த நிர்வாகியை நியமிக்கக் கோரியும் ஆர்.சி. சக்தி  மனுத் தாக்கல் செய்தார். இந்த மனுக்களும் 7 ஆவது சிட்டி சிவில் நீதிபதி கிருபாநிதி முன்னிலையில் விசாரணைக்கு வந்தது. இருதரப்பு வாதங்களுக்குப் பிறகு நீதிபதி தனது தீர்ப்பில்,

”மறுஉத்தரவு வரும்வரை பாரதிராஜா இயக்குநர் சங்கத் தலைவராகச் செயல்படக்கூடாது. சங்கத்தின் நடவடிக்கைகளை கவனிக்க வக்கீல் ஆர். வித்யாவும், அவருக்கு  உதவியாக வக்கீல் ஜெயசுதாவும் நியமிக்கப்படுகிறார்கள். இவர்களிடம் உடனடியாக சங்கப் பொறுபபுகளை ஒப்படைக்க வேண்டும். தேர்தல் அதிகாரியாக எஸ்.ஏ. சந்திரசேகரன் நியமிக்கப்படுகிறார். அவர் சங்கத்தின் சட்டதிட்டங்களுக்கு உட்பட்டு தேர்தலை 2 மாதங்களுக்குள் நடத்தி நீதிமன்றத்தில் அறிக்கை தாக்கல் செய்யவேண்டும்” என்று கூறினார்.

சென்னை மாநகராட்சி அதிரடி: அத்துமீறி கட்டப்பட்ட ஐந்து மாடி கட்டடம் இடிப்பு

சென்னை: சென்னையில் அனுமதியின்றி கட்டப்பட்ட ஐந்தடுக்கு மாடி கட்டடத்தை மாநகராட்சினர் நேற்று இடித்துத் தள்ளினர். சென்னை முழுக்க அதிரடி தொடரும் எனத் தெரிகிறது.

நெருக்கடியாக கட்டடங்கள் கட்டப்படுவதால் ஆபத்து நெருக்கமாகிறது. சமீபத்தில் நிகழ்ந்த சரவணா ஸ்டோர்ஸ் தீ விபத்தை இதற்கு உதாரணமாகச் சொல்லலாம். இதன் மூலம் மாநகராட்சியின் விதிமுறைகளை மீறி பல கட்டடங்கள் சென்னை முழுக்க கட்டப்பட்டிருப்பது தெரியவந்துள்ளது. அனுமதியின்றி கட்டப்பட்ட கட்டடங்ககளை கண்டறிய கணக்கெடுப்பு பணி நடத்தப்பட்டது.

மேலும் இந்தப் பணியில் மாநகராட்சியுடன் சி.எம்.டி.ஏ. மற்றும் தீயணைப்புத் துறையும் கைகோர்த்து செயல்பட்டுவருகின்றன.

அத்துமீறி கட்டப்பட்ட கட்டடங்களை இடித்துத் தள்ளவும் சென்னை மாநகராட்சி தயாராகிவிட்டது. இதற்கு முதல் பலியாக சென்னை தங்கசாலையில் உள்ள ஐந்தடுக்கு கட்டடம் ஒன்று நேற்று இடித்துத் தள்ளப்பட்டது.

சென்னை சவுகார் பேட்டையைச்சேர்ந்த பாபுலால் சந்த் அப்பகுதியில் ஐந்தடுக்கு கட்டடத்தை கட்டியுள்ளார். தரைதளம் மற்றும் முதல் தளத்திற்கு மட்டுமே அனுமதி பெற்றுள்ளார் இவர்.

மேலும் அதற்கு மேல் மூன்று மாடிகள் கட்டியுள்ளார். இதையடுத்து மாநகராட்சி அவருக்கு நோட்டீஸ் அளித்தது.

அதை அவர் கண்டுகொள்ளாததால் மாநகராட்சி நேற்று அவருடைய ஐந்து மாடி கட்டடத்தை அதிரடியாக இடித்துத் தள்ளியது.

இதுகுறித்து மாநகராட்சி தரப்பில் கூறப்படுவதாவது:

கடந்த ஆண்டு ஜூலை 27 க்கு முன்பாக, விதிமுறைகள் தொடர்பான வழக்கு நிலுவையில் உள்ளது. இதன் காரணமாக அதற்கு பின் கட்டப்பட்ட அத்துமீறிய 17 கட்டடங்கள் இடிக்கப்பட உள்ளன. இந்த இடிப்புப் பணியும் தொடரும் எனக் கூறப்படுகிறது.

நவராத்திரி கொலு ஆரம்பம்: பூம்புகாரில் கொலு பொம்மை கண்காட்சி
புகைப்படத் தொகுப்பு

நவராத்திரி நாளை தொடங்குவதையொட்டி சென்னை உள்பட நாடு முழுவதும் கொலு பொம்மை விற்பனை களை கட்டியுள்ளது.

புரட்டாசி மாத வளர்பிறையில் நவராத்திரி விழா தொடங்குகிறது. இமயம் முதல் குமரிவரை நாடு முழுவதும் நவராத்திரி விழா கொண்டாடப்படுகிறது. இது தமிழ்நாட்டில் நவராத்திரி என்றும், கர்நாடகாவில் தசரா பண்டிகை என்றும், மேற்கு வங்கத்தில் துர்கா பூஜை என்றும் கொண்டாடப்படுகிறது.

நவராத்திரி விழாவி்ல் 10 ஆவது நாள் விஜயதசமி என்று கொண்டாடப்படுகிறது. அம்பாளை ஆராதிக்கும் நவராத்திரியில் அம்பாளுக்கு 10 திருநாமங்கள். இவை ஒவ்வொன்றும் ஒவ்வொரு சக்தியைத் தரக்கூடியவை.

அன்னை பராசக்தி, நவராத்திரி தினங்களில் முறையே மகேஸ்வரி, கவுமாரி, வாராகி, சாமுண்டி என்ற நவஸ்வரூபங்களாக விளங்கி பக்தர்களுக்கு அருள் தருகிறாள்.

மகிஷாசுரன் என்ற அசுரனை அழித்து, தேவர்களைக் காப்பாற்ற சக்தி அவதரித்து அவனை அழித்தாள். அதன் நினைவாகவே தேவியின் பாதங்களை வணங்கி வரம் கோருவதையே நவராத்திரி தினங்கள் குறிக்கின்றன.

இந்த 9 நாட்களில் இச்சா சக்தி, கிரியா சக்தி, ஞான சக்தி என, தேவியை முதல் 3 நாட்கள் வெற்றியை வேண்டி அம்பாளை மகா துர்காவாகவும், அடுத்த 3 நாட்கள் செல்வம் வேண்டி மகாலட்சுமியாகவும், கடைசி 3 நாட்கள் கல்வியை வேண்டி மகா சரஸ்வதியாகவும் அம்பாளுக்கு அலங்காரம் செய்து  நவராத்திரி கொலு கொண்டாடப்படுகிறது.

நவராத்திரி விழாவை யொட்டி வீடுகளில் பெண்கள் விதவிதமான பொம்மைகளை அடுக்கி வைத்து கொலு வைப்பார்கள். கொலு வைப்பது  என்பது இறைவியின் விசுவரூபத்தைக் குறிப்பதாகும்.

நவராத்திரி கொண்டாடுமிடத்தில், கொலுவைக்கும் இடத்தில் கும்ப பூஜையும் நடத்தப்படுகிறது.

நவராத்திரி விழாவை யொட்டி சென்னையில் கொலு பொம்மை விற்பனை களை கட்டியுள்ளது.

சென்னை அண்ணாசாலையில் உள்ள பூம்புகார் விற்பனை நிலையத்தில் அழகான கொலு பொம்மைகள் விற்பனை செய்யப்படுகிறது. இதற்காக கொலு பொம்மைகள் கண்காட்சியை ஏற்பாடு செய்திருக்கிறது பூம்புகார் நிறுவனம்.

இக்கண்காட்சியில் மிகப் பெருமளவில், பலவகைப்பட்ட கொலு பொம்மைகள் அனைவருக்கும் கிடைக்கும் வகையில் கொலு பொம்மைகள் தமிழ்நாடு, ஆந்திரப்பிரதேசம், கேரளா, கொல்கத்தா, பாண்டிச்சேரி போன்ற இடங்களில் இருந்து வரவழைக்கப்பட்டிருக்கின்றன. இவற்றில் தசாவதாரம் செட், தர்பார் செட், குபேரன் செட், கிரிவலம் செட், திருமலை செட், கோபியர் நடனம் செட், விளையாட்டு செட், கருடசேவை செட், அஷ்டலஷ்மி செட், கிராமிய செட், போன்றவையும் பலவகை கடவுளர் உருவச்சிலைகளும், களிமண், காகிதக்கூழ், பீங்கான், சுட்டமண், கல், மரம், பித்தளை போன்ற பலவகை கைவினைப் பொருட்களில் தயாரித்து வைக்கப்பட்டுள்ளன.

இச்சிறப்புக் கண்காட்சி சென்னை பூம்புகார் விற்பனை நிலையத்திலும் அதன் திருச்சி, தஞ்சை, கோவை, ஈரோடு, சேலம், மதுரை, திருநெல்வேலி கிளைகளிலும் விற்பனைக்கு வைக்கப்பட்டுள்ளன.

இக்கண்காட்சி அக்டோபர் 10ஆம் தேதி வரை நடக்கிறது. காலை 10 மணி முதல இரவு 8 மணி வரை கண்காட்சி திறந்திருக்கும்.

பூம்புகார் கொலு பொம்மை கண்காட்சியில் வைக்கப்பட்டுள்ள கொலு பொம்மைகள் உங்களுக்காக இங்கே புகைப்படத் தொகுப்பாகக் கொடுக்கப்பட்டுள்ளது.

[Show as slideshow]

காதலில் விழுந்தேன்

நடிப்பு: நகுலன், சுனேனா, ஹரிராஜ், லிவிங்ஸ்டன், சம்பத்
தயாரிப்பு: சன் பிக்சர்ஸ், அட்லாண்டிக் சினிமாஸ்
இயக்கம்: பி.வி. பிரசாத்
இசை: விஜய் ஆண்டனி
ஒளிப்பதிவு: விஜய் மில்டன்

அளவுக்கு மீறினால் அமிர்தமும் நஞ்சு! காதல் அதிகமானால் அமிர்தமா, நஞ்சா? என்பதற்கு விடை தேடுவதுதான் காதலில் விழுந்தேன் திரைப்படத்தின் ஒருவரிக் கதை…

சிறுவனாக இருக்கும்போதே தாயை இழந்த நகுலன் குடிகார அப்பனிடம் வளர்கிறார்.

அன்புக்கு ஏங்கும் அவருக்கு அதன் அட்சயபாத்திரமாக கிடைக்கிறார் சுனேனா. கல்லூரி மாணவனான நகுலனுக்கு, விபத்தொன்றின் மூலம் அறிமுகமாகிறார் கல்லூரி மாணவி சுனேனா. அந்த விபத்துக்கு அவர்தான் காரணம் என்பதால் நகுலனை  மருத்துவமனையில் சேர்த்து சிகிச்சை அளிக்கிறார். காதல் தீ பற்றிக்கொள்ள இந்த சம்பவங்கள் போதாதா என்ன. சிகிச்சை சமயத்தில் அவர்களிடையே ஏற்படும் நட்பு, ஒரு கட்டத்தில் காதலாக மாறுகிறது. இருவரும் காதலில் சிக்கும்போது வாழ்க்கை சிக்கலும் தொடங்குகிறது.

நகுலன் கால்பந்து போட்டிக்காக ஊட்டி சென்றிருந்த சமயத்தில், சுனேனா இறந்ததாக தகவல் வர, ஊருக்குத் திரும்பும் நகுலன், காதலி இறந்ததை நம்ப மறுக்கிறார்.

அதே சமயம் நகுலனை கும்பலொன்று துரத்திக்கொண்டே இருக்கிறது. அவர்கள் ஏன் துரத்துகிறார்கள்? காதலி சுனேனா என்ன ஆனார்? அவர்களுடையக் காதல் என்னவாயிற்று? என்பது சுவாரஸ்யமிக்க மீதி கதை.

அறிமுக இயக்குநர் பி.வி. பிரசாத்துக்கு தாராளமாக கைகுலுக்கலாம். பின்னே, கவிதையான காதல் கதையை அதிரடி ஆக்ஷன் கலந்து காக்டெயிலாக்கி நம்மை கலங்கடிக்கிறாரே!

ஷங்கரின் பாய்ஸ் திரைப்படத்தில் வந்த பப்ளிமாஸா இது?  கதாநாயகன் நகுலனைத்தான் சொல்கிறோம். ரொம்ப லேட்டாக வந்தாலும், லேட்டஸ்ட்டாக வந்திருக்கிறார் நகுலன்(தேவயானியின் தம்பி). இனி இவருக்கு ஏறுமுகம்தான்.

நாயகி சுனேனா அழகு. குழந்தை முகத்தோடு வந்து, காதலியாய் உருகி நம்மையும் உருக்கி விடுகிறார். பயணச்சீட்டு பரிசோதகர் லிவிங்ஸ்டன் கதை சொல்வதும், மின்சார வண்டியின் வேகத்தில் கதை நகருவதும் புதுசு.

நகுலனை நசுக்கக் கிளம்பும் காவல்துறை அதிகாரி சம்பத், நகுலனின் கதையை அறிந்து மனம் மாறி நகுலனைக் காப்பாற்றத் துடிப்பது அசத்தல். சுனேனாவின் இறப்பு பின்னணி திகில் ஊட்டுகிறது.

இசையமைப்பாளர் விஜய் ஆண்டனியின் பாடல்கள் ஏற்கனவே சூப்பர் ஹிட். தமிழ்நாட்டின் மூலை முடுக்கெல்லாம் இளைஞர்கள் கொட்டடித்துக் கொண்டிருக்கும் ‘நாக்க முக்க’ பாடல் திரையிலும் ஜொலிக்கிறது. இது செம குத்து என்றால், ‘உன் தலைமுடி விழுவதைக் கூட’, ‘தோழியா, என் காதலியா’ பாடல்கள் எந்நேரமும் மனதிற்குள் ரீங்காரமிட்டுக் கொண்டிருக்கும் மெலோடிஸ்.

ஒளிப்பதிவாளர் விஜய் மில்டன், சண்டை பயிற்சியாளர் ஆக்ஷன் பிரகாஷ், கலை இயக்குநர் சகு ஆகியோரும் தங்கள் பங்குக்கு காதலில் விழுந்தேன்- னை மெருகேற்றி உள்ளனர்.

ஒரு காதல் கதையை அதற்குரிய தன்மை மாறாமல் அடிதடி ஆக்ஷன் கலந்து கொடுத்து, ரசிகர்கள் மனதில் பதிந்துவிட்டார் இயக்குநர் பி.வி. பிரசாத். தமிழ்த் திரையுலகத்திற்கு சிறந்த இயக்குநர் ஒருவர் கிடைத்திருக்கிறார்.

Click for bigger size

[Show as slideshow]